Nau Hôr 10 - Nau Brah Ndu Ngơi 2023

Lĕ nau hôr bơh Y-Salômôn ( 10:1 – 29:27 ) Samƀŭt rơh nguay lĕ nau hôr bơh Y-Salômôn

¹ Aơ jêng lĕ nau hôr bơh Y-Salômôn: Kon blau mĭn ƀư ăn mbơ̆ răm maak, Ƀiălah kon rluk ƀư ăn mê̆ păng rngot.

² Drăp ndơ nau ƀư djơh mâu jêng khlay ôh, Ƀiălah nau sŏng srăng tâm rklaih bunuyh bơh nau khĭt.

³ Brah Yêhôva mâu ăn huêng phung sŏng srăng ji ngot ji hir, Ƀiălah Păng dun nau phung djơh ŭch kơnh.

⁴ Mpang ti ƀlao ƀư ăn nau o ach, Bi mpang ti gơih păng mra ƀư ndrŏng.

⁵ Bunuyh prăp bun tâm yan vai jêng kon blau mĭn, Bi phung bê̆ch tâm yan rek jêng kon bêk prêng.

⁶ Bôk bunuyh sŏng srăng dơi ăn nau ueh uĭn, Ƀiălah bâr mbung phung djơh mhĭk prăp bun ntil nau ƀai.

⁷ Nau ndray ma bunuyh sŏng srăng geh nau tâm rnê, Bi amoh phung djơh mhĭk mra ôm rai.

⁸ Nuih n'hâm blau mĭn mra sŏk dơn nau vay ntăm, Ƀiălah bâr mbung nơm rluk mra rai lôch.

⁹ Bunuyh gŭ rêh sŏng mra geh nau đăp mpăn, Bi phung tĭng ndô̆ trong kue bu mra ƀư mpơl lĕ kan păng.

¹⁰ Mbu nơm ntơ̆ măt nau djơh ƀư nau rêh ni, Jêh ri bâr mbung rluk mra rai yot.

¹¹ Bâr mbung bunuyh sŏng srăng jêng tu ma nau rêh, Ƀiălah bâr mbung phung ƀai prăp bun nau mhĭk.

¹² Nau tâm rmot jêng nsônh ma nau tâm djrel, Nuih n'hâm tâm rŏng nkŭm lĕ nau tih.

¹³ Nau blau mĭn bu saơ ta bâr mbung bunuyh gĭt vât, Ƀiălah mâng rpăt prăp ăn ma ndŭr kơi phung rluk mâl.

¹⁴ Phung blau mĭn prăp nkrem nau blau mĭn âk, Mbung phung rluk djôt nau ƀư rai văch dăch.

¹⁵ Drăp ndơ jêng pôih nâp ngăn ma bunuyh ndrŏng kuăng, Nau ƀư rai jêng nau rêh ni ma phung o ach.

¹⁶ Rnoh nkhôm ma bunuyh sŏng srăng njŭn leo ma nau rêh, Bi kao play bunuyh djơh mhĭk njŭn leo ma nau tih.

¹⁷ Bunuyh djôt prăp nau bu ntĭm nti, hăn tâm trong nau rêh; Mbu nơm dun nau bu nkra mra nhhơt vĭ hêng.

¹⁸ Bunuyh pôn mo nau tâm rmot geh mbung mƀruh, Mbu nơm ngơi nchơt jêng bunuyh rluk mâl.

¹⁹ Mbu âk ngơi, nơih ngăn geh nau tih; Ƀiălah mbu nơm blau njrăng bâr mbung jêng nau blau mĭn.

²⁰ Mpiăt bunuyh sŏng srăng nâm bu prăk khlay, Nuih n'hâm phung djơh mhĭk mâu jêng khlay ôh.

²¹ Bâr mbung bunuyh sŏng srăng siăm âk bunuyh rêh, Bi phung rluk khĭt yor mâu geh nau gĭt vât.

²² Nau ueh uĭn bơh Brah Yêhôva ƀư ăn ndrŏng; Păng mâu hôm ntop ôh nau hŏt rgănh jâk jêr.

²³ Phung rluk uănh nau ƀư tih nâm bu nau pâl maak, Ƀiălah bunuyh gĭt rbăng ŭch rŏng ma nau blau mĭn.

²⁴ Moh ntil ndơ phung ƀai klach mra tât ma khân păng, Ƀiălah ntil ndơ phung sŏng srăng ŭch mra dơi ăn geh.

²⁵ Lah phŭt sial chuănh lĕ lăn jêh, mâu hôm geh ôh phung ƀai, Ƀiălah mbon phung sŏng srăng gŭ nâp mro mrăng.

²⁶ Nâm bu dak srat ƀư kĭr sêk, nhhŭk ŭnh ƀư hăng măt, Bunuyh ƀlao đah nơm prơh păng hăn jêng nâm bu kơt nây lĕ.

²⁷ Nau klach yơk ma Brah Yêhôva ntop jŏ nar khay gŭ rêh, Bi năm gŭ rêh ma phung mhĭk mra n'hŭch lơi ăn ƀhôi.

²⁸ Nau kâp gân phung sŏng srăng njŭn tât ma nau hâk răm, Bi nau kâp gân phung mhĭk mra hăn tâm nau rai yot.

²⁹ Trong Brah Yêhôva jêng pôih nâp ăn ma phung sŏng, Ƀiălah jêng ntŭk ƀư rai ăn ma phung ƀư mhĭk.

³⁰ Phung sŏng srăng mâu mra n'gơ ôh, Ƀiălah phung djơh mhĭk mâu dơi gŭ chăm bri ôh.

³¹ Bâr mbung bunuyh sŏng srăng dơi geh nau blau mĭn, Ƀiălah mpiăt phung kue bu mra koh lơi.

³² Mbung bunuyh sŏng srăng ngơi ntil nau ueh, Ƀiălah bâr mbung phung mhĭk knŏng ngơi nau kue.