Nahum 3 - Nau Brah Ndu Ngơi 2023

Rêh ni ngăn ma ƀon Ninive

¹ Rêh ni ngăn ma ƀon toyh krêp mham! Păng bêng ma nau mƀruh jêh ri janh ƀai Mâu rlu ôh nau ntŭng ndô ndơ.

² Nteh rpăt mâng rvĕ, nteh drâm drâm jâng ndeh nchuăt; Seh nchuăt ngăch ngăn, ndeh seh nchuăt ngăch rjăng.

³ Phung ncho seh rduh ran panăp, Yat đao rmah ƀlĭp, tak rjăng lơp ƀlip. Âk râk bunuyh cha lôt khĭt, Bun mpưm mbŭch săk nuyh khĭt, Săk nuyh khĭt mâu dơi kơp ôh! Bu chêh prah ta klơ săk nuyh khĭt.

⁴ Nây jêng yor âk ngăn bu ur ka n'hong vay ƀư nau văng tĭr, Ndơm ma nau ueh păng, ƀư hađăch bu ur nau blau rƀên; Păng tăch lĕ bri dak yor ma nau văng tĭr, Jêh ri tăch phung ƀon lan ma nau blau rƀên.

⁵ Brah Yêhôva ma phung tahan lah: “Aơ, Gâp tâm rdâng đah ay; Gâp mra rhơl nah bŭt ay nkŭm tât muh măt ay, Mpơl nau rhôk may ăn ma lĕ mpôl băl bunuyh Jêh ri ma lĕ ƀon bri hađăch saơ nau bêk prêng ay.

⁶ Gâp mra mƀăr lĕ ndơ ƀơ̆ ƀơch ta ay, Ƀư ma ay đah nau tâm rmot, Jêh ri ƀư ma ay jêng ndơ bu gơm mưch ma lĕ rngôch bunuyh.

⁷ Nôk nây, bu saơ ay mra du ngai jêh ri lah: ‘Ƀon Ninive lĕ rai ƀhiau jêh! Mbu nơm mra yô̆ nđach ma păng?’ Ta ntŭk Gâp joi ma ay phung bonh leng?”

⁸ Ay jêng ueh lơn ma ƀon Nô-Amôn lĕ? Păng jêng du ƀon gŭ ta nklang lĕ dak krong Nil, Geh dak văr jŭm păng, Sŏk dak mƀŭt ƀư pôih nâp, Sŏk dak ƀư mpêr ƀon.

⁹ Bri Kus jêh ri bri Êjipt jêng nau dăng păng mâu blau lôch. N'gor Put jêh ri phung Libi jêng phung kơl păng.

¹⁰ Nđâp lah pônây, păng nơm lĕ hăn jêng bu nă jêh, Jêh ri bu krŭng tâm ndrung; Phung kon păng lĕ bu rchiăt hăch Ntŭk tơm trong sâng ƀon toyh. Phung ndrŏng bu djôt leo nau tâm nchroh, Phung kôranh toyh bu nkông da dê.

¹¹ Ay tâm ban lĕ, mra nhŭl ndrănh Jêh ri du krap; Tâm ban lĕ may nơm mra joi Ntŭk du krap bơh phung rlăng.

¹² Lĕ rngôch pôih may jêng nâm bu tơm play rvi Bêng ma play dŭm bôk yan; Lah bu n'gơ ri mơ play rŭng, Tŭp tâm trôm mbung bunuyh sa.

¹³ Aơ, phung tahan may Jêng phung bu ur gŭ ta nklang may. Lĕ mpông ƀon bri dak may Mra pơk huy ma phung rlăng; Ŭnh sa rvăn jêh lĕ mâng rnăng mpông!

¹⁴ Bâk lor dak gay njrăng lah bu nchueng, Ndăp ăn nâp pôih may; Hăn hom sŏk neh uk, Pach bŏk jêh ri ndâk nkra tay năk ƀư ƀrĭk!

¹⁵ Ta nây, ŭnh mra sa hŭt may, Đao mra ƀư rai may; Păng mra sa rvăn may nâm bu krah sa ndơ tuch tăm. Bĭk rơ̆ hom nâm bu krah grăch, Bĭk rơ̆ hom nâm bu krah nsăt!

¹⁶ May hŏ ƀư bĭk rơ̆ jêh phung tăch rgâl ma may Âk lơn mănh ta klơ trôk; Ƀiălah lĕ rngôch nâm bu krah grăch ƀư rai lĕ bhiau jêh nây du mpăr.

¹⁷ Phung tahan gak may âk nâm bu krah grăch, Phung kôranh may nâm bu phung krah nsăt Drâm ta klơ pêr Tâm nar ji kăt; Lah tât luh nar, Păng du roh, Bu mâu gĭt ôh ntŭk păng gŭ.

¹⁸ Hơi hađăch Asiri, Phung rmăk biăp may lĕ bê̆ch jêh! Phung kôranh may gŭ rlu da dê. Phung ƀon lan may nchah rai pru pra tâm lam yôk, Mâu geh ôh nơm sâm rgum tay khân păng.

¹⁹ Sôt rmanh may mâu geh ôh dak si ƀư bah, Sôt rmanh may dŭt glăm ngăn. Lĕ rngôch phung tăng nau nkoch ma may bu tap ti da dê, Yorlah mbu nơm dơi klaih tă bơh nau may chiă uănh ƀư djơh mro?