Nahum 2 - Nau Brah Ndu Ngơi 2023

Nau ƀư rai ƀon Ninive

¹ Nơm ƀư rai văch jêh tâm rdâng đah may. Gay ma n'gang nâp pôih, Gak njrăng hom ta trong; Vân hom rse bŭt ăn ueh Jêh ri ndrăp nâp phung tahan!

² Yorlah Brah Yêhôva mra njêng tay nau chrêk ma lơp ma Yakôb Nâm bu nau chrêk ma lơp Israel, Nđâp tơlah phung sŏk pit hŏ sŏk pit jêh khân păng, Jêh ri lơh rai lĕ n'gĭng tơm krăk ƀâu khân păng.

³ Khêl phung tahan janh nănh khân păng nhom dak chăng, Phung tahan nsoh ao rvanh chăng. Tâm nar khân păng nkrĭp dăp tahan, Phung ndeh seh nchrat nâm bu loih ndŭm tâm ŭnh, Jêh ri nđâp tak đao rduh tâm lơh da dê.

⁴ Phung ndeh seh nchuăt prăl tâm ăp trong sâng, Nchuăt tĭng ta aơ ta ri tâm lĕ nkual ƀon, Uănh nâm bu sol ang ŭnh rdo, Jêh ri nchuăt ngăch nâm bu lơp nglaih!

⁵ Bu kuăl rgum phung kôranh văch; Ƀiălah khân păng chuat hăn ndĭt ndiu, Nchuăt ndal tât ta pêr, Rơm ndrăp nau tâm rdâng.

⁶ Bu pơk lĕ mpông pêr dak n'hong, Ngih hađăch mpât n'gơ da dê.

⁷ Bu sŏk lĕ ndơ nkrơ̆ ur hađăch jêh ri jêng bu nă; Phung oh mon bu ur ndoch ntang ntơh, rđêng nâm bu plŭk.

⁸ Bơh kăl e, Ninive nâm bu nglao bêng dak. Abaơ ri, khân păng lĕ du jêh! Geh bâr nter: “Dâk hom, dak hom!” Ƀiălah mâu geh du huê rle n'gĭl ôh!

⁹ Pit in hom prăk, pit in mah Yorlah jay ndơ khlay mâu geh dŭt ôh, Lĕ ndơ khlay âk râk.

¹⁰ Khân păng lĕ bu ƀư rai jêh ri sŏk pit lĕ bhiau! Nuih n'hâm khân păng huăr huơi da dê, kômâk râm sâr; Ndŭr kơi ji hâu ngăn, Muh măt lĕ brâp.

¹¹ Ƀaƀă, tă trôm yau mŭr, Jêng ntŭk ăn yau mŭr kon de sa, Jêng ntŭk yau mŭr nkuăng, yau mŭr me jêh ri kon păng chuat hăn Mâu geh ôh ndơ ƀư ăn ma khân păng klach, Aƀaơ aơ ta ntŭk trôm nây?

¹² Yau mŭr nkuăng hêk mpa ăp ma kon păng Jêh ri kăp nkhĭt mpô mpa ăn ma yau mŭr me; Trôm păng bêng ma mpa sa, Rsuăn păng bêng ma mpô mpa hŏ kăp hêk jêh.

¹³ Brah Yêhôva ma phung tahan lah: “Aơ, Gâp tâm rdâng đah may. Gâp mra su ndeh seh may tât luh nhhŭk, Đao mra sa rvăn lĕ kon yau mŭr may; Gâp mra chalơi mpa may bơh ta neh, Jêh ri bu mâu mra iăt ôh bâr phung may hăn mbơh đŏng.”