Nahum 1 - Nau Brah Ndu Ngơi 2023

¹ Nau mbơh lor ma Ninive. Ndrom samƀŭt nau Y-Nahum, bunuyh ƀon Êlkôs tâm saơ.

Nau Brah Ndu ji nuih

² Yêhôva jêng Brah Ndu blau ntôn jêh ri plơng bôk; Brah Yêhôva jêng Nơm plơng bôk jêh ri bêng ma nau ji nuih. Brah Yêhôva plơng bôk phung tâm rdâng đah Păng, Jêh ri hao ji nuih đah phung rlăng Păng.

³ Brah Yêhôva mâu gơnh nuih ôh jêh ri geh nau brah dŭt toyh, Ƀiălah Păng mâu uănh ôh nơm geh nau tih jêng mâu tih. Brah Yêhôva chuat hăn tâm phŭt chuănh jêh ri tâm sial vănh blông, Ndâr tŭk jêng ndruyh neh tâm dâng jâng Păng.

⁴ Păng nduyh dak mƀŭt jêh ri ăn păng suăt ro, Păng ƀư ăn suăt lĕ rngôch dak krong. Bri Basan jêh ri yôk Karmel kro nhop da dê, Kao bri Liban mra nhop tâm ban lĕ.

⁵ Yor tă Kôranh Brah, gôl yôk n'găr n'gơ, Lĕ yôk chah rai da dê; Tanăp măt Păng, rplay neh jêh ri neh ntu Nđâp ma lĕ rngôch phung ƀon lan gŭ ta klơ neh dâk da dê.

⁶ Mbu nơm dơi dâk tanăp nau Păng ji nuih? Mbu nơm dơi srôih dơn nau Păng duh nuih? Nau Păng ji nuih nkhŭt nâm bu ŭnh sa, Lĕ lŭ toyh mra chah yor tă bơh Păng.

⁷ Brah Yêhôva jêng ueh ngăn, Jêng pôih nâp tâm nar rêh ni; Păng gĭt phung du krap tâm ntŭk Păng.

⁸ Ƀiălah Păng sŏk dak lip ler băm Gay ƀư rai lĕ ntŭk păng gŭ, Jêh ri hăn tĭng phung rlăng Păng lăp tâm nau ngo.

⁹ Moh nau khân may mĭn ŭch ƀư gay ma tâm rdâng đah Brah Yêhôva? Păng Nơm ro mra yơr ti ƀư rai lĕ, Jêh ri nau rêh ni mâu mra geh ôh bar tơ̆ tât.

¹⁰ Yorlah nđâp lah khân păng tâm pêng nâm bu pŭm lok Jêh ri ndĭt ndiu nâm bu phung nhŭl ndrănh, Khân păng mra ŭnh sa nâm bu rhe kro.

¹¹ Du luh tă bơh ntŭk May nơm ro Du huê nơm ŭch mĭn nchră ƀư nau mhĭk tâm rdâng đah Brah Yêhôva, Du huê nơm tâm chră ƀư nau djơh mhĭk.

Mbơh nau mhe mhan ăn ma Yuđa

¹² Ƀiălah Brah Yêhôva lah: “Nđâp lah khân păng geh nau tâm rnglăp ndrel âk kđôi lĕ, Bu mra ƀư rai jêh ri ăn roh khân păng. Hơi phung ƀon lan Gâp, nđâp lah Gâp hŏ ƀư nkrit jêh khân may, Gâp mâu mra ƀư nkrit khân may đŏng ôh.

¹³ Ƀiălah aƀaơ aơ, Gâp mra nkê̆ch pă mâng mbăk păng tă bơh khân may Jêh ri ăn tăch lơi rse chăp kât khân may.”

¹⁴ Brah Yêhôva hŏ ăn nau ntăm jêh ma Ninive: “May mâu mra geh bunuyh thoi noi deh ndray amoh đŏng ôh. Gâp mra ƀư rai rup trah jêh ri rup tŏ chiăr Tă bơh jây rhŏ brah phung brah may. Gâp mra ƀư môch ăn ma may, Yorlah may rvưt rvâng.”

¹⁵ Aơ, ta klơ phung yôk Geh jâng phung ntuh mbơh nau mhe mhan ueh, Jêh ri mbơh nau đăp mpăn! Hơi Yuđa, prăp hom ăp nar tâm rƀŭn Jêh ri ƀư ăn nanê̆ nau ton, Yorlah phung rlăng mâu mra tŭn jot may đŏng ôh, Păng hŏ rai lĕ jêh.