Mika 6 - Nau Brah Ndu Ngơi 2023

Ntil nau Kôranh Brah gay ŭch ( 6:1 – 7:20 ) Brah Yêhôva nduyh lah phung ƀon lan Păng

¹ Abaơ aơ, iăt hom nau Brah Yêhôva lah; Dâk hom may, tâm rlăch đah phung yôk Jêh ri ƀư ăn phung gôl yôk iăt bâr may!

² Hơi phung yôk jêh ri lĕ mbon nâp ktang n'ho ro ma neh ntu, Iăt hom nau Brah Yêhôva phong! Yorlah Brah Yêhôva kât nau tih ma phung ƀon lan Păng, Jêh ri Păng mra tâm rlăch đah phung Israel.

³ “Hơi phung ƀon lan Gâp, moh nau Gâp hŏ ƀư jêh ma may? Moh nau Gâp ƀư dĭng rgănh ir ma may? Plơ̆ lah hom ma Gâp!

⁴ Gâp njŭn leo jêh may du luh bơh n'gor bri Êjipt, Hŏ chuai jêh may du luh bơh ngih jêng bu nă Jêh ri hŏ prơh jêh Y-Môis, Y-Arôn, H'Miriam Văch panăp măt may.

⁵ Hơi phung ƀon lan Gâp, ăn kah gĭt hom nau Y-Balak, hađăch bri Môap nchră jêh, Jêh ri nau Y-Balaam, kon bu klâu Y-Bêôr plơ̆ lah ma păng. Kah gĭt hom moh nau Gâp hŏ ƀư jêh bơh Sitim tât Gilgal, Gay may gĭt nau sŏng srăng bơh Brah Yêhôva!”

Nau Brah Ndu gay ŭch

⁶ Moh ndơ gâp mra djôt gay tâm mpơl tanăp măt Brah Yêhôva, Jêh ri chon mbah tra năp măt Brah Ndu ta klơ lơn? Gâp mra văch tât tra năp măt Păng ma lĕ ndơ ƀư brah gŭch Jêh ri ma phung kon ndrôk du năm ƀơh?

⁷ Brah Yêhôva mra maak ma âk rbăn mlâm biăp nkuăng Ma âk rbăn n'hor dak ngi ƀơh? Dơi lĕ gâp mra nhhơr kon bôk rah gâp yor nau gâp ƀư tih, Jêh ri nhhơr kao play bơh ndŭl proch săk jăn gâp yor nau tih gâp mâu?

⁸ Hơi bunuyh! Păng hŏ tâm mpơl jêh ma may ntil nau jêng ueh, Ntil nau Brah Yêhôva gay ŭch ăn ma may ƀư. Nây mâu di jêng ƀư nau sŏng srăng, ŭch nau ueh Jêh ri chuat hăn ma nau dêh rhêt ndrel ma Brah Ndu may lĕ?

Nau gay nhăl jêh ri nduyh lah

⁹ Bâr Brah Yêhôva nter lah tâm rdâng ma ƀon aơ; Bunuyh blau mĭn mra klach yơk ma amoh Păng. Iăt hom mâng jra jêh ri Nơm hŏ săch jêh păng.

¹⁰ Hơi ngih djơh mhĭk, mâm Gâp dơi chuêl Jay drăp ndơ khlay mƀruh Jêh ri ndơ veh njing n'hŭch khư ma nau tâm rmot ma may?

¹¹ Mâm Gâp mra dơi yô̆ an ma lĕ njing mƀruh Jêh ri lĕ play njing mƀruh tâm ƀau?

¹² Yorlah phung ndrŏng ƀon aơ bêng ma nau ƀai, Phung ƀon lan păng jêng phung ngơi mƀruh Jêh ri mpiăt vay ndơm gŭ tâm trôm mbung khân păng.

¹³ Yor nây, Gâp dong may, ƀư ăn sôt rmanh jru Jêh ri gay ƀư ma may jêng rngol yor nau tih may.

¹⁴ May mra sông sa ƀiălah mâu dơi hơm, Khŭng may hôm e nsoih; May mra bun ndơ ƀiălah mâu geh ôh prăp; Jêh ri moh ndơ may geh prăp pôri Gâp mra jao ma đao.

¹⁵ May mra srih ƀiălah mâu geh ôh rek; May mra păt dak ngi ôlive ƀiălah mâu geh mhĭng dak ƀâu kah; May mra jot dak krăk ƀâu ƀiălah mâu geh ôh nhêt ndrănh.

¹⁶ Yorlah may hŏ djôt prăp jêh nau vay Y-Ômri Jêh ri hăn tĭng lĕ kan ngih Y-Ahap ƀư; May chuat hăn tâm nau khân păng nchră ndơm; Yor ri, Gâp ƀư ăn may jêng rngol, Phung ƀon lan may bu mra nsŭch, Jêh ri khân may mra anh nau prêng phung ƀon lan Gâp.