Mika 5 - Nau Brah Ndu Ngơi 2023

Nau ton ma Nơm Mêsia

¹ Hơi Ƀêtlêhem Êphrata, May gŭ tâm nklang rbăn Yuđa jêng jê̆ ngăn, Ƀiălah tă bơh may, Mra deh du huê Nơm chiă uănh ta Israel; Păng geh tơm bơh rnôk kăl e, Bơh ntơm saơm n'ho ro.

² Yor ri, Păng mra jao khân păng Kŏ tât nôk du huê bu ur ji deh hŏ deh jêh, Jêh ri phung oh nâu Păng hôm e mra plơ̆ sĭt ndrel Ma phung kon Israel.

³ Păng mra gŭ nâp jêh ri mra nsing nau dăng bơh Brah Yêhôva, Ma nau rnam tâm amoh Yêhôva Brah Ndu păng jêh ri chiăp phung biăp păng Jêh ri khân păng mra gŭ đăp mpăn, yorlah aƀaơ aơ Păng mra jêng toyh Kŏ tât ta bôl dŭt neh ntu.

⁴ Păng nơm mra jêng nau đăp mpăn ma he. Lah phung Asiri mra tât tâm bri he Jêh ri tŭn jot plên tâm ngih hađăch he, Pôri he mra n'hao pơh nuyh rmăk biăp Jêh ri pham nuyh kôranh bơh phung ƀon lan gay tâm rdâng đah păng.

⁵ Khân păng sŏk đao lơh rai bri dak Asiri Jêh ri lĕ mpông pêr bri Nimrôt. Păng mra rklaih he tă bơh phung Asiri, Lah păng mra lăp tâm n'gor he Jêh ri jot tâm trôm n'har bri he.

Nau kan phung hôm klen tâm nar kăndơ̆

⁶ Phung hôm e klen bơh Y-Yakôb Mra gŭ ta nklang âk phung ƀon lan, Nâm bu truh dak tŭk văch tât bơh Brah Yêhôva, Nâm bu dak mih jê̆ tŭp ta klơ gơ̆ nse, Mâu kâp bu ôh Mâu lĕ ŭch ndơ tă phung bu klâu kon bunuyh.

⁷ Phung hôm e klen bơh Y-Yakôb Mra gŭ ta nklang lĕ bri dak, Jêh ri gŭ ta nklang âk phung ƀon lan nâm bu yau mŭr gŭ ta nklang mpô mpa bri, Nâm bu kon yau mŭr gŭ ta nklang phung biăp; Lah păng hăn rgăn mra jot plên, Jêh ri kăp sa hêk mâu geh ôh nơm dơi rklaih.

⁸ Ti Kôranh Brah yơr ƀư ma phung rlăng păng, Jêh ri phung rlăng Păng mra rai yot!

Nau ƀư rai rup brah

⁹ Brah Yêhôva lah: “Nau tât tâm nar nây Gâp mra ƀư rai lơi seh may tă bơh may. Jêh ri ƀư rai lĕ rngôch ndeh seh may.

¹⁰ Gâp mra ƀư rai lĕ ƀon tâm bri may Jêh ri mra ƀư rlâm lơi lĕ rngôch pôih nâp may.

¹¹ Gâp mra ƀư rai lơi phung ƀŭk rƀên tă bơh may Jêh ri may mâu mra hôm geh ôh phung n'hŭm.

¹² Gâp mra ƀư rai lơi lĕ rup trah Jêh ri gâng rup brah tă bơh may, May mâu mra hôm chon mbah đŏng ôh Panăp ndơ kan ti may ƀư.

¹³ Gâp mra rôk lơi gâng rup brah Asêrim bơh may, Jêh ri ƀư rai lĕ ƀon may.

¹⁴ Tâm nau ji nuih, nau Gâp ji nuih mra ƀư nau plơng bôk Ta lĕ bri dak mâu tông ôh bâr Gâp.”