Mika 4 - Nau Brah Ndu Ngơi 2023

Nau tâm rklaih bơh Nơm Mêsia ( 4:1 – 5:14 ) Nau chrêk rmah ƀon Yêrusalem tâm nar kăndơ̆

¹ Tâm lĕ nar nglĕ dŭt, Yôk ngih Brah Yêhôva Mra dơi ndâk nâp ta klơ yôk prêh lơn, Jêh ri mra dơi n'hao prêh lơn ma lĕ gôl yôk. Lĕ mpôl băl bunuyh mra hăn plơ̆ sĭt ta nây.

² Geh âk bri dak mra văch tât ta nây jêh ri lah: “Văch hom, ăn he hăn hao ta yôk Brah Yêhôva, Văch ta ngih Brah Ndu Yakôb! Păng mra sâm nti ma he trong Păng Gay he mra dơi hăn tâm ăp trong Păng.” Yorlah nau vay mra luh bơh Siôn, Nau Brah Yêhôva ngơi luh bơh Yêrusalem.

³ Păng mra ƀư nau phat dôih ta nklang âk mpôl băl bunuyh, Jêh ri phat dôih ta nklang lĕ bri dak dŭt dăng gŭ ntŭk ngai. Khân păng mra sŏk đao chiăr njêng kau kai, Sŏk tak chiăr njêng nhuĕ; Bri dak aơ mâu mra tŏk ôh đao tâm rdâng đah bri dak êng Jêh ri mâu lĕ hôm nti tay đŏng nau tâm lơh.

⁴ Ăp nơm mra gŭ tâm dâng tơm krăk ƀâu khân păng Jêh ri tâm dâng tơm rvi khân păng nơm; Mâu geh ôh nơm ƀư ăn ma khân păng klach Yorlah trôm mbung Brah Yêhôva ma phung tahan hŏ lah jêh.

⁵ Lĕ rngôch mpôl băl bunuyh chuat tĭng Amoh brah păng, Ƀiălah he mra chuat tĭng amoh Yêhôva Brah Ndu he Kŏ tât ƀaƀơ n'ho ro!

Nau ton mra njêng tay lôch jêh tă jêng bu nă

⁶ Brah Yêhôva lah: “Tâm nar nây Gâp mra rgum bunuyh kuet, Rgum tay bunuyh bu hŏ mprơh du, Jêh ri phung Gâp hŏ ƀư rngot jêh.

⁷ Jêh nây Gâp mra sŏk bunuyh kuet ƀư jêng phung ƀon lan hôm e klen Jêh ri phung bu chalơi jêng du bri dak dŭt janh: Brah Yêhôva mra chiă uănh khân păng ta klơ yôk Siôn Ntơm bơh aƀaơ aơ kŏ tât lĕ rngôch rnôk n'ho ro.

⁸ Bi may jêng tŭm ma phung biăp, Yôk ma kon bu ur Siôn, Mra văch ma may, Nau dơi may chiă uănh kăl e mra plơ̆ tay, Nây jêng ƀon bri hađăch ma kon bu ur ƀon Yêrusalem.”

⁹ Ƀiălah aƀaơ aơ mâm ƀư may nter nhĭm huy ngăn? Mâu geh hađăch gŭ ta nklang may ƀơh? Mâu lah bunuyh sâm nchră ma may lĕ khĭt jêh Yor ri may ji dŭt hâu ngăn nâm bu du huê bu ur ji deh?

¹⁰ Hơi kon bu ur Siôn, ji hom nđêh nji hâu ngăn Tâm ban ma bu ur dôl ji deh! Yorlah may mra du luh bơh ƀon toyh Gŭ tâm mir ba, Jêh ri may mra tât ma bri Babilôn. Ƀiălah ta nây, may mra geh nau rklaih Ta nây, Brah Yêhôva mra tâm chuai may Du luh tă bơh ti phung rlăng may.

¹¹ Nôk nây, geh âk bri dak rgum băl tâm lơh đah may, Khân păng lah: “Ƀư ƀơ̆ ƀơch ăn păng Jêh ri măt he ŭch uănh ma ƀon Siôn!

¹² Ƀiălah khân păng mâu gĭt năl ôh nau mĭn Brah Yêhôva, Mâu gĭt rbăng ôh nau dăp ŭch ƀư, Yorlah Păng hŏ rgum jêh khân păng Nâm bu nchăp ba njŭn sĭt ta ntŭk bu mprah ba.

¹³ Pôri hơi kon bu ur ƀon Siôn, Dâk hom jêh ri jot plên! Yorlah Gâp mra ƀư ăn nke ay dăng nâm bu loih Nchop ay nâm bu kông; Ay mra rchiăt hăch âk phung ƀon lan Jêh ri mra nhhơr drăp ndơ geh ăn ma Brah Yêhôva, Jêh ri ndô ndơ ma Kôranh Brah tâm lam neh ntu.”

¹⁴ Pôri hơi kon bu ur phung tahan, aƀaơ aơ tâm rgum hom phung tahan ay! Khân păng hŏ nchueng jêh he. Khân păng sŏk mâng dong ta bom phung kôranh chiă uănh Israel.