Mika 3 - Nau Brah Ndu Ngơi 2023

Bu phong phung kôranh jêh ri nơm mbơh lor bơh phung Israel

¹ Gâp lah: Hơi phung kôranh Yakôb Jêh ri phung chiă uănh ngih Israel, iăt hom! Khân may mâu gĭt nau sŏng ƀơh?

² Khân may jêng phung ji nuih đah nau ueh, ŭch ma nau mhĭk; N'huk ntâu phung ƀon lan Gâp Jêh ri tah doih puăch tă bơh nting khân păng.

³ Khân may sa puăch phung ƀon lan Gâp, N'huk sŏk ntâu Jêh ri nchah ntĭng ƀư âk rlat jê̆ jê̆, Choh păng nâm bu choh puăch, Nâm bu puăch tâm glah ƀŭng.”

⁴ Nôk nây, lĕ phung kôranh nây mra mbơh sơm ma Brah Yêhôva, Ƀiălah Păng mâu ôh plơ̆ lah. Păng mra pôn muh măt bơh khân păng Yorlah khân păng hŏ ƀư jêh nau djơh mhĭk.

⁵ Aơ jêng nau Brah Yêhôva lah ma phung nơm mbơh lor Jêng phung ƀư vĭ nhhơt trong ma phung ƀon lan Gâp; Tơlah geh mbu ăn khân păng sa Pôri khân păng mbơh pô aơ: “Đăp mpăn!” Bi tơlah mbu mâu ăn moh ndơ lăp tâm mbung khân păng Pôri khân păng ndrăp nkra nau tâm lơh đah nơm mâu ăn ndơ sa.

⁶ Yor ri, nôk măng mra nkŭm tâm khân may yor nây mâu geh ôh nau tâm saơ; Nau ngo mra văch yor nây mâu geh ôh nau mbơh lor; Nar mra nhâp tâm phung mbơh lor nây Jêh ri nôk nar mra jêng ngo klĕng tâm khân păng.

⁷ Phung geh nau tâm saơ mra prêng Jêh ri phung mbơh lor bu mra ntêh rmot. Lĕ rngôch mra rdêp mbung nơm da dê Yorlah mâu geh ôh nau plơ̆ lah tă bơh Brah Ndu.

⁸ Ƀiălah bi ma gâp, gâp bêng ler ma nau dăng, Nau di jêh ri nau nuih n'hâm janh Yor Huêng Brah bơh Brah Yêhôva Gay mbơh ma Yakôb gĭt nau păng ƀư tih, Jêh ri ma phung Israel gĭt nau tih păng.

⁹ Hơi phung kôranh ngih Yakôb Jêh ri phung chiă uănh ngih Israel, iăt hom nau aơ, Khân may tâm rmot nau di Jêh ri ƀư rai yot lơi nau tâm ban.

¹⁰ Khân may sŏk mham ndâk ƀon Siôn Jêh ri sŏk nau djơh mhĭk ndâk ƀon Yêrusalem,

¹¹ Phung kôranh phat dôih yor drăp bu blŏl, Phung kôranh ƀư brah ntĭm nti yor rnoh bu nkhôm, Bi phung nơm mbơh lor ngơi mbơh lor yor nkhôm ma prăk; Jêh nây khân păng nsing ma Brah Yêhôva ngơi pô aơ: “Mâu ƀơh di Brah Yêhôva dôl gŭ ta nklang he? Nau mhĭk mâu ôh mra tât ma he!”

¹² Pônây, yor khân may Siôn bu mra chuar nâm bu lôk mir; Yêrusalem mra jêng du mbŭch rlâm rai, Jêh ri yôk ngih brah mra jêng nâm bu yôk bri krŏng!