Mika 2 - Nau Brah Ndu Ngơi 2023

Phung Israel ƀư tih jêh ri bu tâm rmal

¹ Rêh ni ngăn ma phung nchră ŭch ƀư nau mhĭk Jêh ri mĭn ŭch ƀư nau tih gŭ ta klơ gre bê̆ch păng! Tât ang ôi, khân păng ƀư ro nau ŭch mĭn Yorlah khân păng geh nau dơi ƀư tâm ti!

² Khân păng kơnh neh mir jêh ri pit in lơi, Khân păng kơnh ngih vâl jêh ri sŏk lơi. Khân păng tŭn jot bu jêh ri ngih vâl khân păng Jêng bunuyh jêh ri drăp ndơ khân păng.

³ Yor ri, Brah Yêhôva lah: “Nĕ, Gâp mĭn ŭch ƀư nau mhĭk tât tâm ƀon lan aơ Ƀiălah phung khân may mâu dơi doh ôh bơh trô ko; Khân may kŏ mâu dơi đŏng ngơk bôk Yorlah nây jêng rnôk rêh ni ngăn.

⁴ Tâm nar nây, bu mra gơm mưch ma khân may; Khân păng mra mprơ du nau mprơ nhĭm vơl pô aơ: ‘He rai yot lĕ rngôch jêh! Păng sŏk lơi drăp ndơn bơh phung ƀon lan gâp Ăn păng du bơh gâp, Sŏk neh mir gâp jêh nây tâm pă ăn ma phung ƀlăch ƀlêr.’”

⁵ Yor nây, tâm phung Brah Yêhôva tâm rƀŭn mâu mra geh ôh du huê bunuyh Gay nchroh tâm pă neh.

Nơm mbơh lor nklă

⁶ Khân păng lah pô aơ: “Khân may lơi ta mbơh lor đŏng ôh. Lơi ta mbơh lor lĕ nau pônây; Nau bêk prêng mâu ôh mra tât ma he”

⁷ Hơi ngih Yakôb! Mâm nănh ngơi pô aơ: “Brah Yêhôva roh nau nsrôih lĕ mâu?” Păng ƀư lĕ nau kơt nây ƀơh? Mâu di nau ngơi Gâp geh nau khlay Ăn ma mbu nơm chuat hăn ma nau sŏng?

⁸ Ƀiălah mhe aƀaơ pơ, phung ƀon lan Gâp du dâk nâm bu phung rlăng. Khân may hŏ nkhơng ma doh ao jâr Ndơ phung bunuyh hăn rgăn trong, Tâm ban nâm bunuyh plơ̆ sĭt tă hăn tâm lơh.

⁹ Khân may mprơh du lơi phung bu ur ƀon lan Gâp Tă bơh ngih ueh maak khân păng Sŏk lơi nau chrêk rmah Gâp Tă bơh phung kon khân păng n'ho ro.

¹⁰ Dâk hom khân may! Hăn ro! Yorlah ta aơ mâu di ôh jêng ntŭk ma khân may gŭ rlu; Păng lĕ tă nau ƀơ̆ ƀơch njŭn leo ma nau rai yot Jêh ri mra geh nau rai yot nđêh nji ngăn ngên.

¹¹ Tơlah geh bunuyh ngơi mƀruh lah pô aơ: “Gâp mra mbơh lor ma may ma nau ndrănh jêh ri ndrănh dăng,” Pôri bunuyh nây jêng nơm mbơh lor jêng di phung bơh ƀon lan aơ!

Nau ton ma phung ƀon lan Israel hôm e klen

¹² “Hơi Yakôb! N'hêl nanê̆ Gâp mra tâm rƀŭn lĕ rngôch khân may, Nanê̆ ngăn Gâp mra rgum lĕ phung Israel hôm e, Jêh ri djôt khân păng gŭ nsum tay Nâm bu phung biăp tâm ndrung, Nâm bu du phung biăp gŭ ta nklang tâm ndrêch khân păng; Ta ntŭk nây mra geh bâr bunuyh drơu drơu.

¹³ Bunuyh pơk trong mra hao panăp khân păng; Khân păng ƀư rai pêr, rduh ran lăp ta mpông ƀon; Hađăch khân păng mra hăn rgăn panăp măt khân păng, Jêh ri Brah Yêhôva mra hăn lor.