Mika 1 - Nau Brah Ndu Ngơi 2023

Nau tih jêh ri nau phat dôih ( 1:1 – 3:12 )

¹ Nau Brah Yêhôva lah ma Y-Mika, bunuyh ƀon Môrêset tâm nôk phung hađăch n'gor Yuđa jêng Y-Jôtham, Y-Ahas jêh ri Y-Hêsêkia, bơh lĕ nau păng tâm saơ ma ƀon Samari jêh ri ƀon Yêrusalem.

Nau phat dôih ma n'gor Samari

² Hơi lĕ rngôch phung ƀon lan, iăt hom! Hơi neh ntu jêh ri lĕ rngôch ndô ndơ ta klơ neh, rkêng tôr iăt hom! Kôranh Brah Yêhôva tă bơh ngih kloh ueh Păng, Dăn Kôranh Brah mbơh nau tâm rdâng đah khân may!

³ Yorlah ri, Brah Yêhôva du luh tă bơh ntŭk Păng Jŭr gŭ jêh ri jot ta klơ lĕ ntŭk prêh tâm neh ntu.

⁴ Lĕ yôk mra lêk hoch tâm dâng Păng, Lĕ rlŭng mra đang Nâm bu jrêng sŭt gŭ panăp ŭnh, Nâm bu dak hoch jŭr sop.

⁵ Lĕ rngôch nau nây jêng yor nau Yakôb ƀư tih Jêh ri yor nau tih ngih Israel. Moh nau Yakôb ƀư tih? Mâm mâu di jêng ƀon Samari? Moh ndơ lĕ ntŭk prêh bơh phung Yuđa? Mâm mâu di jêng ƀon Yêrusalem?

⁶ Yor ri, Gâp mra ƀư ăn ƀon Samari nâm bu du mbŭch ndơ lĕ chah tâm ndrêch, Nâm bu ntŭk tăm tơm krăk ƀâu Jêh ri Gâp mra nkhŭt ƀrĭk lŭ păng tâm rlŭng, Ăn lĕ rngôch mbon ngih mpơl padih.

⁷ Lĕ rngôch rup trah păng bu mra dong nchah, Lĕ rngôch ndơ păng nhhơr bu mra su tâm ŭnh; Jêh ri Gâp mra ƀư rai lơi lĕ rngôch ƀhiau rup brah păng. Yorlah păng hŏ bun prăp lĕ ndơ ma rnoh nkhôm tă bơh bu ur văng tĭr; Yor ri, lĕ ndơ nây mra dơi dŏng tay ƀư rnoh nkhôm ăn ma bu ur văng tĭr êng.

Mrô nal ma phung ƀon toyh Yuđa

⁸ Yor nau nây, gâp mra nhĭm nhhiăng jêh ri nter vơl, Doh săk hưl jêh ri hăn jâng dơm; Gâp mra kuăl lŭng nter nâm bu so bri Jêh ri rđêng nđor nâm bu sĭm ôtrus.

⁹ Yorlah ntŭk têl rmanh păng mâu dơi bah ôh; Păng trêng tât n'gor Yuđa tâm ban lĕ, Tât ta mpông pêr mpôl băl gâp, Nây jêng tât ƀon Yêrusalem.

¹⁰ Lơi ta nkoch ôh nau tât aơ tâm ƀon Gat! Lơi ta nhĭm nhhiăng ôh! Ta ƀon Bet-Lêaphra, Rlĭ rlang hom tâm neh muy.

¹¹ Hơi phung gŭ tâm ƀon Saphir, Gŭ rhôk hom dơn nau bêk prêng dĭng hăn rgăn! Phung gŭ tâm ƀon Saanan Mâu chuat du luh ôh. Phung ƀon Bet-Êsel nter nhĭm, Ƀư ma khân may roh ntŭk mbin nsing.

¹² Phung gŭ ta ƀon Marôt ƀrơn nuih n'hâm Dôl kâp gân nau ueh, Yorlah nau rêh ni jŭr tă bơh Brah Yêhôva Hŏ tât ta mpông ƀon Yêrusalem.

¹³ Hơi phung gŭ ta ƀon Lakis, Sŏk hom seh nchuăt gơnh kât ta ndeh! Tă bơh may yơh ntơm Ƀư ăn kon bu ur ƀon Siôn ƀư tih, Yorlah nau tih mhĭk ma phung Israel Hŏ saơ jêh tâm may.

¹⁴ Yor ri, may mra ăn ndơ Tâm nkhah đah ƀon Môrêset-Gat! Lĕ ngih vâl bơh ƀon Aksip Mra ndơm ma phung hađăch Israel.

¹⁵ Hơi phung gŭ tâm ƀon Marêsa, Gâp mra leo du huê bunuyh tâm tŭn mpet khân may ƀư ma khân may; Nau chrêk ma lơp phung Israel Mra tât ta ƀon Adulam.

¹⁶ Ƀư plưn hom bôk jêh ri poih ăn pler, Yorlah phung kon may ŭch rŏng; Di jêh, ƀư plưn hom ma may nâm bu klang, Yorlah khân păng bu nhŭp da dê hăn jêng bu nă tă bơh may!