Mathay 8 - Nau Brah Ndu Ngơi 2023

Brah Yêsu ƀư bah nau ji phŭng

¹ Tơlah Brah Yêsu trŭnh tă bơh yôk, geh âk bunuyh hăn tĭng Păng.

² Aơ, geh du huê bunuyh phŭng sa văch jêh ri chon mon tra năp Brah Yêsu jêh ri lah: “Ơ Kôranh Brah, tơlah May ŭch, May dơi ƀư kloh gâp.”

³ Brah Yêsu yơr ti pah ta bunuyh nây jêh ri lah: “Gâp ŭch, kloh hom.” Ƀât lât ta nây, bunuyh phŭng sa bah ro.

⁴ Brah Yêsu ntĭnh: “Njrăng hom, lơi nkoch bri nau aơ ma bu ôh, ƀiălah hăn hom mpơl may nơm ma kôranh ƀư brah jêh ri nhhơr ndơ ƀư brah tĭng nâm nau vay Y-Môis ntăm, tâm ban du nau mbơh ma lĕ rngôch bunuyh.”

Brah Yêsu ƀư bah oh mon du huê kôranh tahan

⁵ Lah Brah Yêsu lăp ta ƀon Kapernum, geh du huê kôranh tahan văch gay vơl dăn Păng:

⁶ “Ơ Kôranh, oh mon gâp ji rvĕn, gŭ bê̆ch tâm ngih, ji hâu ngăn.”

⁷ Brah Yêsu lah: “Gâp mra hăn, ƀư bah ma păng.”

⁸ Kôranh tahan plơ̆ lah: “Ơ Kôranh Brah, gâp mâu khư rom May lăp tâm ngih, knŏng dăn Kôranh Brah ngơi du tong ri mơ oh mon gâp mra dơi bah.

⁹ Yorlah gâp nơm gŭ tâm dâng nau dơi bunuyh êng, gâp geh đŏng phung tahan tâm dâng gâp; gâp lah ma du huê aơ: ‘Hăn hom!’ păng hăn ro; lah ma du huê êng: ‘Văch hom!’ păng văch ro; jêh ri lah ma oh mon gâp: ‘Ƀư nau aơ!’ păng ƀư ro.”

¹⁰ Tăng kơt nây, Brah Yêsu hih rhâl jêh ri lah ma phung tĭng Păng pô aơ: “Nanê̆, Gâp lah ma khân may, Gâp ê hŏ mâp saơ ôh du huê bunuyh tâm bri Israel geh nau chroh nâm bu pônây.

¹¹ Gâp lah ma khân may gĭt: Bơh mpeh luh nar, nhâp nar mra geh âk bunuyh văch gŭ sông sa ndrel ma Y-Abraham, Y-Isăk, jêh ri Y-Yakôp tâm ƀon bri hađăch klơ trôk.

¹² Ƀiălah phung kon tâm ƀon bri hađăch bu mra mƀăr khân păng tâm ntŭk ngo padih, ta nây mra geh nau nhĭm nhhiăng jêh ri nau rket sêk.”

¹³ Jêh ri Brah Yêsu lah ma kôranh tahan: “Hăn plơ̆ sĭt hom! May chroh nâm nây, mra dơi nâm pônây.” Ta mông nây, oh mon dơi bah.

Brah Yêsu ƀư bah po bu ur Y-Pêtrôs jêh ri âk bunuyh êng êng

¹⁴ Jêh nĕ, Brah Yêsu lăp tâm ngih Y-Pêtrôs, saơ po bu ur geh nau ji kop, bê̆ch ta klơ sưng bê̆ch.

¹⁵ Păng pah ti păng, nau duh du luh bơh păng; jêh nây păng dâk gay pah kan ma Păng.

¹⁶ Tât kêng măng, bu njŭn leo ma Brah Yêsu âk bunuyh brah mhĭk lơh; Păng mprơh brah mhĭk ma nau Păng ngơi jêh ri ƀư bah đŏng lĕ rngôch phung ji kuet.

¹⁷ Tâm ban pônây, nau nơm mbơh lor Y-Êsai: “Păng yơh tuy jêh nau ji kuet he, Jêr ri anh lĕ rngôch nau ji he,” hŏ tât di ngăn.

Nau di gay tĭng Brah Yêsu

¹⁸ Tơlah Brah Yêsu saơ âk bunuyh gŭ jŭm, Păng ntrŭnh nau ntăm gay hăn rgăn kơh tê̆ dak ri.

¹⁹ Du huê kôranh nchih samƀŭt hăn tât gay lah ma Păng: “Hơi Nơm Nti, ta ntŭk Nơm Nti hăn, gâp mra hăn tĭng ta nây.”

²⁰ Brah Yêsu plơ̆ lah: “Phung mpik geh trôm, phung sĭm klơ trôk geh rsuăn, ƀiălah Kon Bunuyh mâu geh ntŭk dâm bôk.”

²¹ Du huê oh mon êng lah ma Păng: “Ơ Kôranh Brah, dăn ăn gâp hăn plơ̆ sĭt gay tâp mbơ̆ gâp lor.”

²² Ƀiălah Brah Yêsu lah: “Tĭng hom Gâp, ăn bunuyh khĭt tâp bunuyh khĭt khân păng nơm.”

Nau buay phŭt sial dak mƀŭt

²³ Brah Yêsu ncho plŭng, phung oh mon tĭng Păng.

²⁴ Ƀât lât, geh phŭt sial ktang ngăn ta dak mƀŭt kŏ tât rbuh dak ler tâm trôm plŭng; ƀiălah Brah Yêsu gŭ bê̆ch.

²⁵ Phung oh mon rlay Păng jêh ri kuăl huy: “Ơ Kôranh Brah, tâm rklaih hên! He mra khĭt yơh!”

²⁶ Brah Yêsu lah: “Hơi phung geh djê̆ nau chroh ri, mâm ƀư khân may klach?” Păng dâk ro buay sial jêh ri dak mƀŭt, khân păng nsrŭng ro jêh ri rngân njup.

²⁷ Phung oh mon hih rhâl hâu ngăn, ôp ndrăng khân păng: “Mbu moh bunuyh aơ nđâp ma sial jêh ri dak mƀŭt tông nau Păng ntrŭnh da dê?”

Bar hê bunuyh brah mhĭk lăp ta ƀon Gađara

²⁸ Tơlah Brah Yêsu rgăn tât ta kơh kăl tê̆, lăp tâm n'gor phung Gađara, Păng mâp bar hê bunuyh brah mhĭk lăp luh tă bơh môch; khân păng janh ƀai ngăn, kŏ tât mâu geh bunuyh janh prot găn ta trong nây ôh.

²⁹ Khân Păng lŭng nter: “Ơ Kon Brah Ndu, moh nau hên geh đah May? Di lĕ May tât ta aơ ŭch tâm rmal hên êlor tât nar tâm nal?”

³⁰ Nôk nây ngai djê̆ đah nĕ, geh phung sŭr gŭ sa mpa âk ngăn.

³¹ Phung brah mhĭk vơl dăn ma Brah Yêsu: “Tơlah May mprơh hên, ăn ma hên lăp tâm phung sŭr ta ri.”

³² Brah Yêsu đă: “Du hom!” Phung brah mhĭk luh du bar hê bunuyh nây jêh ri khân jêh ri lăp tâm phung sŭr ro. Ƀât lât lĕ rngôch sŭr du tă bơh kơh sop nsăt jŭr tâm dak mƀŭt, khĭt ngâm lĕ rngôch.

³³ Phung bunuyh chiăp sŭr nây nchuăt du, sĭt tâm ƀon, nkoch tay lĕ nau nây, nđâp ma nau tât ma phung bar hê brah mhĭk lăp.

³⁴ Lĕ rngôch bunuyh ƀon lan nây hăn tâm mâp ma Brah Yêsu; tơlah saơ jêh Păng pôri vơl dăn Păng luh du tă bơh nkual neh khân păng nơm.