Mathay 7 - Nau Brah Ndu Ngơi 2023

Nau phat dôih

¹ “Lơi phat dôih bu gay khân may mâu mra geh nau phat dôih.

² Yorlah khân may phat dôih bu pô ri bu mra phat dôih khân may tâm ban lĕ, khân may veh ma ndah âk pô ri khân păng ăt mra veh ma khân may lĕ.

³ Mâm ƀư may saơ ndruyh tâm măt oh nâu may, ƀiălah mâu saơ ôh mâng ntur tâm trôm măt may nơm?

⁴ Mâm ƀư may lah ma oh nâu: ‘Ăn gâp sŏk lơi ndruyh tă bơh măt may,’ tâm nôk mâng ntur hôm tâm trôm măt may?

⁵ Hơi bunuyh nuih n'hâm nklă! Lor lơn sŏk hom mâng ntur tă bơh trôm măt may, jêh nây may saơ rah vah gay sŏk ndruyh bơh măt oh nâu.”

Nau ntĭm nti êng êng

⁶ “Lơi ăn ndơ kloh ma so ôh, mâu lĕ mƀăr lŭ rmah khlay ma sŭr, klach lah khân păng jot plên tâm dâng jâng, jêh ri plơ̆ kăp hêk khân may.

⁷ Dăn hom, mra dơi geh; joi hom, mra saơ; goh hom, mpông mra pơk ăn ma khân may.

⁸ Yorlah mbu nơm dăn mra dơi geh; mbu nơm joi mra saơ, jêh ri mbu nơm goh ri mơ mpông mra pơk.

⁹ Mbu tâm khân may, tơlah kon păng dăn piăng let ƀiălah ăn lŭ?

¹⁰ Mâu lah kon dăn ka, ƀiălah ăn bêh ƀơh?

¹¹ Kơt nây, tơlah khân may jêng bunuyh mhĭk, hôm gĭt ăn lĕ ndơ ueh ma phung kon khân may nơm, rlau lơn ma Mbơ̆ khân may gŭ klơ trôk mâu mra ăn ndơ ueh ma mbu nơm dăn ma Păng mâm ƀư?

¹² Pôri yơh, moh nau khân may ŭch bu ƀư ma khân may, ƀư hom nau nây ma khân păng, yorlah nây jêng nau vay jêh ri nau mbơh lor.

¹³ Lăp hom tâm mpông huêt, yorlah mpông huy jêh ri trong toyh njŭn leo ma nau rai yot, jêh ri geh âk bunuyh lăp ta trong nây.

¹⁴ Ƀiălah mpông pêr huêt jêh ri trong jê̆ njŭn leo ma nau rêh, djê̆ bunuyh saơ ntŭk nây.”

Nau gĭt năl phung mbơh lor nklă

¹⁵ “Njrăng hom ma phung nơm mbơh lor nklă, khân păng mra văch ma khân may njêng nâm bu biăp, ƀiălah tâm trôm khân păng jêng so bri vay kăp hêk.

¹⁶ Khân may gĭt năl khân păng ta play khân păng. Mâp geh lĕ bunuyh pĕ play krăk ƀâu ta pŭm lok, mâu lah play rvi ta pŭm rtau lok?

¹⁷ Pôri, tơlah tơm si ueh geh play ueh; bi tơm si mhĭk geh play mhĭk.

¹⁸ Du tơm si ueh mâu dơi play mhĭk ôh, du tơm si mhĭk mâu dơi lĕ luh play ueh.

¹⁹ Ăp tơm si mâu geh play ueh, bu mra kăl lơi jêh ri mƀăr lơi păng tâm ŭnh.

²⁰ Pôri, ta kao play, khân păng mra dơi gĭt năl khân păng.”

²¹ “Mâu di ôh mbu nơm lah ma Gâp: ‘Ơ Kôranh Brah, ơ Kôranh Brah’, mra lăp tâm ƀon bri hađăch klơ trôk; ƀiălah knŏng mbu nơm ƀư tĭng nâm nau Mbơ̆ Gâp gŭ ta klơ trôk ŭch.

²² Tâm nar nây, âk bunuyh mra lah ma Gâp: ‘Ơ Kôranh Brah, ơ Kôranh Brah! Di đŏng hên ngơi mbơh lor jêh tâm amoh May, hên mâp mprơh jêh brah mhĭk tâm amoh May, hên mâp ƀư âk nau mbên khlay tâm amoh may ƀơh?’

²³ Mông nây, Gâp mra lah rah vah ma khân păng: ‘Hơi phung ƀư mhĭk, du hom tă bơh Gâp, Gâp mâu mâp gĭt năl khân may ôh!’ ”

Ăn ƀư tĭng nâm nau Kôranh Brah ngơi

²⁴ “Pôri, mbu nơm tăng nau Gâp ngơi jêh ri ƀư tĭng jêng nâm bu du huê bunuyh blau mĭn, ƀư ngih păng ta klơ lŭ toyh.

²⁵ Nđâp tơlah geh trôk mih, dak lêng lip tât, sial khôm ktang, ngih nây ăt dâk nâp, yorlah bu ƀư păng ta klơ lŭ toyh.

²⁶ Bi mbu nơm tăng nau Gâp ngơi, ƀiălah mâu ƀư tĭng ôh, jêng nâm bu du huê bunuyh rluk mâl, ƀư ngih păng ta klơ choih.

²⁷ Geh mih, dak lêng lip tât, sial khôm ktang mra ƀư ma ngih nây rlâm, roh rai âk ngăn.”

²⁸ Tơlah Brah Yêsu ngơi nau nây lôch jêh, phung ƀon lan hih rhâl ngăn ma nau Păng nti;

²⁹ yorlah Păng nti ma nau dơi toyh, mâu di nâm bu phung kôranh nchih samƀŭt ôh.