Mathay 5 - Nau Brah Ndu Ngơi 2023

Nau Ueh maak ngăn

¹ Dôl saơ phung ƀon lan âk, Brah Yêsu hăn hao yôk. Tơlah Păng gŭ, phung oh mon văch êp Păng.

² Brah Yêsu pơk nau ngơi nti lah pô aơ:

³ “Ueh maak ngăn ma phung o ach tâm huêng nuih n'hâm, Yorlah ƀon bri hađăch klơ trôk prăp ăn ma khân păng!

⁴ Ueh maak ngăn ma phung nhĭm rngot, Yorlah mra dơn nau bonh leng!

⁵ Ueh maak ngăn ma phung dêh rhêt, Yorlah mra sŏk dơn lĕ neh ntu!

⁶ Ueh maak ngăn ma phung ji ngot ji hir nau sŏng srăng, Yorlah mra dơi hơm tŏng!

⁷ Ueh maak ngăn ma phung geh nuih n'hâm yô̆ nđach, Yorlah mra dơn nau yô̆ nđach!

⁸ Ueh maak ngăn ma phung geh nuih n'hâm kloh ueh, Yorlah mra saơ Brah Ndu!

⁹ Ueh maak ngăn ma phung ƀư nau đăp mpăn, Yorlah mra kuăl jêng kon Brah Ndu!

¹⁰ Ueh maak ngăn ma phung bu ƀư mhĭk yor nau sŏng srăng, Yorlah ƀon bri hađăch klơ trôk prăp ma khân păng!

¹¹ Ueh maak ngăn ma khân may tơlah yorlah Gâp bu suai rak, ƀư mhĭk, ngơi nchơt âk ntil nau mhĭk ma khân may.

¹² Maak răm hom, yorlah nau nkhôm ma khân may ta klơ trôk jêng toyh ngăn; yorlah nơm mbơh lor kăl e khân may bu hŏ ƀư mhĭk kơt nây.”

Boh jêh ri Nau ang

¹³ Khân ay may jêng boh ma neh ntu, ƀiălah tơlah boh mâu hôm kah ôh, mâm bu mra ƀư kah păng? Păng mâu hôm khlay ôh, knŏng mƀăr lơi padih jêh ri bu jot plên ma jâng.

¹⁴ Khân ay may jêng nau ang ma neh ntu. Du ƀon toyh ƀư ta klơ yôk mâu dơi nkŭm ndâp ôh.

¹⁵ Bu mâu mpoh ôh ŭnh kađen jêh ri n'gân tâm dâng mlâm thŭng, ƀiălah bu n'gân păng ta klơ jâng kađen gay păng sol ang ma lĕ rngôch bunuyh tâm ngih.

¹⁶ Đŏng kơt nây, nau ang khân ay may ăn nchrat ang tra năp lĕ rngôch bunuyh, gay khân păng saơ kan ueh khân ay may jêh ri mât ton ma Mbơ̆ khân ay may gŭ ta klơ trôk.

Nau vay jêh ri Nau mbơh lor

¹⁷ “Lơi mĭn ôh Gâp văch ngroh lơi nau vay mâu lah nau mbơh lor; Gâp văch, mâu di gay ngroh lơi ôh ƀiălah gay ƀư lôch jêh.

¹⁸ Yorlah nanê̆, Gâp lah ma khân ay may, êlor trôk jêh ri neh ntu ê hŏ rlau, mâu mra roh du ntil mâu lah du rplay samƀŭt dŭt jê̆ tâm nau vay ôh, kŏ tât lĕ rngôch nau nây mra dơi lôch jêh.

¹⁹ Yor nây, mbu nơm chalơi du ntil dŭt jê̆ tâm lĕ nau vay aơ jêh ri nti ma bu ƀư kơt nĕ, bu mra kuăl păng dŭt jê̆ tâm ƀon bri hađăch klơ trôk; ƀiălah mbu nơm tông prăp ma lĕ nau vay aơ jêh ri nti ma bu, mra dơi uănh jêng toyh lơn tâm ƀon bri hađăch klơ trôk.

²⁰ Yorlah Gâp lah ma khân ay may gĭt: Tơlah nau sŏng srăng khân ay may mâu rlau nau sŏng srăng phung kôranh nchih samƀŭt jêh ri phung Pharisi, khân ay may mâu mra lăp ôh tâm ƀon bri hađăch klơ trôk.

²¹ Khân may tăng jêh nau nti ma phung ơm pô aơ: ‘Lơi nkhĭt bunuyh; tơlah mbu nơm nkhĭt bunuyh mra dơn nau bu phat dôih.’

²² Ƀiălah Gâp lah ma khân ay may: Mbu nơm ji nuih ma oh nâu păng mra dơn nau bu phat dôih; mbu nơm suai rak ma oh nâu păng jêng ‘nau rluk’ khư dơn Mpôl Kôranh Phat Dôih sek uănh; mbu nơm suai rak ma oh nâu păng jêng brŭt ndrăng khư dơn nau rmal tâm ndrung ŭnh.

²³ Pôri yơh, tơlah may djôt leo ndơ nhhơr ma Brah Ndu ta nơng ƀư brah, ƀiălah kah gĭt oh nâu may geh nau mhĭk đah may,

²⁴ ăn ndơ nhhơr panăp nơng ƀư brah, plơ̆ sĭt ƀư đăp mpăn đah oh nâu may lor, jêh nây văch hom nhhơr ndơ ƀư brah.

²⁵ Dôl may hăn trong ndrel ma nơm phong ma may, gơnh ro ƀư hom đăp mpăn đah bunuyh nây; lah mâu, bunuyh nây mra jao may ma kôranh phat dôih, kôranh phat dôih jao may ma kôranh ndrung, jêh ri bu mra krŭng may.

²⁶ Nanê̆, Gâp lah ma may, may mâu mra luh ôh tă bơh ndrung kŏ tât nôk may mplơ̆ sĭt rĭng ma prăk nglĕ dŭt.

²⁷ Khân may tăng jêh nau nti: ‘Lơi ƀư tih văng tĭr.’

²⁸ Ƀiălah Gâp lah ma khân may gĭt: Mbu nơm uănh ma bu ur ma nau kơnh, pôri tâm nuih n'hâm păng hŏ ƀư tih văng tĭr jêh đah bu ur nây.

²⁹ Tơlah măt pa ma ƀư ăn may tâm nau tih, rvek jêh ri mƀăr lơi păng ngai! Yorlah ueh lơn may roh du kô̆ tâm săk jăn đah ma lĕ săk jăn mƀăr tâm ndrung ŭnh.

³⁰ Tơlah ti ma may ƀư ma may ƀư tih, sreh hom jêh ri mƀăr lơi păng ngai! Yorlah ueh lơn may roh du kô̆ săk jăn đah ma lĕ săk jăn hăn lăp ndrung ŭnh.

³¹ Geh nau nti pô aơ: ‘Mbu chalơi ur păng, ăn hom păng du pŏk samƀŭt nau chalơi ur sai.’

³² Ƀiălah Gâp lah ma khân may: Mbu nơm chalơi ur păng mâu di yor nau văng tĭr jêng ƀư ma ur păng plơ̆ jêng bunuyh văng tĭr jêh, bi mbu nơm gŭ bu ur bu hŏ chalơi jêh jêng bunuyh ƀư tih nau văng tĭr.

³³ Khân may hŏ tăng jêh nau nti ma phung ơm pô aơ: ‘Lơi rlăm ôh nau ton, ăn may djôt prăp nau ton nŭm rĭng đah Kôranh Brah.’

³⁴ Ƀiălah Gâp lah ma khân may: Lơi ton ôh. Lơi ton đah trôk, yorlah trôk jêng sưng hađăch Brah Ndu;

³⁵ lơi ton đah neh, yorlah jêng rnơl Brah Ndu chrong jâng; lơi ton đah ƀon Yêrusalem, yorlah ƀon nây jêng ƀon ma Hađăch Toyh.

³⁶ Mâu đŏng ton đah bôk may nơm, yorlah may mâu dơi ôh njêng nglang mâu lah krăk tâm du brai sŏk.

³⁷ Ƀiălah ăn may ngơi: ‘Di, di’ mâu lah ‘Mâu, mâu’ jêng tŏng. Jêh bi nau ntop moh nau jêng luh tă bơh brah mhĭk.

³⁸ Khân may tăng jêh nau bu nti pô aơ: ‘Măt ntrok măt, sêk ntrok sêk.’

³⁹ Ƀiălah Gâp lah ma khân may: Lơi tâm rdâng ôh đah bunuyh mhĭk. Ƀiălah, tơlah bu tap bom pa ma, ăn bom pa chiau ma păng tap tâm ban lĕ;

⁴⁰ tơlah bu ŭch phong may gay sŏk ao padih, ăn păng sŏk nđâp ma ao tâm trôm đŏng;

⁴¹ tơlah bu nchâp may hăn du vang, ăn may hăn đah păng bar vang.

⁴² Mbu dăn, ăn hom; mbu manh ndơ may lơi ta dun.

⁴³ Khân may tăng jêh nau nti pô aơ: ‘Rŏng hom bunuyh chiau meng, jêh ri tâm rmot hom bunuyh rlăng đah may.’

⁴⁴ Ƀiălah Gâp lah ma khân may: Rŏng hom bunuyh rlăng đah may jêh ri mbơh sơm hom ma phung ƀư mhĭk ma khân may

⁴⁵ gay ma khân may plơ̆ jêng phung kon ma Mbơ̆ khân may gŭ ta klơ trôk, yorlah Păng ƀư ăn nar luh nchrat ang ma phung djơh mhĭk nđâp ma phung ueh, ăn dak mih ma phung sŏng srăng nđâp ma phung kue.

⁴⁶ Tơlah khân may rŏng knŏng phung rŏng ma khân may, moh nau nkhôm khân may geh? Mâu di hĕ phung riu pi gŭ ngao nau nâm bu pônây?

⁴⁷ Tơlah khân may knŏng rom oh nâu khân may dơm, moh nau khân may ƀư rlau lơn ma phung êng? Mâu di hĕ phung padih gŭ ngao nâm bu pônây?

⁴⁸ Pôri ăn khân may jêng bunuyh ueh n'hêl nanê̆ nâm bu Mbơ̆ khân may klơ trôk jêng ueh nanê̆ ngăn.”