Mathay 3 - Nau Brah Ndu Ngơi 2023

Nau ndrăp pah kan ma Brah Yêsu ( 3:1 – 4:11 ) Nau Y-Yôhan-Ƀaptist pah kan

¹ Tâm rnôk nây, Y-Yôhan-Ƀaptist nti lah tâm bri rdah n'gor Yuđa pô aơ:

² “Rmal hom nau tih, yorlah ƀon bri hađăch klơ trôk dăch tât jêh!”

³ Y-Yôhan jêng bunuyh dơi nơm mbơh lor Y-Êsai hŏ mbơh jêh, dôl lah pô aơ: “Geh bâr bunuyh kuăl nter tâm bri rdah: ‘Nkra hom trong ma Kôranh Brah, Ƀư sŏng lĕ trong Păng.’ ”

⁴ Y-Yôhan nsoh ao rsau seh samô, vân rse bŭt ntâu, sa krah nsăt jêh ri dak sŭt bri.

⁵ Phung ƀon lan ta ƀon Yêrusalem, lam n'gor Yuđa jêh ri lĕ n'gor văr jŭm dak krong Yurdan hăn ma păng da dê.

⁶ Khân păng mbơh nau tih jêh ri păng ƀư ƀaptem ma khân păng tâm dak krong Yurdan.

⁷ Dôl saơ âk phung Pharisi jêh ri phung Sađusê văch dơn nau ƀaptem, Y-Yôhan lah ma khân păng pô aơ: “Hơi mpôl ntil bêh rmâng, mbu mbơh jêh ma khân may gĭt gay nchuăt du nau ji nuih dăch tât?

⁸ Pôri ăn play hom tâm di jêh ma nau tâm rmal nau tih,

⁹ jêh ri lơi mĭn êng pô aơ: ‘Y-Abraham jêng chô yau hên’; yorlah gâp mbơh ma khân ay may gĭt pô aơ Brah Ndu klăp lah ƀư ăn lĕ grăp lŭ aơ plơ̆ jêng kon sau ma Y-Abraham.

¹⁰ Du mlâm sung hŏ dơm jêh ta reh tơm si, si mâu geh play ueh bu mra kăl lơi jêh ri klŭp mƀăr tâm ŭnh.

¹¹ Gâp ƀư ƀaptem ma khân may ma dak gay rmal nau tih; ƀiălah Nơm văch pakơi gâp, nau dơi lơn ma gâp, gâp mâu khư ôh doh rse ntâu jot Păng. Păng mra ƀư ƀaptem ma khân may ma Brah Huêng Ueh jêh ri ma ŭnh.

¹² Păng djôt dông nsiăng kloh plên ba Păng nơm, jêh nây rgum ba tâm jay; bi njŏk rhe su lơi tâm ŭnh mâu blau nhhât.”

Brah Yêsu dơn ƀư ƀaptem

¹³ Nôk nây, Brah Yêsu văch tă bơh n'gor Galilê hăn ta Y-Yôhan ta dak krong Yurdan gay păng ƀư ƀaptem ăn Brah Yêsu.

¹⁴ Ƀiălah Y-Yôhan buay Păng jêh ri lah pô aơ: “Gâp yơh ŭch ăn May ƀư ƀaptem ma gâp, mâm ƀư May văch ma gâp?”

¹⁵ Brah Yêsu plơ̆ lah: “Aƀaơ aơ ƀư hom, yorlah phung he ŭch ƀư lôch lĕ rngôch nau sŏng srăng.” Pôri, Y-Yôhan tông nau Păng lah.

¹⁶ Dôl geh ƀaptem jêh, dôl Brah Yêsu dâk tă bơh dak, uănh ri, lĕ ndâr trôk pơk mpơl, Păng saơ Brah Huêng Ueh Brah Ndu jŭr nâm bu sĭm plŭk drâm ta klơ Păng.

¹⁷ Aơ, geh bâr ngơi tă bơh trôk lah: “Aơ jêng Kon Gâp rŏng ngăn ngên, tâm Păng Gâp geh nau maak ngăn.”