Mathay 28 - Nau Brah Ndu Ngơi 2023

Brah Yêsu dâk rêh tay

¹ Lôch jêh nar saƀat, dôl ƀhit ang ôi nar tal nguay tâm pơh, H'Mari Mađala jêh ri H'Mari êng hăn chop môch.

² Ri, nau n'găr neh ntu hâu ngăn, yorlah du huê tông mpăr Kôranh Brah jŭr tă bơh klơ trôk, rlă lŭ jêh ri gŭ ta klơ.

³ Tông mpăr ral nâm bu lơp nglaih jêh ri ao nglang nâm bu pler.

⁴ Phung tahan gak klach krit ngăn, râm nsâr jêh ri jêng nâm bu bunuyh khĭt.

⁵ Ƀiălah tông mpăr lah ma phung bu ur nây: “Lơi klach ôh, yorlah gâp gĭt khân ay joi Brah Yêsu, Nơm bu pâng kđĭn ta si tâm rkăng.

⁶ Păng mâu hôm gŭ ta aơ ôh, Păng hŏ dâk rêh tay jêh, nâm bu Păng lah jêh. Văch uănh hom ntŭk njor Păng.

⁷ Hăn hom gơnh, lah ma phung oh mon Păng gĭt pô aơ Păng hŏ dâk rêh tay jêh tă bơh nau khĭt, jêh ri aơ, Păng dôl hăn lor ma khân may tâm n'gor Galilê. Ta nây, khân may mra tâm mâp Păng. Nây jêng nau gâp mbơh ma khân may.”

⁸ Bar hê bu ur nây ndil ndal du tă bơh môch, nđâp klach nđâp răm maak ngăn, nchuăt hăn mbơh nau mhe mhan nây ma phung oh mon Păng.

⁹ Ta nây ro, Brah Yêsu tâm mâp đah khân păng jêh ri lah: “Mbah ma khân ay!” Khân păng văch dăch, ut ta jâng Păng jêh ri yơk mbah Păng.

¹⁰ Brah Yêsu lah ma khân păng: “Lơi klach ôh, hăn hom mbơh ma phung oh nâu Gâp hăn tât ta n'gor Galilê, ta nây yơh khân păng mra saơ Gâp.”

Phung tahan gak nkoch bri jêh ri nau lư tâm neh ntu

¹¹ Dôl bar hê bu ur aơ hăn ta trong, geh ƀaƀă phung tahan gak chiă môch hăn lăp tâm ƀon, nkoch bri ma phung kôranh ƀư brah toyh lĕ rngôch nau hŏ tât jêh.

¹² Jêh phung aơ tâm rgum gay tâm nchră đah phung bu ranh, khân păng ăn prăk âk ngăn ma phung tahan,

¹³ jêh ri ntĭnh: “Lah hom pô aơ ‘phung oh mon păng văch dôl măng, dôl hên bê̆ch, jêh ri sŏk ntŭng săk.’

¹⁴ Tơlah kôranh toyh chiă uănh tăng nau nây, hên mra rblang ma păng, jêh ri king ma khân may.”

¹⁵ Pôri phung tahan sŏk dơn prăk jêh ri ƀư tĭng nâm nau khân păng ntĭnh. Nau nây tăng lư tâm phung Yuđa tât ma nar aơ.

Brah Yêsu tâm mpơl ta n'gor Galilê

¹⁶ Phung jât ma nguay nuyh oh mon hăn ta n'gor Galilê, ta yôk Brah Yêsu ntĭm jêh ma khân păng.

¹⁷ Lah saơ jêh Brah Yêsu, khân păng yơk mbah ma Păng. Ƀiălah ƀaƀă geh nau đing.

¹⁸ Brah Yêsu hăn tât jêh ri lah ma khân păng pô aơ: “Lĕ rngôch nau dơi ta klơ trôk jêh ri ta neh ntu hŏ jao jêh ma Gâp.

¹⁹ Pôri, hăn hom ƀư ăn lĕ rngôch ntil mpôl bunuyh dơi jêng phung oh mon Gâp, amoh Kôranh Brah Ndu Mbơ̆, Kôranh Brah Ndu Kon, jêh ri Kôranh Brah Huêng Ueh ƀư ƀaptem ma khân păng

²⁰ jêh ri ntĭm nti ăn khân păng djôt prăp lĕ nau Gâp ntăm jêh ma khân may. Jêh ri aơ, Gâp hôm gŭ ndrel ma khân may ƀaƀơ kŏ tât nar lôch.”