Mathay 27 - Nau Brah Ndu Ngơi 2023

¹ Tât ôi, lĕ rngôch phung kôranh ƀư brah toyh jêh ri phung bu ranh phung ƀon lan tâm nchră tâm rdâng đah Brah Yêsu gay nkhĭt lơi Păng.

² Khân păng chăp Păng, njŭn leo jao Păng ma kôranh toyh chiă uănh Pilat.

Nau Yuđas khĭt

³ Nôk Y-Yuđas, nơm tâm rdâng Păng, saơ bu rmal jêh Brah Yêsu geh nau nduyh tôr, djôt leo pe jât rêl prăk mplơ̆ tay ma phung kôranh ƀư brah toyh jêh ri ma phung bu ranh,

⁴ jêh ri lah pô aơ: “Gâp hŏ ƀư tih jêh yor jao mham mâu geh nau tih!” Ƀiălah khân păng plơ̆ lah: “Kan nây moh nau geh đah hên? Nây jêng nau may nơm.”

⁵ Y-Yuđa klŭp lơi prăk tâm ngih brah, jêh du luh, hăn yông trô ko păng nơm.

⁶ Ƀiălah phung kôranh ƀư brah toyh dônh prăk nây jêh ri lah: “Dơm prăk aơ tâm ntŭk prăp prăk jêng mâu di nau vay ôh, yorlah jêng rnoh mham.”

⁷ Yor ri, khân păng tâm nchră ndrăng khân păng dŏng prăk nây rvăt mir nơm mon glah gay tâp phung bu năch.

⁸ Yorlah nau nây mir aơ dơi rnha jêng Mir Mham kŏ tât ta nar aơ.

⁹ Kơt nây, nau nơm mbơh lor Y-Yêrêmi lah dơi tât di ngăn: “Khân păng sŏk jêh pe jât rêl prăk, jêng rnoh du huê bunuyh phung Israel veh jêh ma Păng,

¹⁰ jêh ri sŏk prăk nây rvăt mir nơm mon glah, nâm bu Kôranh Brah ntăm jêh ma gâp.”

Brah Yêsu tanăp Pilat

¹¹ Nôk nây, Brah Yêsu dâk tanăp kôranh toyh chiă uănh Pilat; jêh ri kôranh toyh chiă uănh ôp: “Di lĕ may jêng hađăch phung Yuđa?” Brah Yêsu lah: “May lah jêh nau nây.”

¹² Ƀiălah dôl phung kôranh ƀư brah toyh jêh ri phung bu ranh phong Păng, Păng mâu plơ̆ lah ôh.

¹³ Pilat ôp ma Păng: “May mâu tăng hĕ âk nau khân păng mbơh gay tâm rdâng đah May?”

¹⁴ Ƀiălah Brah Yêsu mâu plơ̆ lah du tong ƀư ăn kôranh toyh chiă uănh nây hih rhâl ngăn.

¹⁵ Tĭng nau vay, ăp tâm nar rƀŭn, kôranh toyh chiă uănh vay mƀơk du huê bu nă tĭng nâm bunuyh ƀon lan dăn.

¹⁶ Nôk nây, khân păng dôl djôt prăp du huê bu nă lư amoh Y-Barabas.

¹⁷ Yor ri, nôk khân păng rgum ndrel, Pilat ôp: “Mbu nơm khân may ŭch gâp mƀơk, Y-Barabas mâu lah Brah Yêsu rnha jêng Brah Krist?”

¹⁸ Yorlah păng gĭt, yor nau nach, khân păng jao Brah Yêsu jêh.

¹⁹ Rlau ma nây, dôl păng gŭ ta ntŭk phat dôih, ur păng njuăl bu lah ma păng pô aơ: “Lơi ta pah bi ma bunuyh sŏng srăng nây, yor ma bunuyh nây măng aơ gâp geh nau ji ta nuih n'hâm hâu ngăn tâm nau mbơi.”

²⁰ Ƀiălah phung kôranh ƀư brah toyh jêh ri phung bu ranh nsŭk nsôr phung bunuyh ƀon lan ăn dăn mƀơk Y-Barabas jêh ri nkhĭt lơi Brah Yêsu.

²¹ Kôranh toyh chiă uănh ôp tay: “Mbu nơm tâm phung bar hê aơ khân may ŭch gâp mƀơk?” Khân păng plơ̆ lah: “Y-Barabas.”

²² Pilat lah: “Pôri mâm gâp mra ƀư ma Brah Yêsu rnha jêng Brah Krist?” Khân păng plơ̆ lah da dê: “Pâng păng ma kđĭn ta si tâm rkăng!”

²³ Kôranh toyh chiă uănh ôp: “Moh nau mhĭk bunuyh aơ ƀư jêh?” Ƀiălah khân păng nter ktang lơn: “Pâng păng ma kđĭn ta si tâm rkăng!”

²⁴ Yor ri, nôk Pilat saơ păng nơm mâu dơi ƀư ôh, ƀiălah geh nau nteh uh ah lơ hâu lơn, pôri păng sŏk dak jêh ri rao ti tanăp phung ƀon lan, jêh nây lah: “Gâp mâu tih ôh đah mham bunuyh aơ; nây jêng nau khân may.”

²⁵ Lĕ phung ƀon lan plơ̆ lah da dê: “Dăn mham păng tŭp ta hên jêh ri ta phung kon sau hên!”

²⁶ Pôri, Pilat mƀơk lơi Y-Barabas ăn ma khân păng, jêh ri bu dong Brah Yêsu, jêh nây jao Păng ma bu pâng kđĭn ta si tâm rkăng.

²⁷ Pakơi nây, phung tahan kôranh toyh chiă uănh njŭn leo Brah Yêsu ta ngih kôranh toyh chiă uănh jêh ri hŏ rgum lĕ mpôl tahan jŭm Păng.

²⁸ Khân păng doh lơi ao Păng jêh ri nsoh Păng ao chăng,

²⁹ tanh du mlâm đon hađăch ma lok jêh ri ndô ta bôk Păng, jêh nây dơm du tơm rpho tâm ti pa ma Păng. Khân păng chon mon tanăp Păng, mưch rmot pô aơ: “Mbah ma hađăch phung Yuđa!”

³⁰ Khân păng soh dak diu ta Păng, sŏk tơm rpho mbang ta bôk Păng.

³¹ Jêh hŏ mưch rmot ma Păng, khân păng doh lơi ao chăng, nsoh ao Păng nơm, jêh nây njŭn leo pâng kđĭn ta si tâm rkăng.

Brah Yêsu Bu pâng kđĭn

³² Dôl khân păng hăn luh, khân păng saơ du huê bunuyh tă bơh ƀon Siren amoh păng Y-Simôn, jêh ri đă bunuyh nây tuy si tâm rkăng Brah Yêsu.

³³ Tât ta du ntŭk rnha Gôgôtha, nâm bu ntĭt jêng Ntŭk Nting Bôk,

³⁴ khân păng ăn ma Păng nhêt ndrănh tâm pot đah play măt tăng; ƀiălah dôl chiăm djê̆, Păng mâu ŭch nhêt ôh.

³⁵ Pakơi nôk hŏ pâng kđĭn ma Păng ta si tâm rkăng, khân păng nchroh n'hôr tâm pă kho ao Păng ma khân păng.

³⁶ Jêh nây khân păng gŭ ta nây gak njrăng Brah Yêsu.

³⁷ Ta klơ bôk Păng geh du pŏk samƀŭt nchih nau bu phong pô aơ: “AƠ JÊNG BRAH YÊSU, HAĐĂCH PHUNG YUĐA.”

³⁸ Nôk nây, bu pâng kđĭn bar hê bunuyh ntŭng ndrel ma Păng, du huê pa ma, du huê pa chiau.

³⁹ Phung hăn rgăn ta nây gơm mưch, rteh bôk

⁴⁰ jêh ri lah: “May jêng nơm ƀư rai ngih brah jêh ri ndâk đŏng tâm pe nar, tâm rklaih hom may nơm! Tơlah may jêng Kon Brah Ndu, ntrŭnh hom tă bơh si tâm rkăng.”

⁴¹ Phung kôranh ƀư brah toyh, phung kôranh nchih samƀŭt, jêh ri phung bu ranh đŏng mưch rmot Păng pô aơ:

⁴² “Păng hŏ rklaih jêh bunuyh êng ƀiălah mâu dơi rklaih ôh păng nơm. Păng jêng hađăch phung Israel! Aƀaơ aơ ăn Păng jŭr bơh si tâm rkăng ri mơ he mra chroh ro.

⁴³ Păng rnơm nsing ma Brah Ndu. Tơlah Brah Ndu rŏng ma Păng, ăn Brah Ndu tâm rklaih Păng aƀaơ ro; yorlah păng lah: ‘Gâp jêng Kon Brah Ndu.’ ”

⁴⁴ Bar hê bunuyh ntŭng bu pâng kđĭn ndrel ma Păng đŏng suai rak Păng tâm ban lĕ.

⁴⁵ Ntơm bơh nklang bôk nar tât pe mông mhaơ, geh nau ngo nkŭm lam neh ntu.

⁴⁶ Klăp lah pe mông mhaơ, Brah Yêsu nter dŭt nteh: “Êli, Êli, lama sabaktani?” nâm bu ntĭt: “Ơ Brah Ndu gâp! Ơ Brah Ndu gâp! Mâm ƀư May chalơi gâp?”

⁴⁷ Tăng kơt nây, ƀaƀă bunuyh gŭ dăch ta nây lah: “Bunuyh aơ kuăl Y-Êli.”

⁴⁸ Ƀât lât geh du huê tâm phung khân păng nchuăt, hăn sŏk bok mli mbŭk tâm dak srat, kât ta chiông tơm rpho jêh ri ndơ̆ ăn ma Brah Yêsu nhêt.

⁴⁹ Ƀiălah phung êng lŏ lah: “Gŭ kâp hom, Y-Êli văch tâm rklaih păng mâu lah mâu.”

⁵⁰ Brah Yêsu nter du tong dŭt ktang đŏng, jêh nây tăch n'hâm.

⁵¹ Jêh ri, ri bok nching tâm ngih brah nkhêk jêng bar ntơm bơh klơ jŭr tât tâm dâng, neh n'gơ n'găr, lŭ klêr đang;

⁵² lĕ môch pơk jêh ri âk săk jăn phung kloh ueh khĭt jêh dâk rêh tay

⁵³ jêh ri luh tă bơh môch. Jêh Brah Yêsu dâk rêh tay, phung kloh ueh hăn lăp tâm ƀon kloh ueh jêh ri tâm mpơl ma âk bunuyh.

⁵⁴ Nôk kôranh tahan jêh ri phung tahan chiă Brah Yêsu, saơ n'găr neh ntu ndrel ma lĕ nau tât geh jêh, khân păng klach krit dŭt hâu ngăn jêh ri lah: “Nanê̆, Bunuyh aơ jêng Kon Brah Ndu.”

⁵⁵ Ta nây geh âk bu ur gŭ uănh ntơm bơh ngai. Khân păng jêng phung bunuyh hŏ tĭng Brah Yêsu tă bơh n'gor Galilê, gay pah kan Păng.

⁵⁶ Tâm phung bu ur nây geh H'Mari Mađala, H'Mari, mê̆ Y-Yakơ jêh ri Y-Yôsep, ndrel ma mê̆ bar kon bu klâu Y-Sêƀêđê.

Nau bu tâp Brah Yêsu

⁵⁷ Tât kêng măng, geh du huê ndrŏng văch tă bơh ƀon Arimathê, amoh păng Y-Yôsep, jêng oh mon Brah Yêsu,

⁵⁸ păng văch ta Pilat jêh ri dăn sŏk săk jăn Brah Yêsu. Pilat đă bu ăn ma păng.

⁵⁹ Y-Yôsep sŏk săk jăn jêh ri put njor ma bok mhay kloh,

⁶⁰ jêh nây dơm tâm môch mhe păng nơm, hŏ lôk tâm lŭ. Păng rlă du mlâm lŭ toyh rdâl ta mpông môch, jêh nây păng sĭt.

⁶¹ H'Mari Mađala jêh ri H'Mari êng geh măt ta nây, gŭ tanăp môch.

⁶² Ôi taơ, jêng pakơi nar jêh nar Ndrăp Nkra, phung kôranh ƀư brah toyh jêh ri phung Pharisi rgum ndrel tanăp măt Pilat,

⁶³ jêh ri lah: “Hơi kôranh, hên kah gĭt ma bunuyh mƀruh nây, dôl păng hôm rêh lah: ‘Lôch pe nar Gâp mra dâk rêh tay.’

⁶⁴ Yor ri, dăn kôranh đă bu chiă uănh môch ăn ueh tât ta nar tal pe, klach lah phung oh mon păng văch, sŏk ntŭng săk jăn, jêh nây lah ma lĕ rngôch bunuyh pô aơ ‘Păng dâk rêh tay jêh tă bơh nau khĭt,’ jêh ri nau mƀruh pakơi nây mra jêng mhĭk lơn nau mƀruh lor.”

⁶⁵ Pilat lah ma khân păng: “Khân may geh jêh phung tahan gak, hăn hom chiă uănh môch njrăng tĭng nâm khân may ŭch.”

⁶⁶ Pôri khân păng hăn jêh ri rdâl ntu môch Păng jêh ri ăn tahan gak chiă njrăng.