Mathay 26 - Nau Brah Ndu Ngơi 2023

Nau rêh ni, nau khĭt jêh ri dâk rêh tay Brah Yêsu ( 26:1 – 28:20 ) Phung kôranh ƀư brah tâm nchră nau mhĭk

¹ Jêh Brah Yêsu ngơi lĕ nau nây lôch jêh, Păng lah ma phung oh mon pô aơ:

² “Khân may gĭt hôm bar nar đŏng jêng tât rƀŭn Nau Găn, jêh ri bu mra jao Kon Bunuyh ăn bu pâng kđĭn ta si tâm rkăng.”

³ Nôk nây, phung kôranh ƀư brah toyh jêh ri phung kôranh bu ranh tâm phung ƀon lan rgum tâm nkual ngih kôranh ƀư brah dŭt toyh rnha Y-Kaipe

⁴ jêh ri tâm nchră gay nhŭp jêh ri nkhĭt Brah Yêsu.

⁵ Ƀiălah, khân păng lah: “Mâu dơi ƀư nau nây tâm nar rƀŭn, klach lah ƀư nau uh ah tâm phung ƀon lan.”

Brah Yêsu dơn nau tŏ dak ƀâu kah ta ƀon Bêthani

⁶ Dôl Brah Yêsu gŭ ta ngih Y-Simôn, du huê nuyh phŭng sa ta ƀon jê̆ Bêthani,

⁷ geh du huê bu ur djôt du rchŏk ma lŭ khlay dơm dak ƀâu kah khlay ngăn văch dăch Păng jêh ri tŏ ta klơ bôk Păng tâm nôk Păng gŭ ta sưng sông.

⁸ Phung oh mon saơ kơt nĕ ji nuih jêh ri lah: “Mâm ƀư mpŭng kơt nây?

⁹ Yorlah tăch dak ƀâu kah aơ sŏk rnoh prăk âk nây, djôt kơl ma bunuyh o ach.”

¹⁰ Ƀiălah Brah Yêsu gĭt nau nây jêh ri lah ma phung oh mon: “Mâm ƀư khân may ƀư rsuak bu ur nây? Bunuyh aơ ƀư du nau ueh ma Gâp jêh.

¹¹ Yorlah khân may geh ƀaƀơ bunuyh o ach gŭ jŭm khân may nơm, ƀiălah mâu di Gâp gŭ jŏ ôh.

¹² Nôk păng tŏ dak ƀâu kah ta săk jăn Gâp, bu ur nây ndrăp lor ma nau tâp Gâp.

¹³ N'hêl nanê̆, Gâp lah ma khân may, lam neh ntu, ăp ntŭk bu mbơh nkoch ma Nau Mhe Mhan Ueh aơ, nau kan bu ur nây hŏ ƀư bu mra nkah tât gay kah gĭt păng.”

Yuđas rlăng ma Brah Yêsu

¹⁴ Nôk nây, du huê tâm jât ma bar oh mon, amoh păng Y-Yuđas Iskariôt, hăn tâm mâp phung kôranh ƀư brah toyh

¹⁵ jêh ri lah pô aơ: “Moh ndơ khân may ŭch ăn ma gâp tơlah gâp jao Păng ma khân may?” Khân păng ăn ma păng pe jât rêl prăk.

¹⁶ Ntơm bơh nôk nây, Y-Yuđas joi mông găl gay tâm rlăng Păng.

Njêng rƀŭn Nhêt Sa Tâm Êp

¹⁷ Nôk nây, ta nar tal nguay tâm rƀŭn Piăng Let Mâu Geh Ndrui, phung oh mon văch ta Brah Yêsu jêh ri lah pô aơ: “Mbah ntŭk May ŭch hên nkra sa rƀŭn Nau Găn?”

¹⁸ Păng lah: “Lăp hom ƀon, tât ta du huê bunuyh jêh ri lah đah bunuyh nây pô aơ: ‘Nơm Nti lah: Mông Gâp dăch tât jêh, Gâp jêh ri phung oh mon mra râng rƀŭn Nau Găn ta ngih may.’ ”

¹⁹ Phung oh mon ƀư di nâm bu nau Brah Yêsu hŏ ntăm jêh ri khân păng ndrăp nkra rƀŭn Nau Găn.

²⁰ Tât kêng măng, Păng gŭ sông sa ndrel ma jât ma bar oh mon.

²¹ Dôl gŭ sông sa, Păng lah: “Nanê̆, Gâp lah ma khân may, du huê tâm phung khân may mra tâm rlăng ma Gâp.”

²² Phung oh mon rngot ngăn jêh ri ăp nơm khân păng ôp: “Ơ Kôranh, di gâp lĕ?”

²³ Păng plơ̆ lah: “Mbu nơm dơm jêh ti tâm ngan ndrel ma Gâp, mra tâm rlăng Gâp.

²⁴ Kon Bunuyh hăn kơt nau nchih jêh ma Păng; ƀiălah rêh ni yơh ma nơm tâm rdâng ma Kon Bunuyh! Ueh lơn lơi deh ôh ma nơm nây!”

²⁵ Y-Yuđas, nơm rlăng ma Păng, ôp: “Ơ Nơm Nti, di gâp lĕ?” Brah Yêsu plơ̆ lah: “May nơm hŏ lah jêh kơt nĕ.”

²⁶ Dôl gŭ sông sa, Brah Yêsu sŏk piăng let, lah ueh, nkê̆ch ăn ma phung oh mon, jêh nây lah: “Sŏk hom, sa! Aơ jêng săk jăn Gâp.”

²⁷ Păng sŏk đŏng kachok, jêh lah ueh, jêh nây ăn ma khân păng jêh ri lah: “Lĕ rngôch khân may, nhêt hom!

²⁸ Yorlah aơ jêng mham Gâp, mham nau tâm rnglăp nkhŭt jêh ăn ma âk bunuyh dơi yô̆ an nau tih.

²⁹ Gâp lah ma khân may, Gâp mâu mra nhêt dak krăk ƀâu aơ đŏng, kŏ tât nar Gâp mra nhêt dak krăk ƀâu mhe ndrel khân may tâm ƀon bri hađăch Mbơ̆ Gâp.”

Nau mbơh lor ma Y-Pêtrôs

³⁰ Jêh mprơ samƀŭt nau mprơ, Brah Yêsu jêh ri phung oh mon luh hăn, hao klơ yôk Ôlive.

³¹ Nôk nây, Brah Yêsu lah ma khân păng pô aơ: “Măng aơ lĕ rngôch khân may mra cha lôt yor Gâp, tâm ban geh nchih pô aơ: ‘Gâp mra lơh bunuyh rmăk biăp, Jêh ri biăp tâm phung biăp mra nchah rai pru pra.’

³² Ƀiălah jêh Gâp dâk rêh tay, Gâp mra hăn tât n'gor Galilê lor ma khân may.”

³³ Y-Pêtrôs ơh: “Nđâp tơlah lĕ rngôch chalơi yor May, gâp mâu mra chalơi ôh.”

³⁴ Brah Yêsu plơ̆ lah pô aơ: “Nanê̆, Gâp lah ma may: Ta măng aơ, êlor iăr ndrau, may mra dun Gâp pe tơ̆.”

³⁵ Y-Pêtrôs ơh: “Tơlah ăn gâp khĭt ndrel ma Nơm Nti kđôi lĕ, gâp mâu mra dun May ôh.” Lĕ rngôch oh mon lah kơt nây da dê.

Brah Yêsu mbơh sơm ta n'gar Gêtsêmanê

³⁶ Pakơi nây, Brah Yêsu hăn ndrel ma phung oh mon tâm du ntŭk rnha Gêtsêmanê. Păng lah ma khân păng: “Gŭ hom ta aơ, dôl Gâp hăn mbơh sơm ta ri.”

³⁷ Jêh Păng djôt leo Y-Pêtrôs jêh ri bar hê kon bu klâu Y-Sêƀêđê hăn ndrel Păng, Păng ntơm geh rngot rvê jêh ri nau rŭng răng.

³⁸ Păng lah: “Huêng gâp rngot rvê ngăn kŏ tât khĭt; khân may hôm gŭ ta aơ jêh ri rngeh njrăng ndrel Gâp.”

³⁹ Hăn ngai đê̆, Brah Yêsu kŭnh muh măt, jêh ri mbơh sơm “Ơ Mbơ̆! Tơlah dơi, dăn ăn kachok aơ du luh bơh Gâp! Nđâp lah pônây, mâu di tĭng nâm Gâp ŭch, ƀiălah tĭng nâm May ŭch.”

⁴⁰ Păng plơ̆ tay ma phung oh mon jêh ri saơ khân păng gŭ bê̆ch jêh, Păng lah ma Y-Pêtrôs pô aơ: “Mâm khân may mâu gŭ rngeh ndrel Gâp du mông?

⁴¹ Rngeh njrăng hom jêh ri mbơh sơm gay ma khân may mâu tŭp tâm nau ndơm. Huêng ŭch ngăn, ƀiălah nglay săk rdja.”

⁴² Păng hăn tay tal bar jêh ri mbơh sơm pô aơ: “Ơ Mbơ̆! Tơlah kachok aơ mâu dơi ôh sŏk lơi ƀiălah ăn gâp nhêt păng, ăn tât tĭng nâm May ŭch.”

⁴³ Păng plơ̆ tay, saơ phung oh mon hôm bê̆ch, yorlah măt khân păng jâk ngăn.

⁴⁴ Yor ri, Păng du tă bơh khân păng, hăn mbơh sơm rơh pe, jêh ri mbơh sơm tâm ban panăp nơh.

⁴⁵ Dôl nây Păng plơ̆ tay ma phung oh mon jêh ri lah ma khân păng pô aơ: “Mâm khân may hôm bê̆ch jêh ri gŭ rlu? Ri, mông tât jêh, bu rlăng mra jao Kon Bunuyh tâm ti phung tih.

⁴⁶ Dâk hom, hăn hom he. Ri, nơm rlăng ma Gâp tât jêh.”

Bu nhŭp Brah Yêsu

⁴⁷ Dôl Brah Yêsu ngơi, Y-Yuđas Iskariôt, du huê tâm jât ma bar oh mon văch ndrel ma phung âk djôt đao jêh ri mâng tă bơh phung kôranh ƀư brah toyh jêh ri phung bu ranh njuăl tât.

⁴⁸ Nôk nây, nơm rlăng ma Păng ăn khân păng du nau mbên: “Nơm gâp mra chŭm jêng bunuyh nây yơh; nhŭp hom.”

⁴⁹ Ƀât lât Y-Yuđa văch dăch Brah Yêsu jêh ri lah pô aơ: “Mbah Nơm Nti!” Jêh nây chŭm păng.

⁵⁰ Ƀiălah Brah Yêsu lah ma păng pô aơ: “Hơi jiăng, moh nau may ŭch ƀư, may ƀư hom!” Jêh nây khân păng văch, yơr ti ƀư mhĭk ma Brah Yêsu jêh ri nhŭp Păng.

⁵¹ Jêh ri aơ, du huê tâm phung gŭ ndrel ma Brah Yêsu rtuh ti tăk đao, dong jêh ri sreh tăch tôr du huê oh mon kôranh ƀư brah toyh lơn.

⁵² Brah Yêsu lah ma păng: “Ntrŭp hom đao may tâm ndrop! Yorlah mbu nơm djôt đao mra nkhĭt ma đao đŏng.

⁵³ May ntôn lah Gâp mâu dơi hĕ dăn ma Mbơ̆ Gâp, jêh ri Păng mra njuăl rlau jât ma bar phung mpôl tông mpăr ăn ma Gâp gơnh ro?

⁵⁴ Tơlah pôri mâm ƀư tât di ngăn đah Nau Brah Ndu Ngơi nchih pô aơ, nau aơ mra tât geh kơt nây?”

⁵⁵ Dôl rnôk nây, Brah Yêsu lah ma phung âk nây pô aơ: “Mâm ƀư khân may djôt đao jêh ri mâng văch gay nhŭp Gâp nâm bu nhŭp du huê bunuyh ntŭng? Ăp nar Gâp gŭ ntĭm nti tâm ngih brah, ƀiălah khân may mâu nhŭp Gâp.

⁵⁶ Ƀiălah lĕ rngôch nau aơ tât geh jêh gay nau phung nơm mbơh lor tâm Nau Brah Ndu Ngơi dơi tât di ngăn.” Dôl nây, lĕ rngôch phung oh mon chalơi Păng jêh ri nchuăt du.

Brah Yêsu panăp Mpôl Kôranh Phat Dôih

⁵⁷ Phung hŏ nhŭp Brah Yêsu njŭn leo Păng tât ta ngih kôranh ƀư brah toyh lơn, Y-Kaipe, ntŭk nây phung kôranh nchih samƀŭt jêh ri phung bu ranh dôl tâm rƀŭn.

⁵⁸ Y-Pêtrôs hăn tĭng Brah Yêsu ngai ngai, tât ta ntŭk ndring nkual ngih kôranh ƀư brah toyh lơn jêh ri lăp tâm trôm gŭ ndrel ma phung gak njrăng gay uănh nau nglĕ dŭt moh nau mra tât.

⁵⁹ Nôk nây, phung kôranh ƀư brah toyh jêh ri lĕ rngôch phung kôranh phat dôih joi nau phong nchơt tâm rdâng ma Brah Yêsu gay tâm rmal nkhĭt lơi Păng.

⁶⁰ Ƀiălah khân păng mâu joi saơ nau tih ôh, nđâp tơlah geh âk nơm phong nchơt hăn mbơh ta nây. Dăch dŭt, geh bar hê văch

⁶¹ Bu phong kơt aơ: “Bunuyh aơ lah jêh: ‘Gâp dơi ƀư rai ngih brah Brah Ndu, jêh nây ndâk tay păng tâm pe nar.’ ”

⁶² Kôranh ƀư brah toyh lơn, dâk jêh ri lah: “May mâu plơ̆ lah ma lĕ nau phung aơ phong may ƀơh?”

⁶³ Ƀiălah Brah Yêsu ăt gŭ rklăk. Kôranh ƀư brah toyh lơn lah ma păng: “Gâp đă may tâm amoh Brah Ndu gŭ rêh mro mrăng ma nau sơm ton jêh ri lah ma hên gĭt, di lĕ may jêng Brah Krist, Kon Brah Ndu?”

⁶⁴ Brah Yêsu plơ̆ lah: “May lah jêh nau nây. Ƀiălah Gâp lah ma khân may, pakơi aơ khân may mra saơ Kon Bunuyh gŭ mpeh pa ma Nơm Nau Brah jêh ri plơ̆ văch ta ndâr tŭk klơ trôk.”

⁶⁵ Nôk nây, kôranh ƀư brah toyh lơn nkhêk ao păng nơm jêh ri lah: “Păng ngơi sưr rlau jêh. Mâm ƀư he ŭch ma nơm mbơh đŏng? Khân may mhe tăng jêh nau păng ngơi sưr rlau nây. Mâm khân may mĭn?”

⁶⁶ Khân păng plơ̆ lah: “Păng khư ma nau khĭt.”

⁶⁷ Jêh nây Khân păng soh dak diu ta muh măt Brah Yêsu, lơh Păng. Ƀaƀă nơm tap Păng,

⁶⁸ jêh ri lah: “Hơi Brah Krist, nkoch hom nau mbơh lor ma phung hên! Mbu nơm lơh may nĕ?”

Pêtrôs dun Brah Yêsu

⁶⁹ Dôl nây, Y-Pêtrôs gŭ padih ta ndring. Du huê oh mon bu ur hăn êp păng jêh ri lah: “May jêng nơm gŭ ndrel ma Brah Yêsu, bunuyh Galilê.”

⁷⁰ Ƀiălah Y-Pêtrôs dun ro tanăp lĕ rngôch pô aơ: “Gâp mâu gĭt ôh moh nau ay lah nây.”

⁷¹ Dôl păng du hăn ta ndring mpông, du huê oh mon bu ur êng saơ Y-Pêtrôs jêh ri lah ma phung bunuyh gŭ dăch ta nây pô aơ: “Bunuyh aơ đŏng gŭ ndrel ma Brah Yêsu, bunuyh Nasaret.”

⁷² Ƀiălah Y-Pêtrôs dun tay jêh ri sơm ton pô aơ: “Gâp mâu gĭt năl ôh bunuyh nây.”

⁷³ Ƀât lât ta nây, phung bunuyh gŭ dăch ta nây lah ma Y-Pêtrôs pô aơ: “Nanê̆ ngăn may jêng du huê tâm phung bunuyh aơ, yorlah bâr may ngơi phong may nơm.”

⁷⁴ Ƀiălah Y-Pêtrôs rak rtăp jêh ri sơm ton pô aơ: “Gâp mâu gĭt bunuyh nây ôh.” Dôl rnôk nây, iăr ndrau.

⁷⁵ Y-Pêtrôs kah gĭt tay nau Brah Yêsu lah jêh: “Êlor ta iăr ndrau, may mra dun ma Gâp pe tơ̆.” Jêh nây păng hăn luh, nhĭm rngot ngăn.