Mathay 25 - Nau Brah Ndu Ngơi 2023

Nau hôr ma phung jât nuyh bu ur druh

¹ “Nôk nây, ƀon bri hađăch klơ trôk mra tâm ntĭt nâm bu jât nuyh bu ur druh djôt ŭnh kađen hăn tâm mâp đah bu klâu gŭ ur.

² Tâm phung nây, geh prăm nuyh rluk jêh ri prăm nuyh blau mĭn.

³ Phung rluk djôt leo ŭnh kađen ƀiălah mâu djôt leo dak ngi ôlive ôh;

⁴ ƀiălah phung blau mĭn djôt ŭnh kađen jêh ri djôt tĭng dak ngi tâm rchŏk.

⁵ Yorlah bu klâu gŭ ur văch jŏ ngăn, lĕ rngôch khân păng ji bê̆ch jêh ri hăk bê̆ch.

⁶ Ƀiălah, n'gul măng geh bâr kuăl: ‘Ri, bu klâu gŭ ur văch! Luh hăn ran chuă păng!’

⁷ Phung bu ur druh dâk bê̆ch jêh ri nkra ŭnh kađen khân păng.

⁸ Phung rluk lah ma phung blau mĭn pô aơ: ‘Dăn khân ay tâm pă ma hên ƀă dak ngi ôlive, yorlah ŭnh kađen hên dăch nhhât.’

⁹ Ƀiălah phung blau mĭn plơ̆ lah: ‘Mâu dơi, klach lah mâu mra tŏng ôh ma hên nơm nđâp ma khân ay; ueh lơn, khân ay hăn hom ta phung tăch dak pring gay rvăt.’

¹⁰ Ƀiălah dôl khân păng hăn rvăt dak ŭnh, bu klâu gŭ ur tât. Phung bu ur rơm ndrăp jêh ri mơ hăn ndrel ma bu klâu gŭ ur lăp nau nhêt sông tâm nkol ur sai, jêh ri mpông nchăng.

¹¹ Jŏ djê̆ ta nây, phung bu ur ri tât đŏng, lah pô aơ: ‘Hơi kôranh! Kôranh ơi, pơk an mpông ma hên ƀă!’

¹² Ƀiălah kôranh plơ̆ lah: ‘Gâp ngơi ngăn ma khân ay, gâp mâu gĭt năl khân ay ôh.’

¹³ Pôri, rngeh njrăng hom, yor khân ay may mâu gĭt nar, mâu lĕ gĭt mông đŏng.”

Nau hôr ma lĕ talâng

¹⁴ “Nôk nây, ƀon bri hađăch klơ trôk mra tâm ban ma du huê bunuyh bơi dâk hăn ngai, kuăl phung oh mon jêh ri jao drăp ndơ păng nơm ma khân păng.

¹⁵ Kôranh ăn ma bunuyh aơ prăm talâng, ma bunuyh ri bar, ma bunuyh êng nguay, tĭng nâm nau blau ngăn ăp nơm. Jêh nây păng hăn trong.

¹⁶ Bunuyh hŏ dơn jêh prăm talâng hăn ro geh n'hao, jêh ri dơi ntop prăm talâng đŏng.

¹⁷ Bunuyh dơn jêh bar talâng, dơi ntop bar talâng đŏng.

¹⁸ Ƀiălah, bunuyh hŏ dơn jêh du talâng, hăn kuyh ntu tâm neh jêh ri tâp lơi prăk kôranh.

¹⁹ Jŏ nar pakơi nây, kôranh phung oh mon nây plơ̆ tay jêh ri kơp ndrom samƀŭt ma khân păng.

²⁰ Bunuyh hŏ dơn jêh prăm talâng văch, djôt ntop prăm talâng êng, jêh ri păng lah: ‘Hơi kôranh, may jao jêh ma gâp prăm talâng, aơ, gâp geh n'hao ntop prăm talâng đŏng.’

²¹ Kôranh lah ma bunuyh nây: ‘Hơi oh mon sŏng jêh ri răp jăp, ueh ngăn! May hŏ răp jăp tâm kan jê̆, gâp mra ăn may mât uănh âk. Lăp hom gŭ maak ndrel ma kôranh may.’

²² Bunuyh hŏ dơn jêh bar talâng văch đŏng jêh ri lah: ‘Hơi kôranh, may jao jêh ma gâp bar talâng, aơ, gâp geh n'hao ntop bar talâng đŏng.’

²³ Kôranh lah ma bunuyh nây pô aơ: ‘Hơi oh mon sŏng jêh ri răp jăp, ueh ngăn! May hŏ răp jăp tâm kan jê̆, gâp mra ăn may mât uănh âk. Lăp hom gŭ maak ndrel ma kôranh may.’

²⁴ Bunuyh hŏ dơn jêh du talâng văch đŏng jêh ri lah: ‘Hơi kôranh, gâp gĭt ma may jêng du huê bunuyh dăng janh, rek tâm ntŭk may mâu mâp tăm, dônh tâm ntŭk may mâu nsrih;

²⁵ pôri gâp klach jêh ri pôn talâng may tâm neh. Aơ, gâp nsĭt ma may lĕ ndơ may nơm.’

²⁶ Ƀiălah kôranh plơ̆ lah pô aơ: ‘Hơi oh mon djơh mhĭk jêh ri ƀlao! Di lĕ may gĭt jêh gâp rek tâm ntŭk gâp mâu mâp tăm, jêh ri gâp dônh tâm ntŭk mâu nsrih?

²⁷ Pôri, ueh lơn may jao prăk gâp ma bunuyh tăch rgâl prăk, gay nôk gâp plơ̆ sĭt mra dơn prăk ơm nđâp ma kao păng.

²⁸ Pôri, sŏk hom talâng bơh nơm nây jêh ri ăn ma nơm geh jêh jât talâng.

²⁹ Yorlah nơm geh jêh, mra ăn ntop gay khân păng geh âk rmeh; ƀiălah mbu mâu geh bu mra sŏk lơi lĕ ndơ păng hŏ geh jêh.

³⁰ Bi ma oh mon mâu khlay nây, klŭp mƀăr hom păng tâm ntŭk ngo padih, ta nây mra geh nau nhĭm nhhiăng jêh ri nau rket sêk.’”

Nau phat dôih tâm nar nglĕ dŭt

³¹ “Tơlah Kon Bunuyh mra văch tâm nau chrêk rmah Păng, ndrel ma lĕ rngôch phung tông mpăr, Păng mra gŭ ta klơ sưng hađăch chrêk rmah.

³² Lĕ rngôch ntil mpôl bunuyh mra rgum tanăp Păng; jêh ri Păng mra tâm nkhah khân păng nâm bu bunuyh rmăk biăp tâm nkhah biăp đah be:

³³ dơm biăp pa ma, jêh ri be pa chiau.

³⁴ Nôk nây, Hađăch mra lah ma phung mpeh pa ma pô aơ: ‘Hơi phung Mbơ̆ Gâp ăn nau ueh uĭn, văch hom dơn ƀon bri hađăch klơ trôk ndrăp nkra jêh ăn ma khân may ntơm bơh rhăk njêng neh ntu.

³⁵ Yorlah dôl Gâp ji ngot, khân may ăn jêh ndơ sông sa ma Gâp; Gâp ji hir, khân may ăn Gâp nhêt dak; Gâp jêng bunuyh bu năch, khân may vơt rom Gâp;

³⁶ Gâp gŭ săk hưl, khân may nsoh ao ma Gâp; Gâp ji kuet, khân may hăn mât mray Gâp; bu krŭng Gâp, khân may chop khâl Gâp.’

³⁷ Dôl nây, phung sŏng srăng mra plơ̆ lah ma Păng: ‘Ơ Kôranh Brah, ndah jŏ hên mâp saơ May ji ngot jêh ri ăn May sông sa, mâu lah May ji hir jêh ri ăn May nhêt dak?

³⁸ Ndah jŏ hên mâp saơ May jêng bu năch, vơt rom May, mâu lah may gŭ săk lưn, hên nsoh ao ma May?

³⁹ Mâu lah ndah jŏ hên mâp saơ May ji kuet, mâu lah bu krŭng hăn chop khâl May?’

⁴⁰ Hađăch mra plơ̆ lah pô aơ: ‘Nanê̆, Gâp lah ma khân may, nôk khân may ƀư jêh nau aơ ma du huê jê̆ lơn tâm phung oh nâu Gâp, nâm bu ntĭt hŏ ƀư ma Gâp tâm ban lĕ.’

⁴¹ Jêh nĕ, Păng lah ma phung bunuyh mpeh pa chiau pô aơ: ‘Hơi phung bu rak rtăp jêh, du hom tă bơh Gâp, hăn tâm ŭnh n'ho ro hŏ ndrăp nkra jêh ma kôranh brah mhĭk jêh ri ma phung brah mhĭk oh mon păng.

⁴² Yorlah Gâp ji ngot, khân may mâu mâp ăn Gâp sông sa ôh; Gâp ji hir, khân may mâu mâp ăn ma Gâp dak nhêt;

⁴³ Gâp jêng bu năch, khân may mâu mâp vơt rom Gâp; Gâp gŭ săk hưl, khân may mâu nsoh ao ma Gâp; Gâp ji kuet jêh ri bu krŭng Gâp, khân may mâu mâp chop khâl Gâp.’

⁴⁴ Nôk nây, phung bunuyh aơ plơ̆ lah đŏng: ‘Ơ Kôranh Brah, ndah jŏ hên mâp saơ May ji ngot, ji hir, jêng bu năch, gŭ săk hưl, mâu lah ji kuet, mâu lah bu krŭng May jêh ri hên mâu pah kan May?’

⁴⁵ Păng mra plơ̆ lah pô aơ: ‘Nanê̆, Gâp lah ma khân may, nôk khân may mâu mâp ƀư nau aơ ma du huê jê̆ lơn tâm phung bunuyh aơ, jêng nâm bu khân may mâu mâp ƀư ma Gâp tâm ban lĕ.’

⁴⁶ Jêh nây phung aơ mra lăp tâm nau tâm rmal n'ho ro, ƀiălah phung sŏng srăng mra lăp tâm nau rêh n'ho ro.”