Mathay 24 - Nau Brah Ndu Ngơi 2023

Brah Yêsu mbơh lor ma nau ƀon Yêrusalem mra rai

¹ Tơlah Brah Yêsu luh bơh ngih brah, Phung oh mon văch dăch gay nchŏng ma Păng uănh ma lĕ kan pah ngih brah.

² Păng lah: “Khân may saơ lĕ rngôch ndơ nây di ƀơh? Nanê̆, Gâp lah ma khân may, ntŭk aơ mâu mra hôm geh du mâm lŭ tâm dăp gŭ ta klơ mlâm lŭ êng mâu mra tŭp.”

³ Dôl Păng gŭ ta klơ yôk Ôlive, phung oh mon văch ôp Păng êng pô aơ: “Lah ma hên gĭt ndah jŏ nau nây mra tât, jêh ri moh nau mbên mra mbơh lor ma nar may mra May plơ̆ văch jêh ri tâm rnôk nglĕ dŭt neh ntu?”

⁴ Brah Yêsu plơ̆ lah: “Njrăng hom, lơi ăn bu ndơm khân may.

⁵ Yorlah geh âk bunuyh mra nchơt nklă amoh Gâp văch gay lah pô aơ: ‘Gâp jêng Brah Krist’ jêh ri khân păng mra ndơm âk bunuyh.

⁶ Khân may mra tăng ma nau tâm lơh jêh ri nau bu nkoch ma nau tâm lơh. Njrăng hom, lơi rŭng răng! Yorlah lĕ nau nây mra tât geh, ƀiălah ê hŏ tât nglĕ dŭt ôh.

⁷ Yorlah phung ƀon lan aơ mra dâk tâm rdâng đah phung ƀon lan êng, bri dak tê̆ tâm rdâng đah bri dak ri; geh nau sa sât ji ngot, nau n'găr neh ntu tât geh âk ntŭk.

⁸ Lĕ rngôch nau nây knŏng jêng nau ntơm dôl ji deh kon.

⁹ Rnôk nây, bu mra jao khân may, ƀư ma khân may geh nau rêh ni jêh ri nkhĭt lơi khân may; lĕ rngôch bunuyh mra tâm rmot ma khân may yor amoh Gâp.

¹⁰ Nôk nây, âk bunuyh mra cha lôt, mâu gŭ răp jăp ndrăng nơm, tâm rmot ndrăng nơm.

¹¹ Âk nơm mbơh lor nklă mra mpơl jêr ri ndơm âk bunuyh.

¹² Jêh ri yorlah nau tih mhĭk hao âk lơn, nau rŏng tâm âk bunuyh mra nđik.

¹³ Ƀiălah mbu nơm nâp nuih n'hâm tât lôch dŭt mra dơi rklaih.

¹⁴ Nau Mhe Mhan Ueh ma ƀon bri hađăch Brah Ndu bu mra mbơh nkoch lam neh ntu gay mbơh ma lĕ rngôch ntil mpôl bunuyh; nôk nây, nar nglĕ dŭt mra tât.

¹⁵ Tơlah khân may saơ nau ƀơ̆ ƀơch ngăn ƀư nau rai ma Ntŭk Kloh Ueh, nâm nau nơm mbơh lor Y-Đaniel hŏ lah (mbu moh rŏ nau aơ gĭt hom),

¹⁶ nôk nây mbu gŭ tâm n'gor Yuđa, nchuăt du hom klơ yôk;

¹⁷ mbu gŭ ta klơ chor ngih, lơi trŭnh sŏk ndơ dŏng tâm ngih;

¹⁸ mbu gŭ ta mir, lơi plơ̆ sĭt sŏk ao mbâl.

¹⁹ Tâm lĕ nar nây, rêh ni ngăn yơh ma bu ur bă ntreo nđâp ma bu ur hôm ăn kon pu toh!

²⁰ Mbơh sơm hom gay khân may mâu du nchuăt ôh tâm yan sial puh mâu lah tâm nar saƀat;

²¹ yorlah nôk nây mra geh nau rêh ni toyh ngăn, kŏ tât ntơm bơh rnôk rhăk trôk neh ntu n'ho tât ma aƀaơ aơ, mâu prot geh, jêh ri pakơi taơ mâu đŏng geh tâm ban pônây.

²² Tơlah lĕ nar nây mâu n'hŭch lơi, pôri mâu geh du huê bunuyh dơi rklaih ôh; ƀiălah yor phung bunuyh dơi săch lĕ nar nây mra n'hŭch lơi.

²³ Rnôk nây, tơlah geh mbu lah ma khân may pô aơ: ‘Nĕ, Brah Krist gŭ ta aơ,’ mâu lah ‘gŭ ta nây’ lơi ta chroh.

²⁴ Yorlah lĕ bunuyh nklă amoh Brah Krist jêh ri phung nơm mbơh lor nklă mra mpơl jêh ri ƀư lĕ nau mbên khlay, nau khlay ngăn toyh gay ndơm, jêh ri tơlah geh dơi ƀư, khân păng ndơm nđâp ma phung hŏ săch jêh.

²⁵ Aơ, Gâp mbơh lor ma khân may jêh.

²⁶ Yor ri, tơlah khân păng lah ma khân may pô aơ: ‘Ri, Păng gŭ tâm bri rdah,’ lơi hăn ôh; ‘Ri, Păng gŭ tâm ngih,’ lơi chroh ôh.

²⁷ Yorlah nâm bu lơp nglaih luh tă bơh mpeh luh nar, lơp ang tât mpeh nhâp nar nâm nây, ri mơ Kon Bunuyh mra văch đŏng nâm bu pônây.

²⁸ Ta ntŭk geh săk jăn khĭt, klang grât rgum ta nây.

²⁹ Ƀât lât jêh lôch lĕ nar rêh ni nây, nar mra jêng ngo, khay mâu mra nchrat ang ôh, phung mănh mbing mra tŭp tă bơh trôk, jêh ri nau dơi ktang klơ trôk mra mpât n'gơ.

³⁰ Nôk nây, nau mbên ma Kon Bunuyh mra tâm mpơl ta klơ trôk, Lĕ rngôch mpôl băl bunuyh ta klơ neh ntu mra nter nhĭm nhhiăng, jêh ri mra saơ Kon Bunuyh văch tâm ndâr tŭk ta klơ trôk ma nau brah toyh jêh ri nau chrêk rmah toyh.

³¹ Păng mra njuăl phung tông mpăr Păng uh nŭng nteh ktang tâm rgum phung Păng hŏ săch jêh lam puăn njônh, ntơm bơh jâng trôk aơ tât ta jâng trôk ri.

³² Sŏk hom nau nti ntơm bơh tơm rvi: Tơlah n'gĭng păng ntơm chăt nkeh nse, luh n'ha ri mơ khân may gĭt yan vai bơi tât jêh.

³³ Tâm ban lĕ, tơlah khân may saơ lĕ nau nây, ri mơ gĭt pô aơ Kon Bunuyh văch dăch jêh, dôl gŭ dâk tanăp mpông.

³⁴ Nanê̆, Gâp lah ma khân may, bunuyh rnôk aơ mâu mra rlau lôch ôh kŏ tât lĕ nau nây tât.

³⁵ Trôk neh ntu mra rlau lôch, ƀiălah nau Gâp ngơi mâu mra rlau lôch ôh.”

Mâu geh du huê bunuyh gĭt nar Kôranh Brah plơ̆ tay

³⁶ “Ma nar jêh ri mông nây, mâu geh du huê bunuyh gĭt ôh, nđâp ma tông mpăr klơ trôk mâu lah Kon mâu dơi gĭt lĕ, knŏng êng Mbơ̆ Gâp dơm gĭt.

³⁷ Nâm bu tâm nôk Y-Nôê nâm nây, dôl Kon Bunuyh văch đŏng nâm bu pônây lĕ.

³⁸ Tâm lĕ nar nây êlor dak lêng, bu nhêt, sa, tâm gŭ ur sai, ƀư ndrôi, kŏ tât nar Y-Nôê lăp tâm kumpăn;

³⁹ khân păng mâu gĭt ôh tât nar dak rdŭl bŭk tât jêh ri đô̆ rdu lĕ rngôch. Nôk Kon Bunuyh văch tâm ban đŏng.

⁴⁰ Dôl nây, geh bar hê bunuyh bu klâu dôl gŭ tâm mir: du huê bu dơi sŏk, du huê bu chalơi;

⁴¹ geh bar hê bu ur gŭ peh ndrel: du huê djôt leo hăn, du huê bu chalơi.

⁴² Yor ri, rngeh njrăng hom, yorlah khân may mâu gĭt ôh moh nar Kôranh Brah khân may mra văch.

⁴³ Gĭt hom nau nây, tơlah du huê kôranh ngih gĭt moh mông bunuyh ntŭng văch, păng mra rngeh njrăng, mâu ăn bunuyh ntŭng lăp tâm ngih păng.

⁴⁴ Yor ri, ăn khân may rơm ndrăp jêh, yorlah Kon Bunuyh văch tâm mông khân may mâu geh mĭn.

⁴⁵ Mbu moh jêng oh mon răp jăp jêh ri blau mĭn, kôranh jao ăn păng mât uănh ngih kôranh gay păng ăn ndơ sông sa di mông?

⁴⁶ Ueh maak yơh ma oh mon nây, tơlah kôranh tât jêh ri saơ păng ƀư pônây!

⁴⁷ Nanê̆, Gâp lah ma khân may, kôranh mra jao ăn oh mon nây chiă uănh lĕ drăp ndơ păng.

⁴⁸ Ƀiălah tơlah jêng oh mon djơh mhĭk, păng mĭn tâm nuih n'hâm păng pô aơ: ‘Kôranh gâp ê hŏ plơ̆ sĭt ro ôh;’

⁴⁹ jêh nây păng ntơm dong mbang phung băl pah kan ndrel păng, jêh ri păng sông sa nhêt ndrel đah phung nhŭl ndrănh.

⁵⁰ Kôranh oh mon nây mra tât tâm nar păng mâu gĭt, tâm mông păng mâu gĭt,

⁵¹ tâm rmal păng âk ngăn, jêh ri ăn ma păng dơn nsum mrô nal ndrel ma phung geh nuih n'hâm nklă gŭ ta ntŭk mra geh nau nhĭm nhhiăng jêh ri nau rket sêk.”