Mathay 23 - Nau Brah Ndu Ngơi 2023

Brah Yêsu nduyh ma phung kôranh nchih samƀŭt jêh ri phung Pharisi

¹ Rnôk nây, Brah Yêsu ngơi ma phung ƀon lan jêh ri ma phung oh mon pô aơ:

² “Phung kôranh nchih samƀŭt jêh ri phung Pharisi gŭ ta klơ rnơl Y-Môis.

³ Pôri, ƀư tĭng hom jêh ri djôt prăp lĕ nau khân păng đă ma khân may; ƀiălah lơi tĭng kơt lĕ nau khân păng ƀư, yorlah khân păng knŏng lah ƀiălah mâu ƀư ôh.

⁴ Khân păng nchâp jêh ri bun lĕ ndơ jâk ngăn ta nglik bu, ƀiălah khân păng nơm mâu ŭch pah du nglau ti khân păng ôh.

⁵ Lĕ kan khân păng ƀư yorlah ŭch ma bu saơ. Yor ri, khân păng ƀư lĕ dŭng dĭ prăp nau vay, ntrŭnh grong ao ma jong;

⁶ khân păng rŏng gŭ ntŭk bu yơk tâm nau sông sa jêh ri lĕ rnơl khlay rlau lơn tâm ngih rƀŭn;

⁷ khân păng ŭch bu mbah ta nklang ntŭk tăch drăp jêh ri ŭch bu kuăl jêng nơm nti!

⁸ Ƀiălah khân păng lơi ăn bu kuăl khân may nơm jêng nơm nti; yorlah geh knŏng du huê Nơm Nti, bi lĕ rngôch jêng oh nâu da dê.

⁹ Lơi đŏng kuăl du huê bunuyh ta neh ntu aơ jêng mbơ̆; yorlah khân may geh knŏng du huê Mbơ̆, jêng Nơm gŭ ta klơ trôk.

¹⁰ Lơi đŏng mbu moh kuăl khân may nơm jêng kôranh; yorlah khân may geh knŏng du huê Kôranh, jêng Brah Krist.

¹¹ Mbu jêng bunuyh rlau lơn tâm phung khân may mra jêng oh mon khân may.

¹² Mbu nơm n'hao êng păng nơm bu mra trŭnh tâm dâng, bi mbu nơm ntrŭnh păng nơm, bu mra n'hao păng.

¹³ Rêh ni ngăn ma khân may, phung kôranh nchih samƀŭt jêh ri phung Pharisi, jêng phung nuih n'hâm nklă! Yorlah khân may nchăng mpông ƀon ueh klơ trôk tanăp măt bu; khân may nơm mâu dơi lăp tâm ƀon nây ôh, ƀiălah khân may nơm buay mbu nơm ŭch lăp ta nây đŏng.

¹⁵ Rêh ni yơh ma khân may, phung kôranh nchih samƀŭt jêh ri phung Pharisi, jêng phung bunuyh nuih n'hâm nklă! Yorlah khân may hăn lam dak mƀŭt jêh ri neh ntu ŭch ăn du huê êng lăp phung khân may; ƀiălah dôl bunuyh nây dơi lăp jêh, khân may ƀư ma bunuyh nây plơ̆ jêng du huê kon ndrung ŭnh bar tơ̆ ma khân may.

¹⁶ Rêh ni yơh ma khân may, phung njŭn trong chieh măt, khân may lah: ‘Tơlah mbu moh nchŏng ngih brah gay sơm ton ri mơ mâu geh nau khlay ôh; ƀiălah tơlah păng nchŏng mah tâm ngih brah gay sơm ton, pô ri nau sơm ton geh nau nchâp.’

¹⁷ Hơi phung rluk jêh ri chieh măt! Mah mâu lah ngih brah ƀư ma mah jêng kloh ueh, moh ndơ geh nau khlay rlau lơn?

¹⁸ Khân may lah pô aơ: ‘Tơlah mbu moh nchŏng nơng ƀư brah mâu geh nau khlay, ƀiălah tơlah nchŏng ndơ ƀư brah ta klơ nơng nây gay sơm ton, pôri geh nau nchâp.’

¹⁹ Hơi phung chieh măt! Ndơ nhhơr mâu lah nơng ƀư brah ƀư ma ndơ nhhơr jêng kloh ueh, moh ndơ khlay lơn?

²⁰ Yor ri, mbu moh nchŏng nơng ƀư brah gay sơm ton jêng nchŏng nơng ƀư brah nđâp ma ndơ ƀư brah ta klơ gay sơm ton;

²¹ mbu moh nchŏng ngih brah gay sơm ton jêng nchŏng ngih brah nđâp ma Nơm gŭ tâm ngih nây gay sơm ton;

²² bi mbu moh nchŏng trôk gay sơm ton jêng nchŏng sưng hađăch Brah Ndu nđâp ma Nơm gŭ ta klơ sưng nây gay sơm ton.

²³ Rêh ni yơh ma khân may, phung kôranh nchih samƀŭt jêh ri phung Pharisi, jêng phung geh nuih n'hâm nklă! Yorlah khân may nhhơr du kô̆ tâm jât klôih, ndơ ƀâu kah, trau gir, ƀiălah khân may chuêl lĕ nau khlay lơn tâm nau vay jêng nau sŏng, nau yô̆ nđach jêh ri nau chroh. Ăn khân may ƀư lĕ nau nây, ƀiălah mâu dơi đŏng chuêl lĕ nau ri.

²⁴ Hơi phung njŭn trong chieh măt, khân may nkhĕ sŏk rhuay ƀiălah khân may rvăn seh samô!

²⁵ Rêh ni yơh ma khân may, phung kôranh nchih samƀŭt jêh ri phung Pharisi, jêng phung geh nuih n'hâm nklă! Yorlah khân may rao kloh padih thaih ngan, ƀiălah tâm trôm bêng ma nau kơnh rlau ir jêh ri nau blă blơ.

²⁶ Hơi phung Pharisi chieh măt! Lor lơn, rao hom tâm trôm thaih ngan, gay padih dơi kloh lĕ.

²⁷ Rêh ni yơh ma khân may, hơi phung kôranh nchih samƀŭt jêh ri phung Pharisi jêng phung nuih n'hâm nklă! Yorlah khân may nâm bu lĕ môch mhĭng klo nglang, padih uănh ueh ngăn, ƀiălah tâm trôm bêng nting bunuyh khĭt jêh ri đah ăp ntil ƀơ̆ ƀơch.

²⁸ Khân may tâm ban lĕ, padih ƀư sŏng srăng tanăp bunuyh, ƀiălah tâm trôm khân may bêng ma nau djơh mhĭk jêh ri nuih n'hâm nklă.

²⁹ Rêh ni yơh ma khân may, phung kôranh nchih samƀŭt jêh ri phung Pharisi, jêng phung geh nuih n'hâm nklă! Yorlah khân may ndâk môch phung nơm mbơh lor, nkrơ̆ ueh ma môch phung sŏng srăng,

³⁰ jêh ri lah: ‘Tơlah hên gŭ rêh tâm rnôk n'hanh phung chô yau, n'hêl nanê̆ hên mâu tĭng ndrel ma khân păng tâm nau ƀư nkhŭt mham phung nơm mbơh lor ôh.’

³¹ Pônây, khân may hŏ mbơh ăn nanê̆ ma khân may nơm jêng kon phung kon sau phung nkhĭt phung nơm mbơh lor.

³² Pôri, nkhŭt hom bêng ndơ veh nau tih phung chô yau khân may!

³³ Hơi phung bêh, ndŭl mpôl bêh kăch, mâm ƀư khân may dơi klaih bơh nau phat dôih tâm ndrung ŭnh?

³⁴ Yor ri, Gâp njuăl phung nơm mbơh lor, phung blau mĭn, phung kôranh nchih samƀŭt văch ta khân may, ri mơ khân may mra nkhĭt jêh ri pâng kđĭn phung bunuyh nây ta si tâm rkăng, lơh dong ma mâng lĕ phung êng tâm ngih rƀŭn jêh ri ƀư mhĭk ma phung khân păng ntơm bơh ƀon aơ tât ta ƀon ri,

³⁵ gay ăn ma mham phung sŏng srăng hoch luh jêh ta neh ntu mra nkhŭt ta khân may da dê, ntơm bơh mham Y-Abel mâu geh nau tih tât ta mham Y-Sakari jêng kon bu klâu Y-Baraki, nơm khân may nkhĭt jêh tâm vah vang Ntŭk Kloh Ueh jêh ri nơng ƀư brah.

³⁶ Nanê̆, Gâp lah ma khân may, lĕ rngôch nau nây mra tât ma phung ndŭl mpôl aơ.”

Nau klâng ndrê ma Yêrusalem

³⁷ “Hơi Yêrusalem, Yêrusalem! May nkhĭt phung nơm mbơh lor jêh ri klŭp ma lŭ phung bu njuăl ma may! Âk tơ̆ jêh Gâp ŭch tâm rgum phung kon may tâm ban ma iăr me rtŭk kon păng, gay pôn lơi tâm dâng năr păng, ƀiălah khân may mâu ŭch ôh!

³⁸ Aơ, ngih khân may mra jêng rngol!

³⁹ Yorlah Gâp lah ma khân may, khân may mâu mra saơ Gâp ôh, kŏ tât dôl khân may mra lah pô aơ: ‘Tâm rnê ma Nơm văch ma amoh Kôranh Brah!’”