Mathay 22 - Nau Brah Ndu Ngơi 2023

Nau hôr ma nau nhêt sông tâm nkol ur sai

¹ Brah Yêsu dŏng tay nau hôr gay lah ma khân păng:

² “Ƀon bri hađăch klơ trôk nâm bu du huê hađăch nkra nau nhêt sông tâm nkol ur sai ma kon păng.

³ Hađăch njuăl oh mon hăn kuăl phung dơi jă jêh văch râng nau nhêt sông tâm nkol ur sai, ƀiălah khân păng mâu văch.

⁴ Hađăch njuăl tay phung oh mon êng jêh ri ntăm pô aơ: ‘Lah hom ma phung gâp jă jêh pô aơ: Nĕ, gâp ndrăp lor jêh, ndrôk jêh ri lĕ mpô mpa lay ƀư puăch jêh, lĕ rngôch ndơ rơm ndrăp jêh. Văch hom râng nau nhêt sông.’

⁵ Ƀiălah khân păng mâu meng nau jă, chrê ôh: Ƀaƀă luh hăn tâm mir lŏ, ƀaƀă hăn tăch drăp,

⁶ bi phung êng nhŭp phung oh mon hađăch, ƀư mhĭk, jêh nây nkhĭt lơi khân păng.

⁷ Hađăch hao ji nuih, đă phung tahan ƀư rai phung nkhĭt bunuyh nây jêh ri su ƀon khân păng.

⁸ Pakơi nây, hađăch lah ma phung oh mon: ‘Nau nhêt sông tâm nkol ur sai hŏ rơm ndrăp jêh, ƀiălah phung gâp jă mâu khư ôh văch râng nau nhêt sông sa.

⁹ Yor ri, hăn hom tâm lĕ trong sâng, jă lĕ rngôch bunuyh khân may tâm mâp, jă hom khân păng văch râng nau nhêt sông sa.’

¹⁰ Phung oh mon nây hăn lam trong sâng, tâm rgum lĕ rngôch bunuyh khân păng saơ, mâu tâm nkhah bunuyh mhĭk, bunuyh ueh. Yor ri, jrô nau nhêt sông sa bêng phung dơi jă.

¹¹ Ƀiălah dôl hađăch lăp ŭch uănh phung râng nhêt sông, păng saơ du huê bunuyh mâu nsoh ao prăp ma nau nhêt sông tâm nkol ur sai

¹² ri mơ lah ma nơm nây pô aơ: ‘Ơ jiăng, mâm ƀư may lăp mâu nsoh ao prăp nau nhêt sông tâm nkol ur sai?’ Bunuyh nây gŭ rklăk.

¹³ Hađăch ntăm ma phung oh mon: ‘Chăp hom jâng ti păng jêh ri klŭp păng tâm ntŭk ngo padih, ta ntŭk mra geh nau nhĭm nhhiăng jêh ri nau rket sêk.’

¹⁴ Yorlah geh âk bunuyh bu kuăl, ƀiălah djê̆ bunuyh bu săch.”

Nau chê̆ pi ma Sêsar

¹⁵ Dôl nây phung Pharisi hăn luh, tâm chră ndrăng khân păng, ƀư dăk sân Brah Yêsu tâm nau ngơi.

¹⁶ Khân păng njuăl phung oh mon khân păng ndrel ma phung bunuyh tâm mpôl Hêrôt hăn lah ma Brah Yêsu pô aơ: “Hơi Nơm Nti, hên gĭt May jêng bunuyh sŏng ngăn jêh ri nti trong Brah Ndu ma nau di, mâu chrê ma bu ôh, yorlah May mâu uănh ma bunuyh padih ôh.

¹⁷ Kơt nây, dăn May ăn ma hên gĭt nau May mĭn: Nau chê̆ pi ma Sêsar di nau vay mâu lah mâu?”

¹⁸ Ƀiălah Brah Yêsu gĭt nau mĭn djơh khân păng, plơ̆ lah: “Hơi phung nuih n'hâm nklă, mâm ƀư khân may rlong Gâp?

¹⁹ Ăn ma Gâp uănh du rêl prăk chê̆ pi.” Khân păng djôt ma Păng du đơniê.

²⁰ Păng ôp: “Mbu nơm rup jêh ri nau nchih aơ?”

²¹ Khân păng plơ̆ lah: “Sêsar.” Păng lah: “Pôri mplơ̆ sĭt hom ma Sêsar lĕ ndơ Sêsar, jêh ri mplơ̆ hom ma Brah Ndu lĕ ndơ Brah Ndu.”

²² Nôk tăng nau ngơi nây, khân păng hih rhâl jêh ri du luh bơh Păng.

Nau ôp ma nau dâk rêh tay

²³ Tâm nar nây, phung Sađusê, jêng phung mpôl lah mâu geh nau dâk rêh tay, khân păng văch ta Brah Yêsu jêh ri ôp:

²⁴ “Hơi Nơm Nti, Y-Môis lah: ‘Tơlah du huê bunuyh khĭt mâu geh kon, oh păng mra sŏk ur ndrô nâu păng gay geh kon ntrok noi deh ma nâu păng nơm.’

²⁵ Aƀaơ aơ, tâm phung hên geh pơh nuyh oh nâu; nâu bôk rah sŏk ur jêh ri păng khĭt, ƀiălah mâu geh kon ôh, rĭ dĭng păng ăn ur păng ma oh păng.

²⁶ Bunuyh rơh bar, rơh pe, kŏ tât bunuyh rơh pơh tâm ban lĕ.

²⁷ Nglĕ dŭt, bu ur khĭt đŏng.

²⁸ Pôri, ta nar dâk rêh tay, bu ur nây mra jêng ur mbu moh tâm phung pơh bunuyh? Yorlah lĕ rngôch khân păng sŏk jêh bu ur nây.”

²⁹ Brah Yêsu plơ̆ lah: “Khân may vĭ jêh, yorlah khân may mâu gĭt rbăng ôh Nau Brah Ndu Ngơi, mâu đŏng gĭt rbăng ma nau brah Brah Ndu.

³⁰ Yorlah nôk dâk rêh tay, bu mâu mra sŏk ur ôh mâu đŏng sŏk sai, ƀiălah nâm bu tông mpăr klơ trôk.

³¹ Bi ma nau dâk rêh tay phung khĭt jêh, khân may ê hŏ rŏ nau Brah Ndu ngơi pô aơ:

³² ‘Gâp jêng Brah Ndu Y-Abraham, Brah Ndu Y-Isăk, Brah Ndu Y-Yakôp’? Păng mâu di jêng Brah Ndu bunuyh khĭt ôh, ƀiălah Brah Ndu bunuyh rêh.”

³³ Nôk phung ƀon lan tăng nau ngơi nây, khân păng hih rhâl ma nau Păng ntĭm nti.

Nau vay ntăm khlay rlau lơn

³⁴ Lah tăng nau Brah Yêsu ƀư ma phung Sađusê gŭ rklăk, ri mơ phung Pharisi rgum ndrăng khân păng.

³⁵ Du huê nơm nti nau vay tâm phung khân păng geh nau ôp gay rlong uănh Păng:

³⁶ “Hơi Nơm Nti, tâm nau vay, moh nau vay ntăm khlay rlau lơn?”

³⁷ Brah Yêsu plơ̆ lah: “‘Ăn may yơk rŏng ma Kôranh Brah jêng Brah Ndu may ma lĕ nuih n'hâm, ma lĕ huêng, jêh ri ma lĕ nau mĭn.’

³⁸ Nây jêng nau vay ntăm tal nguay jêh ri khlay rlau lơn.

³⁹ Bi nau vay ntăm rơh bar tâm ban kơt nây đŏng: ‘Ăn may rŏng ma bunuyh chiau meng tâm ban ma may nơm lĕ.’

⁴⁰ Lĕ rngôch nau vay jêh ri nau mbơh lor luh tă bơh bar nau ntil nây.”

Brah Krist jêh ri hađăch Đavit

⁴¹ Dôl phung Pharisi rgum ndrel, Brah Yêsu ôp ma khân păng pô aơ:

⁴² “Mâm nau khân may mĭn ma Brah Krist? Mbu moh Kon păng jêng.” Khân păng plơ̆ lah: “Kon hađăch Đavit.”

⁴³ Brah Yêsu ôp: “Pôri, mâm ƀư hađăch Đavit dơi ntrôl ntrŭt tă bơh Brah Huêng Ueh, kuăl păng Kôranh Brah jêh ri lah jêh:

⁴⁴ ‘Kôranh Brah lah ma Kôranh Brah gâp: Gŭ hom mpeh pa ma Gâp, Kŏ tât nôk Gâp dơm phung rlăng đah May gŭ tâm dâng jâng May’?

⁴⁵ Tơlah hađăch Đavit kuăl Păng jêng Kôranh Brah, mâm Păng dơi jêng kon hađăch nây?”

⁴⁶ Mâu geh bu dơi plơ̆ lah du nau ôh, jêh ri đŏng ntơm bơh nar nây, mâu bu janh ôp Păng moh ntil đŏng ôh.