Mathay 20 - Nau Brah Ndu Ngơi 2023

Phung pah kan tâm đang krăk ƀâu

¹ “Ƀon bri hađăch klơ trôk jêng nâm bu du huê kôranh mir, ơm ôi păng hăn nkhôm phung pah kan nkhôm tâm đang krăk ƀâu păng nơm.

² Jêh nây păng hŏ tâm di nuih đah phung pah kan nkhôm du đơniê du nar, păng njuăl khân păng hăn ta đang krăk ƀâu păng.

³ Klăp lah tâm sĭn mông ôi, păng plơ̆ tay, saơ phung bunuyh êng gŭ dơm ta ntŭk tăch drăp,

⁴ păng lah ma khân păng pô aơ: ‘Ăn khân may hăn lăp tâm đang krăk ƀâu gâp, gâp mra nkhôm khân may ăn tâm di.’ Khân păng hăn ro.

⁵ Klăp lah jât ma bar mông nklang bôk nar, jêh ri ta pe mông mhaơ, păng plơ̆ tay, jêh ri ƀư tâm ban đŏng.

⁶ Ta prăm mông mhaơ, păng luh tay, jêh ri saơ phung bunuyh êng gŭ dơm jêh ri lah ma khân păng pô aơ: ‘Mâm ƀư khân may gŭ dơm dam lôch du nar ta aơ?’

⁷ Phung nây plơ̆ lah: ‘Yorlah mâu geh bunuyh ŭch nkhôm hên.’ Păng lah ma khân păng: ‘Khân may hăn hom lăp tâm đang krăk ƀâu gâp.’

⁸ Tât kêng măng, kôranh đang krăk ƀâu lah ma nơm mât uănh pô aơ: ‘Kuăl hom phung pah kan văch jêh ri nkhôm ma khân păng, ntơm bơh nglĕ dŭt tât ta phung lor.’

⁹ Phung văch pah kan ntơm prăm mông măng, ăp nơm dơn du huê du đơniê.

¹⁰ Nôk phung bunuyh lor văch, khân păng mĭn mra geh âk lơn; ƀiălah khân păng dơn du đơniê tâm ban lĕ.

¹¹ Nôk sŏk prăk nkhôm, khân păng ngơi ƀrôk ma kôranh mir.

¹² Khân păng lah: ‘Phung bunuyh văch nglĕ dŭt aơ knŏng pah kan du mông, ƀiălah may kơp khân păng tâm ban hên jêng phung hŏ pah kan hŏt rgănh jêh ri gŭ tâm duh nar tât lôch nar.’

¹³ Ƀiălah păng plơ̆ lah ma du huê tâm phung khân păng pô aơ: ‘Hơi mĭt jiăng, gâp mâu ƀư ôh nau mâu di đah may! Mâu di hĕ jiăng hŏ ŭch dơn jêh đah gâp du đơniê?

¹⁴ Sŏk hom prăk nkhôm may, jêh nây du hăn hom; gâp ŭch ăn ma nơm văch nglĕ dŭt aơ tâm ban hŏ mplơ̆ nkhôm ma may kơt nây.

¹⁵ Di lĕ gâp mâu dơi vay dŏng moh nau gâp geh tĭng nâm gâp ŭch? Mâu lah jêng may saơ gâp gŭ ueh ƀư ma may keh nach?’

¹⁶ Pônây, bunuyh nglĕ dŭt mra jêng lor, jêh ri phung lor mra jêng nglĕ dŭt.”

Brah Yêsu mbơh lor tal pe ma nau Păng khĭt jêh ri dâk rêh tay

¹⁷ Tâm nôk Brah Yêsu hăn ta ƀon Yêrusalem, Păng djôt leo jât ma bar oh mon luh ntŭk êng, jêh ri lah ma khân păng pô aơ:

¹⁸ “Aơ, he hăn ta ƀon Yêrusalem, jêh ri bu mra nhŭp Kon Bunuyh jao tâm ti phung kôranh ƀư brah toyh jêh ri phung kôranh nchih samƀŭt. Khân păng mra tâm rmal nkhĭt lơi Păng,

¹⁹ jêh nây jao Păng ma phung bu năch gay ma khân păng mưch rmot, dong ma mâng, jêh ri pâng kđĭn ta si tâm rkăng. Ƀiălah tât nar tal pe, Păng mra dâk rêh tay.”

Nau ur Y-Sêƀêđê ŭch dăn

²⁰ Nôk nây, geh mê̆ phung kon bu klâu Y-Sêƀêđê ndrel ma bar kon păng văch tât Brah Yêsu, chon kômâk jêh ri dăn Păng du ntil nau.

²¹ Păng ôp: “Moh nau ay ŭch?” Bu ur nây lah: “Dăn ma phung kon bu klâu gâp ta aơ, du huê gŭ pa ma, du huê gŭ pa chiau Kôranh Brah, tâm ƀon bri hađăch May.”

²² Brah Yêsu plơ̆ lah: “Khân may mâu gĭt ôh nau khân may dăn. Khân may klăp lah nhêt kachok Gâp bơi nhêt mâu lah mâu?” Khân păng lah: “Ơ, dơi đŏng.”

²³ Păng lah ma khân păng: “Khân may mra nhêt kachok Gâp; ƀiălah nau dơi gŭ pa ma mâu lah pa chiau Gâp, mâu di Gâp nơm ăn nau nây. Tâm ntŭk nây prăp ma mbu nơm Mbơ̆ Gâp ndrăp lor jêh.”

²⁴ Tăng kơt nây, jât bunuyh oh mon êng ji nuih ngăn ma phung bar hê oh nâu nây.

²⁵ Ƀiălah Brah Yêsu kuăl khân păng tât jêh ri nti nkah pô aơ: “Khân may gĭt phung chiă uănh tâm phung bu năch tŭn jot phung ƀon lan, bi phung kôranh chiă uănh toyh sŏk nau dơi ktang gay chiă uănh.

²⁶ Ƀiălah ta nklang khân may mâu di pônây ôh; ƀiălah, mbu nơm ŭch jêng toyh tâm phung khân may, ăn păng jêng oh mon;

²⁷ bi mbu nơm ŭch jêng ƀư bôk, ăn păng ƀư dĭk ma khân may.

²⁸ Nđâp ma Kon Bunuyh văch jêh mâu di gay bu pah kan, ƀiălah gay pah kan, jêh ri nhhơr nau rêh Păng nơm jêng rnoh chuai ma âk bunuyh.”

Brah Yêsu ƀư bah bar he chieh măt ta ƀon Yêrikô

²⁹ Nôk Brah Yêsu jêh ri phung oh mon luh tă bơh ƀon Yêrikô, geh âk bunuyh hăn tĭng Păng.

³⁰ Aơ, geh bar hê chieh măt gŭ ta meng trong, tăng ma Brah Yêsu hăn rgăn ta nây, khân păng kuăl huy: “Ơ Kon hađăch Đavit, dăn yô̆ nđach ma hên ƀă!”

³¹ Phung ƀon lan buay khân păng, đă gŭ rklăk; ƀiălah khân păng nter lơ hâu lơn: “Ơ Kôranh Brah, Kon hađăch Đavit, dăn yô̆ nđach ma hên ƀă!”

³² Brah Yêsu nsrŭng, kuăl khân păng văch jêh ri lah pô aơ: “Moh khân may ŭch gâp ƀư ma khân may?”

³³ Khân păng lah: “Ơ Kôranh Brah ơi, ăn măt hên dơi saơ ang!”

³⁴ Brah Yêsu geh nau yô̆ nđach, rĭ dĭng pah măt khân păng. Ƀât lât măt khân păng saơ ang ro jêh ri hăn tĭng Kôranh Brah.