Mathay 2 - Nau Brah Ndu Ngơi 2023

Phung njêh jêh ri Hêrôt

¹ Rnôk bu deh ma Brah Yêsu tâm ƀon Ƀêtlêhem tâm n'gor Yuđa, tâm rnôk hađăch Hêrôt chiă uănh, geh phung njêh gŭ mpeh luh nar tât ta ƀon Yêrusalem jêh ri ôp:

² “Ta ntŭk hađăch phung Yuđa mhe deh? Yorlah hên saơ jêh măch mbing Păng ta mpeh luh nar pôri hên văch mbah ma Păng.”

³ Tăng lư nau nây, hađăch Hêrôt jêh ri lĕ rngôch ƀon Yêrusalem geh nau rŭng răng da dê.

⁴ Păng kuăl rgum phung kôranh ƀư brah toyh jêh ri phung kôranh nchih samƀŭt tâm phung ƀon lan gay ôp ma khân păng: “Ta ntŭk nau deh Brah Krist?”

⁵ Khân păng plơ̆ lah: “Ta ƀon Ƀêtlêhem tâm n'gor Yuđa; yorlah geh nau mbơh lor nchih jêh pô aơ:

⁶ ‘Hơi ƀon Ƀêtlêhem, tâm n'gor Yuđa! May mâu ôh di jê̆ lơn đah lĕ ƀon toyh tâm n'gor Yuđa, Yorlah tă bơh may yơh mra mpơl du huê kôranh chiă uănh, Păng mra rmăk biăp phung Israel Gâp.’ ”

⁷ Hêrôt jă ndâp phung njêh tât gay joi gĭt nanê̆ ma ndah jŏ mănh mbing hŏ mpơl jêh.

⁸ Jêh nây hađăch đă khân păng hăn ta ƀon Ƀêtlêhem jêh ri păng ntĭnh ma khân păng: “Hăn hom jêh ri ôp joi nanê̆ ngăn ma kon se jê̆ nây; tơlah saơ Păng, mbơh ăn ma gâp gĭt gay gâp hăn yơk mbah ma Păng tâm ban lĕ.”

⁹ Jêh tăng nau hađăch lah, khân păng hăn ro. Aơ, mănh mbing khân păng saơ tă bơh mpeh luh nar hăn panăp khân păng kŏ tât ntŭk kon se jê̆ nây gŭ rĭ mơ nsrŭng.

¹⁰ Tơlah saơ mănh mbing nây, khân păng răm maak ngăn.

¹¹ Lăp tâm ngih, khân păng saơ kon se jê̆ ndrel mê̆ Păng H'Mari, khân păng chon mon yơk mbah Păng. Jêh nây khân păng pơk hip ndơ khlay, nhhơr ma Păng lĕ ndơ nhhơr jêng mah, ntăk si ƀâu kah jêh ri dak si tăng.

¹² Jêh nau nây, tâm nau mbơi, Brah Ndu mbơh ma khân păng mâu ăn khân păng plơ̆ tay ma hađăch Hêrôt ôh, pôri khân păng plơ̆ sĭt ma n'gor khân păng nơm trong êng.

Du Ndĕ ta Êjipt

¹³ Jêh phung njêh sĭt jêh, geh du huê tông mpăr Kôranh Brah mpơl tâm nau mbơi ma Y-Yôsep jêh ri lah ma păng pô aơ: “Dâk hom may, djôt kon se jê̆ jêh ri mê̆ Păng hăn du ndĕ ta Êjipt! May mra gŭ ta nây kŏ tât gâp ngơi ma may, yorlah hađăch Hêrôt mra joi kon se jê̆ nây gay nkhĭt.”

¹⁴ Dôl măng, Y-Yôsep kah rngăl djôt leo kon se jê̆ jêh ri mê̆ Păng du ndĕ ta Êjipt,

¹⁵ jêh nây khân păng gŭ ta nây kŏ tât hađăch Hêrôt khĭt. Nau nây tât geh gay nau Kôranh Brah lah dŏng bâr mbung nơm mbơh lor dơi tât di ngăn: “Gâp kuăl jêh Kon Gâp ngluh tă bơh Êjipt.”

¹⁶ Tơlah hađăch Hêrôt gĭt ma phung njêh rlăm ma păng, păng ji nuih hâu ngăn, đă bu nkhĭt lơi lĕ rngôch phung kon se jê̆ bu klâu ntơm bơh jê̆ tât bar năm tâm ƀon Ƀêtlêhem jêh ri lam n'gor nây, tĭng di ngăn nar khay phung njêh mbơh ma Păng.

¹⁷ Pônây, nau kôranh nơm mbơh lor Y-Yêrêmi hŏ lah tât di ngăn:

¹⁸ “Bu tăng bâr nter tâm ƀon Rama Bâr nhĭm vơl, nhhiăng nhĭm; Nây jêng H'Rachel nhĭm ma phung kon păng, Ƀiălah păng mâu ŭch bonh leng, Yorlah khân păng hŏ khĭt jêh.”

¹⁹ Tơlah hađăch Hêrôt khĭt jêh, du huê tông mpăr Kôranh Brah mpơl tâm nau mbơi ma Y-Yôsep ta Êjipt, jêh ri lah pô aơ:

²⁰ “Dâk hom djôt kon se jê̆ jêh ri mê̆ Păng plơ̆ sĭt bri Israel, yorlah phung ŭch nkhĭt kon se jê̆ nây hŏ khĭt jêh.”

²¹ Y-Yôsep dâk bê̆ch, sŏk kon se jê̆ jêh ri mê̆ Păng plơ̆ ta bri Israel.

²² Ƀiălah tơlah păng gĭt ma Y-Arkêlôs jêng hađăch chiă uănh n'gor Yuđa ntrok hađăch Hêrôt mbơ̆ păng, Y-Yôsep klach, mâu nănh plơ̆ sĭt ta bri nây. Rlau lơn ma nĕ, Brah Ndu mbơh ma păng tâm nau mbơi pôri păng hăn gŭ ta n'gor Galilê,

²³ gŭ tâm ƀon rnha jêng Nasaret. Pônây, nau phung nơm mbơh lor hŏ lah jêh geh nau mbên ngăn: “Bu mra kuăl Păng jêng bunuyh ƀon Nasaret.”