Mathay 19 - Nau Brah Ndu Ngơi 2023

Nau pah kan Brah Yêsu ta n'gor Yuđa jêh ri Yêrusalem ( 19:1 – 25:46 ) Nau chalơi ur sai

¹ Tơlah Brah Yêsu ngơi nau nây lôch jêh, Păng du tă bơh n'gor Galilê gay hăn ta n'gor Yuđa, mpeh kăl tê̆ dak krong Yurdan.

² Geh âk bunuyh tĭng Păng; Păng ƀư bah phung ji kuet ta nây.

³ Phung Pharisi văch gay rlong uănh Păng jêh ri ôp pô aơ: “Du huê bunuyh dơi vay chalơi ur păng yorlah ăp moh nau mâu lah mâu?”

⁴ Brah Yêsu plơ̆ lah: “Khân may ê hŏ rŏ lĕ? Bơh ntơm saơm Nơm Rhăk Njêng hŏ njêng bu klâu jêh ri bu ur,

⁵ jêh ri lah: ‘Yorlah nau nây bu klâu mra chalơi mê̆ mbơ̆ păng jêh ri tâm rnglăp đah ur păng, jêh ri bar hê khân păng mra plơ̆ jêng du nglay săk.’

⁶ Pônây ur sai mâu hôm jêng bar ôh, ƀiălah knŏng du nglay săk. Pôri, kon bunuyh mâu dơi tâm nkhah phung bunuyh Brah Ndu hŏ tâm rnglăp jêh!”

⁷ Phung Pharisi ôp tay ma Păng: “Tơlah pônây, mâm ƀư Y-Môis ntăm ăn ma pŏk samƀŭt tâm chalơi ur sai, jêh nây chalơi ur?”

⁸ Păng plơ̆ lah: “Yorlah nuih n'hâm khân may dăng ko, pôri Y-Môis ăn nau dơi chalơi ur; ƀiălah, ntơm bơh kăl e mâu geh kơt nây ôh.

⁹ Gâp lah ma khân may: Mbu moh mâu yor nau văng tĭr gay chalơi ur păng jêh ri sŏk ur êng, ri mơ păng jêng bunuyh văng tĭr.”

¹⁰ Phung oh mon lah pô aơ: “Tơlah chalơi ur yorlah nau nây, ueh lơn păng mâu sŏk ur.”

¹¹ Ƀiălah Păng plơ̆ lah: “Mâu di lĕ rngôch dơi geh đŏng dơn nau aơ, ƀiălah knŏng phung bunuyh dơi ăn dơm.

¹² Yorlah geh phung geh nau bu char ntơm nôk mhe deh; geh bunuyh hŏ char tă bơh ti bu, jêh ri geh phung char lơi yorlah ŭch pah kan ma ƀon bri hađăch klơ trôk. Mbu moh dơi dơn nau ngơi aơ, dơn hom.”

Brah Yêsu ăn nau ueh uĭn ma kon se jê̆

¹³ Nôk nây bu njŭn leo phung kon se jê̆ tât ma Păng gay ăn Păng pah ti mbơh sơm, ƀiălah phung oh mon nduyh khân păng.

¹⁴ Brah Yêsu lah: “Ăn phung kon se jê̆ văch ta Gâp, lơi buay khân păng ôh yorlah ƀon bri hađăch klơ trôk prăp ma phung bunuyh tâm ban ma phung kon se jê̆ nây.”

¹⁵ Păng pah ti klơ khân păng, Jêh nây Păng du tă bơh ntŭk nây.

Du huê bu klâu ndăm ndrŏng

¹⁶ Nôk nây, geh du huê hăn văch gay ôp Păng: “Hơi Nơm Nti, mâm nau ueh gâp mra ƀư gay dơn nau rêh n'ho ro?”

¹⁷ Brah Yêsu lah: “Mâm ƀư may ôp Gâp ma nau ueh? Knŏng geh du huê dơm Nơm jêng ueh. Tơlah may ŭch lăp tâm nau rêh, djôt prăp hom lĕ nau vay.”

¹⁸ Păng lah: “Moh lĕ nau vay nây?” Brah Yêsu plơ̆ lah: “Lơi nkhĭt bunuyh; lơi văng tĭr; lơi ntŭng; lơi ngơi mƀruh;

¹⁹ Yơk hom ma mê̆ mbơ̆ may jêh ri rŏng hom ma phung chiau meng nâm bu săk jăn may nơm.”

²⁰ Bu klâu ndăm nây lah: “Gâp tông prăp jêh lĕ rngôch nau vay nây, moh nau gâp ê hŏ geh đŏng?”

²¹ Brah Yêsu lah: “Tơlah may ŭch dơi nŭm rĭng, hăn hom, tăch lĕ rngôch ndơ may geh jêh ri tâm pă ma phung o ach, ri mơ may mra geh jay ndơ khlay klơ trôk; jêh nây văch hom tĭng Gâp.”

²² Dôl bu klâu ndăm tăng nau ngơi nây, păng du sĭt tâm nau rngot, yorlah păng geh drăp ndơ dŭt âk.

²³ Brah Yêsu lah ma phung oh mon: “Nanê̆, Gâp lah ma khân may, bunuyh ndrŏng lăp tâm ƀon bri hađăch klơ trôk jêng jêr ngăn.

²⁴ Gâp lah tay ma khân may, seh samô lăp tâm trôm nglai dơh lơn ma bunuyh ndrŏng lăp tâm ƀon bri hađăch Brah Ndu.”

²⁵ Phung oh mon tăng nau nây, hih rhâl ngăn jêh ri lah pô aơ: “Pôri mbu nơm dơi klaih?”

²⁶ Brah Yêsu uănh ma khân păng jêh ri lah: “Kon bunuyh mâu dơi ƀư nau aơ ôh, ƀiălah Brah Ndu dơi ƀư lĕ rngôch nau.”

²⁷ Y-Pêtrôs lah pô aơ: “Hơi Nơm Nti, hên chalơi lĕ rngôch ndơ gay tĭng May, pôri moh ndơ hên mra geh?”

²⁸ Brah Yêsu plơ̆ lah: “Nanê̆, Gâp lah ma khân may, rnôk rô̆ lĕ rngôch ndơ rgâl mhe, tơlah Kon Bunuyh mra gŭ ta klơ sưng hađăch nau chrêk rmah Păng, khân may jêng phung bunuyh hŏ tĭng Gâp, mra gŭ đŏng ta klơ jât ma bar sưng hađăch, gay phat dôih jât ma bar ndŭl mpôl phung Israel.

²⁹ Ma mbu nơm ƀư lư n'găr ma amoh Gâp ngih vâl, oh nâu, oh nur, mê̆ mbơ̆, phung kon, neh mir lŏ, yor amoh Gâp, nơm nây mra dơi dơn du rhiăng tơ̆ âk lơn, jêh ri dơn nau rêh n'ho ro.

³⁰ Ƀiălah geh âk phung lor mra jêng nglĕ dŭt, jêh ri âk phung nglĕ dŭt mra jêng lor.”