Mathay 18 - Nau Brah Ndu Ngơi 2023

Nau yơk nanê̆

¹ Nôk nây phung oh mon văch ôp Brah Yêsu pô aơ: “Mbu nơm jêng toyh lơn tâm ƀon bri hađăch klơ trôk?”

² Brah Yêsu kuăl du huê kon se jê̆ văch, dâk ta nklang phung oh mon

³ jêh ri lah: “Nanê̆, Gâp lah ma khân may, tơlah khân may mâu rgâl jêng nâm bu kon se jê̆, khân may mâu dơi lăp tâm ƀon bri hađăch klơ trôk ôh.

⁴ Pôri, mbu nơm geh nau dêh rhêt nâm bu kon se jê̆ aơ mra jêng nơm toyh lơn tâm ƀon bri hađăch klơ trôk.

⁵ Mbu nơm yor amoh Gâp rom du huê kon se jê̆ nâm bu pô aơ nâm bu ntĭt rom Gâp lĕ;

⁶ ƀiălah mbu nơm ƀư ma du huê tâm phung kon se aơ lĕ chroh ma Gâp tŭp nau tih, ueh lơn ăn bu kât mpăl lŭ ta trô ko păng jêh ri klŭp mƀăr păng tâm dak mƀŭt.”

Nau tih ƀư tŭp

⁷ “Rêh ni ngăn ma neh ntu yor lĕ nau ƀư ma bu chêh prah! Yorlah lĕ nau ƀư bu chêh prah jêng geh ngăn, ƀiălah rêh ni ngăn ma mbu jêng nơm ƀư nau chêh prah!

⁸ Tơlah ti may mâu lah jâng may leo may ƀư tih, sreh hom jêh ri mƀăr lơi păng! Yorlah ueh lơn ma may rvĕn jâng mâu lah lŭt ti gay dơi lăp tâm nau rêh, ueh lơn ma may geh rĭng bar đah ti, bar đah jâng ƀiălah bu mƀăr tâm ŭnh n'ho ro.

⁹ Bi tơlah măt may nsŭk may ƀư tih, rvek hom păng jêh ri mƀăr păng! Yorlah may roh du đah măt ƀiălah lăp nau rêh, ueh lơn ma may geh tŏng lĕ bar ding măt ƀiălah bu mƀăr tâm ndrung ŭnh.”

Nau hôr ma du mlâm biăp nhhơt

¹⁰ “Njrăng hom, lơi tâm rmot ma du huê tâm phung kon se jê̆ aơ! Yorlah Gâp lah ma khân may, phung tông mpăr khân păng gŭ klơ trôk saơ ƀaƀơ muh măt Mbơ̆ Gâp jêng Nơm gŭ klơ trôk.

¹² Mâm khân may mĭn? Tơlah du huê bunuyh geh du rhiăng mlâm biăp ƀiălah du mlâm hăn nhhơt, di đŏng păng lơi phung sĭn jât ma sĭn mlâm ta klơ yôk jêh ri hăn joi du mlâm hăn nhhơt?

¹³ Nanê̆, Gâp lah ma khân may, tơlah păng joi saơ jêh biăp nhhơt, păng mra răm maak ngăn ma biăp nây âk lơn ma phung sĭn jât sĭn mlâm mâu hăn nhhơt.

¹⁴ Pônây lĕ, Mbơ̆ khân may gŭ ta klơ trôk mâu ŭch ôh du huê tâm phung jê̆ aơ rai roh.”

Nau gŭ ngao ma oh nâu ƀư tih

¹⁵ “Tơlah oh nâu may ƀư tih đah may, hăn hom tâm mâp êng jêh ri ngơi nau nây ma păng. Tơlah păng dơi iăt, may dơi geh oh nâu may.

¹⁶ Ƀiălah tơlah păng mâu iăt nau, jă hom bar pe nuyh hăn ndrel đah may, gay tĭng nâm nau bar pe nuyh mbơh, lĕ rngôch nau ngơi mra ƀư nâp.

¹⁷ Tơlah păng dun, mâu ŭch dơn nau khân păng, mbơh nau nây ma Phung Ngih Brah Ndu; jêh ri tơlah păng dun mâu ŭch dơn, nau Phung Ngih Brah Ndu, may mra kơp păng nâm bu bunuyh padih mâu lah nơm riu pi.

¹⁸ Nanê̆, Gâp mbơh ma khân may, moh ndơ khân may kât ta neh ntu ăt mra kât ta klơ trôk; jêh ri moh ndơ khân may pơk ta neh ntu mra pơk ta klơ trôk.

¹⁹ Gâp lah đŏng ma khân may, tơlah bar hê tâm phung khân may geh du nau mĭn ndrăng khân păng ta neh ntu gay mbơh sơm moh ntil nau, Mbơ̆ Gâp gŭ ta klơ trôk mra ăn ma khân păng.

²⁰ Yor lah ta ntŭk geh bar pe nuyh khân may tâm rƀŭn, ma amoh săk Gâp, ta nây Gâp mra gŭ ta nklang khân păng.”

Nau hôr ma oh mon mâu yô̆ an

²¹ Nôk nây, Y-Pêtrôs văch dăch Brah Yêsu jêh ri ôp: “Ơ Kôranh Brah, ndah tơ̆ gâp mra yô̆ an ma oh nâu gâp, tơlah păng tih đah gâp? Di lĕ pơh tơ̆?”

²² Brah Yêsu plơ̆ lah ma păng: “Gâp mâu lah ma may pơh tơ̆ ôh, ƀiălah pơh jât tơ̆ pơh.

²³ Yor ri, ƀon bri hađăch klơ trôk tâm rđĭl nâm bu du huê hađăch ŭch rgum kơp ndrom samƀŭt đah phung oh mon păng.

²⁴ Nôk păng ntơm kơp, bu njŭn ma păng du huê khan rnon jât rbăn talâng,

²⁵ Yorlah bunuyh nây mâu geh moh ndơ gay mplơ̆ rnon ôh, pôri hađăch ntrŭnh bu tăch păng, ur kon, jêh ri lĕ rngôch ndơ păng geh, gay mplơ̆ rnon.

²⁶ Oh mon nây chon kômâk gay vơl dăn: ‘Ơ kôranh, dăn nsrôih kâp gâp ƀă, gâp mra mplơ̆ lĕ.’

²⁷ Hađăch yô̆ nđach ma păng, mƀơk ma păng sĭt jêh ri jut lơi rnon ma păng.

²⁸ Ƀiălah dôl păng luh sĭt, tâm mâp đah du huê mĭt jiăng khan rnon păng du rhiăng đơniê, pôri păng djôt kuăn păng ta trô ko jêh ri lah: ‘Mplơ̆ hom rnon ma gâp.’

²⁹ Mĭt jiăng chon kômâk, vơh vơl: ‘Dăn srôih kâp ma gâp ƀă, gâp mra mplơ̆ rnon ăn ma may.’

³⁰ Ƀiălah păng mâu iăt ôh, păng nhŭp krŭng păng kŏ tât păng mplơ̆ rnon lĕ.

³¹ Phung băl păng saơ pônây, khân păng rngot ngăn, hăn nkoch tay ma hađăch lĕ nau hŏ tât jêh.

³² Hađăch đă bu kuăl păng văch jêh ri lah: ‘Hơi oh mon ƀai mhĭk, gâp jut lơi jêh rnon ma may, yorlah may vơh vơl ma gâp;

³³ pônây mâm may mâu yô̆ nđach ma băl may, tâm ban pah kan ndrel may, nâm bu gâp hŏ yô̆ nđach ma may?’

³⁴ Hađăch hao ji nuih, jao păng ma kôranh mât uănh ndrung krŭng păng kŏ tât păng mplơ̆ lôch rnon.

³⁵ Tơlah ăp nơm tâm phung khân may mâu yô̆ an ma nâu oh păng ma lĕ nuih n'hâm, Mbơ̆ Gâp klơ trôk mra ƀư ma khân may tâm ban lĕ.”