Mathay 17 - Nau Brah Ndu Ngơi 2023

Nau Brah Yêsu rgâl săk jăn

¹ Prao nar pakơi, Brah Yêsu jă êng Y-Pêtrôs, Y-Yakơ, jêh ri Y-Yôhan jêng oh Y-Yakơ, hăn ndrel ma Păng hao klơ yôk prêh.

² Păng rgâl săk jăn tanăp khân păng: muh măt Păng ral ang nâm bu ang nar ao Păng jêng nglang nâm bu nau ang.

³ Ri, geh Y-Môis jêh ri Y-Êli mpơl gay ngơi đah Brah Yêsu.

⁴ Y-Pêtrôs lah ma Brah Yêsu: “Ơ Kôranh Brah he gŭ ta aơ ueh ngăn; tơlah May ŭch, gâp mra ƀư pe mlâm vâl bok ta aơ: du mlâm ma May, du mlâm ma Y-Môis jêh ri du mlâm ma Y-Êli.”

⁵ Dôl Y-Pêtrôs ngơi, geh du ndâr tŭk ang ral hâu ngăn nkŭm khân păng; jêh ri tă bơh tŭk geh bâr ngơi pô aơ: “Aơ jêng Kon Gâp rŏng ngăn ngên, tâm Păng Gâp geh nau maak ngăn; iăt hom nau Păng!”

⁶ Tơlah phung oh mon tăng bâr ngơi aơ, khân păng cha lôt nkŭp muh măt ta neh, klach hâu ngăn.

⁷ Ƀiălah Brah Yêsu văch, pah khân păng jêh ri lah: “Dâk hom, lơi klach ôh!”

⁸ Phung oh mon n'gơr uănh mâu saơ bunuyh êng ôh, ƀiălah saơ knŏng du huê Brah Yêsu.

⁹ Dôl tơlah Păng ndrel ma phung oh mon jŭr tă bơh yôk, Brah Yêsu lah ma khân păng: “Lơi nkoch tay ma bu ôh nau tâm saơ aơ kŏ tât Kon Bunuyh dâk rêh tay tă bơh nau khĭt.”

¹⁰ Phung oh mon ôp Păng: “Mâm ƀư phung kôranh nchih samƀŭt lah Y-Êli văch lor?”

¹¹ Păng plơ̆ lah: “Nanê̆ Y-Êli văch jêh ri njêng tay lĕ rngôch nau.

¹² Ƀiălah Gâp lah ma khân may: Y-Êli văch jêh, jêh ri bu mâu gĭt năl păng ôh, ƀiălah bu ƀư ma păng tĭng nau khân păng ŭch. Kon Bunuyh mra dơn nau rêh ni bơh ti khân păng kơt nĕ.”

¹³ Nôk nây, phung oh mon gĭt rbăng pô aơ Păng ngơi đah khân păng ma Y-Yôhan-Ƀaptist.

Brah Yêsu ƀư bah kon se brah mhĭk lơh

¹⁴ Tơlah Brah Yêsu jêh ri phung oh mon plơ̆ tay đah phung âk, geh du huê bunuyh văch, chon mon tanăp Păng, ngơi pô aơ:

¹⁵ “Ơ Kôranh Brah, dăn yô̆ nđach ma kon bu klâu gâp! Păng brŭt ndrăng, rêh ni ngăn; păng vay prah tâm ŭnh, jêh ri vay tŭp tâm dak.

¹⁶ Gâp njŭn păng jêh ma phung oh mon May, ƀiălah khân păng mâu dơi ƀư bah păng ôh.”

¹⁷ Brah Yêsu plơ̆ lah: “Hơi ndŭl mpôl mâu chroh jêh ri dăng bôk, ndah nâm jŏ Gâp mra gŭ ndrel đah khân may? Ndah nâm jŏ Gâp mra nsrôih dơn đah khân may? Njŭn leo hom kon se nây ma Gâp.”

¹⁸ Brah Yêsu nduyh lah brah mhĭk, jêh ri păng luh ro bơh kon se nây; tâm mông nây, kon se nây dơi bah.

¹⁹ Phung oh mon hăn dăch tâm mâp đah Brah Yêsu jêh ri ơh pô aơ: “Mâm ƀư hên mâu dơi mprơh brah mhĭk nây?”

²⁰ Păng plơ̆ lah: “Yorlah khân may geh nau chroh djê̆. Gâp lah nanê̆ ma khân may: Tơlah khân may geh nau chroh nâm bu du găr trau, khân may dơi lah ma yôk aơ pô aơ: ‘Du hom tă bơh ntŭk aơ tât ta ntŭk ri’ du ro; jêh ri mâu geh ôh nau khân may mâu dơi ƀư!”

Brah Yêsu mbơh lor ma nau Păng mra khĭt jêh ri dâk rêh tay

²² Nôk phung oh mon rgum ta n'gor Galilê, Brah Yêsu lah ma khân păng pô aơ: “Bu mra jao Kon Bunuyh tâm ti phung bunuyh.

²³ Khân păng mra nkhĭt Păng, ƀiălah tât ta nar tal pe, Păng mra dâk rêh tay.” Phung oh mon rngot hâu ngăn.

Brah Yêsu chê̆ pi

²⁴ Tơlah khân păng tât ta ƀon Kapernum, đơ phung riu pi ma ngih brah hăn dăch Y-Pêtrôs: “Nơm Nti khân may chê̆ pi lĕ?”

²⁵ Y-Pêtrôs plơ̆ lah: “Geh.” Tơlah Y-Pêtrôs lăp tâm ngih, Brah Yêsu ôp lor ma păng: “Hơi Y-Simôn, mâm may mĭn? Mbah tă luh phung hađăch neh ntu đă mbu nơm chê̆ pi? Tă bơh phung kon bu klâu khân păng mâu lah tă phung bu năch?”

²⁶ Y-Pêtrôs plơ̆ lah: “Phung bu năch.” Păng lah pô aơ: “Pôri phung kon bu klâu lĕ chê̆ pi.

²⁷ Ƀiălah gay mâu ƀư nau chêh prah ma khân păng, ăn may hăn ta dak mƀŭt chê̆ ndar ka, sŏk ka geh ndar lor lơn, pơk mbung păng, mra saơ du rêl prăk. Sŏk hom rêl prăk nây chê̆ pi ma Gâp nđâp ma may!”