Mathay 15 - Nau Brah Ndu Ngơi 2023

Nau rao ti êlor sa

¹ Pakơi nây, geh ƀaƀă phung Pharisi nđâp ma phung kôranh nchih samƀŭt văch ta Brah Yêsu tă bơh ƀon Yêrusalem jêh ri ôp pô aơ:

² “Mâm ƀư phung oh mon May ƀư tih nau vay dŏng phung kăl e, mâu rao ôh ti êlor khân păng sa?”

³ Brah Yêsu plơ̆ lah: “Mâm ƀư khân may yorlah nau vay khân may nơm ƀư tih nau vay Brah Ndu?

⁴ Yorlah Brah Ndu hŏ ntĭm nti jêh: ‘Yơk hom ma mê̆ mbơ̆ khân may;’ jêh ri: ‘Mbu nơm rak rtăp mê̆ mbơ̆ păng nơm, bu mra nkhĭt lơi păng.’

⁵ Ƀiălah khân may lŏ lah: ‘Tơlah mbu nơm lah ma mê̆ mbơ̆ pô aơ: Lĕ ntil gâp kơl ma mê̆ mbơ̆, gâp nhhơr jêh ma Brah Ndu, bunuyh nây mâu yơk ma mê̆ mbơ̆ păng ôh.’

⁶ Pônây, yor ma nau vay dŏng khân may nơm, khân may chalơi jêh nau Brah Ndu ngơi.

⁷ Hơi phung bunuyh nuih n'hâm nklă! Di ngăn nau Y-Êsai mbơh lor jêh ma khân may pô aơ:

⁸ ‘Phung ƀon lan aơ yơk mbah Gâp ma trôm mbung khân păng; Ƀiălah nuih n'hâm khân păng ngai đah Gâp.

⁹ Nau khân păng yơk mbah ma Gâp jêng mâu khlay, Khân păng nti knŏng jêng nau vay bunuyh.’ ”

¹⁰ Jêh ta nây, Brah Yêsu kuăl phung ƀon lan văch jêh ri lah: “Iăt hom jêh ri gĭt vât:

¹¹ Mâu di ndơ lăp tâm trôm mbung ôh ƀư ƀơ̆ bunuyh; ƀiălah ndơ luh tă bơh mbung, ndơ nây yơh ƀư ƀơ̆ bunuyh.”

¹² Pakơi nây phung oh mon hăn dăch, lah ma Păng: “May gĭt lĕ phung Pharisi geh nau ƀư rngot, yorlah tăng jêh nau ngơi pônây?”

¹³ Păng plơ̆ lah: “Moh tơm si Mbơ̆ Gâp klơ trôk mâu mâp tăm, ăn bu mra rôk lơi.

¹⁴ Ăn kđôi khân păng; khân păng jêng phung chieh măt njŭn trong. Tơlah du huê chieh măt njŭn du huê chieh măt, lĕ bar hê khân păng mra tŭp tâm ntu.”

¹⁵ Y-Pêtrôs lah pô aơ: “Dăn Kôranh rblang ma hên nau ngơi hôr nây.”

¹⁶ Brah Yêsu ôp: “Mâm ƀư khân may ê hŏ gĭt rbăng đŏng?

¹⁷ Khân may mâu gĭt rbăng pô aơ moh ndơ lăp tâm trôm mbung hăn jŭr trôm ndŭl, jêh ri mra luh padih?

¹⁸ Ƀiălah moh ndơ luh tă bơh trôm mbung păng văch tă bơh nuih n'hâm, lĕ ndơ nây yơh ƀư ƀơ̆ bunuyh.

¹⁹ Yorlah tă bơh nuih n'hâm yơh luh văch nau mĭn mhĭk, nau nkhĭt bunuyh, nau văng tĭr, nau ka n'hong, nau ntŭng, nau ngơi mƀruh, ngơi nchơt.

²⁰ Nây jêng lĕ nau ƀư ƀơ̆ bunuyh; ƀiălah nau sa mâu rao ti, mâu ƀư ƀơ̆ bunuyh ôh.”

Nau chroh bu ur Kanaan

²¹ Tă bơh nĕ, Brah Yêsu hăn lăp tâm ƀon Tyre jêh ri Sidôn.

²² Ri, geh du huê bu ur bri Kanaan văch tă bơh n'gor nây jêh ri nter pô aơ: “Ơ Kôranh Brah, kon Y-Đavit, dăn yô̆ nđach ma gâp ƀă! Kon bu ur gâp, brah mhĭk lơh ƀư nđêh nji ngăn.”

²³ Ƀiălah Păng mâu plơ̆ lah du nau ngơi ôh. Phung oh mon văch êp, jêh ri vơh dăn ma Păng pô aơ: “Dăn Kôranh đă ma bu ur nây plơ̆ sĭt, yorlah păng tĭng groi pakơi he jêh ri vơl dăn mro.”

²⁴ Păng plơ̆ lah: “Bu njuăl Gâp văch, knŏng ma phung biăp nkhah du ngih Israel.”

²⁵ Ƀiălah bu ur nây văch êp, chon kômâk jêh ri lah: “Ơ Kôranh Brah, dăn kơl gâp ƀă.”

²⁶ Păng plơ̆ lah: “Sŏk piăng let phung kon mƀăr ma so sa jêng nau mâu di.”

²⁷ Bu ur nây plơ̆ lah: “Ơ Kôranh Brah, di ngăn jêng kơt nây, ƀiălah phung so sa lĕ glo piăng let hăch tŭp tă bơh sưng kôranh khân păng nơm.”

²⁸ Brah Yêsu lah: “Hơi bu ur ri, nau chroh ay toyh ngăn! Nau ay ŭch mra dơi jêng!” Tâm mông nây ro, kon bu ur păng dơi bah.

Brah Yêsu ƀư njêng piăng let tal bar

²⁹ Brah Yêsu du tă bơh ntŭk nây jêh ri hăn njŏ tĭng dak mƀŭt Galilê; Păng hao yôk jêh ri gŭ ta nây.

³⁰ Nôk nây geh phung mpôl bunuyh âk ngăn văch ta Păng, njŭn leo phung bunuyh rvĕn, phung chieh măt, phung mlo, phung lŭt jâng ti, jêh ri âk phung ji kuet êng êng. Bu n'gân ta jâng Brah Yêsu; Păng ƀư bah ma khân păng.

³¹ Yor ri, khân păng hih rhâl ngăn dôl saơ phung mlo ngơi, phung lŭt jâng ti dơi bah, phung rvĕn blau hăn, phung chieh măt dơi saơ; jêh ri khân păng tâm rnê ma Brah Ndu phung Israel.

³² Jêh nĕ, Brah Yêsu kuăl phung oh mon văch jêh ri lah pô aơ: “Gâp yô̆ nđach ma phung ƀon lan aơ, yorlah khân păng gŭ ndrel ma Gâp tâm pe nar jêh, aƀaơ aơ mâu geh ndơ sông sa ôh. Gâp mâu ŭch ăn khân păng plơ̆ sĭt tâm ndŭl ji ngot ôh, klach khân păng huăr rŏ trong.”

³³ Phung oh mon lah: “Tâm nklang ntŭk bri rdah aơ, mâm he dơi geh tŏng piăng let ma phung bunuyh âk râk aơ sa?”

³⁴ Păng ôp ma phung oh mon: “Ndah âk piăng let khân may geh?” Khân păng lah: “Geh pơh mlâm jêh ri ƀaƀă ka jê̆.”

³⁵ Păng ntĭnh ma phung ƀon lan gŭ ta neh,

³⁶ Păng sŏk pơh mlâm piăng let jêh ri ƀaƀă ka, lah ueh, jêh nây nkê̆ch jêh ri ăn phung oh mon gay khân păng tâm pă ăn ma phung ƀon lan.

³⁷ Lĕ rngôch sa hơm da dê; bu dônh lĕ glo piăng let rmeh bêng pơh bĭ.

³⁸ Rnoh bunuyh jêng puăn rbăn nuyh, mâu kơp ôh bu ur jêh ri kon se.

³⁹ Jêh Păng ăn phung ƀon lan sĭt, Păng ncho plŭng hăn ta nkual Magadan.