Mathay 14 - Nau Brah Ndu Ngơi 2023

Nau bu nkhĭt Y-Yôhan-Ƀaptist

¹ Rnôk nây, hađăch bri dak jê̆ Hêrôt tăng nau lư n'găr ma Brah Yêsu,

² păng lah ma phung kâp kơl păng pô aơ: “Aơ jêng Y-Yôhan-Ƀaptist, bunuyh dâk rêh tay jêh tă bơh nau khĭt, yor nây păng dơi ƀư âk ntil nau mbên khlay ngăn pônây.”

³ Yorlah Hêrôt hŏ nhŭp, chăp jêh krŭng Y-Yôhan tâm ndrung yorlah H'Hêrôdias, ur Y-Philip, oh păng.

⁴ Yorlah Y-Yôhan buay păng: “Hađăch sŏk ur oh may nơm jêng mâu di nau vay ôh.”

⁵ nđâp tơlah hađăch Hêrôt ŭch nkhĭt Y-Yôhan, ƀiălah păng klach ma phung ƀon lan, yorlah khân păng uănh ma Y-Yôhan jêng nơm mbơh lor.

⁶ Ƀiălah, tât nar kah gĭt nar deh Hêrôt, kon bu ur H'Hêrôdias pâl ntalơ̆ panăp phung bu jă râng nhêt sông, ƀư maak nuih n'hâm ma Hêrôt,

⁷ kŏ tât hađăch Hêrôt sơm ton ma păng ăp moh ndơ păng dăn.

⁸ Mê̆ păng nsŭk nsôr, bu ur lah pô aơ: “Ăn ma gâp bôk Y-Yôhan-Ƀaptist n'gân ta ngan grưng.”

⁹ Hađăch rngot ngăn, ƀiălah yor păng ton săk jêh tra năp phung bu jă râng nhêt sông, pôri păng ntrŭnh nau ntăm ăn ma bu ur nây.

¹⁰ Hađăch njuăl bunuyh koh trô ko Y-Yôhan tâm ndrung,

¹¹ jêh ri khân păng n'gân bôk păng tâm ngan grưng, djôt ăn ma bu ur druh nây, jêh ri păng djôt ăn ma mê̆ păng.

¹² Pakơi nây, phung oh mon Y-Yôhan văch, sŏk săk jăn păng gay tâp, jêh ri hăn mbơh nau nây ma Brah Yêsu.

Brah Yêsu njêng piăng let jêng âk tal nguay

¹³ Brah Yêsu tăng nau nây, Păng hăn ncho plŭng, du tă bơh ta nây hăn tât ta ntŭk bri rdah. Tơlah phung âk gĭt, khân păng hăn jâng ntơm bơh lĕ ƀon toyh tĭng Brah Yêsu.

¹⁴ Tơlah luh bơh plŭng, Brah Yêsu saơ bunuyh âk ngăn, Păng yô̆ nđach ma khân păng, jêh ri ƀư bah phung bunuyh ji kuet.

¹⁵ Tât măng, phung oh mon hăn dăch Păng jêh ri lah: “Ntŭk aơ jêng rngot njăp, trôk măng jêh, dăn Kôranh ăn phung ƀon lan aơ plơ̆ sĭt gay khân păng rvăt ndơ sông sa lăp tâm lĕ ƀon jê̆.”

¹⁶ Brah Yêsu lah ma khân păng: “Mâu khlay ôh khân păng hăn; khân may nơm yơh ăn ndơ sông sa ma khân păng.”

¹⁷ Phung oh mon plơ̆ lah pô aơ: “Ta aơ, hên geh knŏng prăm mlâm piăng let jêh ri bar mlâm ka.”

¹⁸ Păng lah ma phung nây: “Njŭn hom văch ta aơ ma Gâp.”

¹⁹ Jêh Păng ntĭnh ma phung ƀon lan nây gŭ ta ndrêch, Păng sŏk prăm mlâm piăng let jêh ri bar mlâm ka, n'gơr măt klơ trôk, lah ueh jêh ri nkê̆ch piăng let ăn ma phung oh mon, khân păng tâm pă ăn ma phung ƀon lan.

²⁰ Lĕ rngôch bunuyh sa hơm da dê. Khân păng dônh sĭt bêng jât ma bar bĭ bêng lĕ piăng let hôm rmeh.

²¹ Phung bunuyh sa geh klăp lah prăm rbăn bunuyh, mâu kơp bu ur jêh ri kon se ôh.

Brah Yêsu hăn ta klơ mpiăt dak

²² Pakơi nây, Brah Yêsu ntrŭt phung oh mon ncho plŭng, hăn lor rgăn ta kơh mpeh kăl tê̆, tâm nôk Păng ăn phung ƀon lan plơ̆ sĭt.

²³ Nôk phung ƀon lan plơ̆ sĭt jêh, Păng hăn hao yôk êng du huê Păng gay mbơh sơm. Tât măng ngo, Păng gŭ êng du huê ta nây.

²⁴ Rnôk nây, plŭng lĕ tât n'gul dak mƀŭt, geh dak rbuh ktang yor sial rlơ̆.

²⁵ Tât puăn tong iăr ndrau tâm măng nây, Brah Yêsu hăn ta klơ mpiăt dak mƀŭt, văch ta phung oh mon.

²⁶ Tơlah saơ Păng hăn ta klơ mpiăt dak mƀŭt, phung oh mon klach hâu ngăn jêh ri lah pô aơ: “Ri jêng chiak nhhu!” Jêh nây khân păng nter hâu ngăn yor klach.

²⁷ Ƀiălah Brah Yêsu lah ro ma khân păng: “Gŭ đăp hom nuih n'hâm, Gâp yơh aơ, lơi klach ôh!”

²⁸ Y-Pêtrôs lah pô aơ: “Ơ Kôranh Brah, tơlah di May, ăn gâp chuat klơ mpiăt dak hăn ta May.”

²⁹ Brah Yêsu lah: “Văch hom ta aơ!” Y-Pêtrôs trŭnh tă bơh plŭng, hăn ta klơ mpiăt dak, văch ta Brah Yêsu.

³⁰ Ƀiălah tơlah păng saơ sial khôm, Y-Pêtrôs klach ngăn, bơi ngâm tâm dak jêh ri nter: “Ơ Kôranh Brah, tâm rklaih gâp ƀă!”

³¹ Ƀât lât, Brah Yêsu yơr ti đŏt Y-Pêtrôs jêh ri lah pô aơ: “Hơi bunuyh geh djê̆ nau chroh, mâm ƀư may đing?”

³² Tơlah Păng jêh ri Y-Pêtrôs hao jêh ta plŭng, phŭt sial gŭ klăk klêm.

³³ Phung gŭ tâm plŭng chon mon mbah Păng jêh ri lah pô aơ: “May jêng Kon Brah Ndu nanê̆ ngăn!”

³⁴ Tơlah lĕ găn tât ta kơh đah tê̆, Brah Yêsu jêh ri phung oh mon hăn tât ta n'gor Gênêsaret.

³⁵ Phung ƀon lan tâm n'gor nây gĭt năl Păng, khân păng njuăl bunuyh hăn mbơh tâm lĕ rngôch ƀon văr jŭm jêh ri bu njŭn leo ma Păng lĕ rngôch phung ji kuet,

³⁶ Khân păng vơl dăn Păng ăn khân păng pah bi knŏng ta chiăng ao Păng; jêh ri lĕ bunuyh hŏ pah ta ao Păng dơi bah da dê.