Mathay 13 - Nau Brah Ndu Ngơi 2023

Nau hôr ma bunuyh srih ntil

¹ Tâm nar nây lĕ, Brah Yêsu luh tă bơh ngih, jêh ri gŭ ta kơh dak mƀŭt.

² Phung ƀon lan âk ngăn tâm rgum jŭm Păng, kŏ tât Păng ncho plŭng gay gŭ, bi phung ƀon lan gŭ dâk ta kơh.

³ Păng lah âk nau ma khân păng ma nau hôr. Păng lah: “Geh du huê bunuyh hăn luh srih grăp.

⁴ Dôl păng srih, ƀaƀă grăp tŭp rŏ trong, geh sĭm văch chôk sa.

⁵ Ƀaƀă grăp êng tŭp ta neh lŭ, knŏng geh djê̆ neh ueh, brôi mâu jru ôh, chăt hon gơnh.

⁶ Ƀiălah nôk geh nar luh, duh nđat păng kro ro, yorlah mâu geh reh.

⁷ Ƀaƀă grăp êng tŭp ta nklang pŭm lok, lok hon âk ƀư in nu păng.

⁸ Ƀaƀă grăp êng tŭp tâm ntŭk neh ueh jêh ri geh play kao: grăp dơi du rhiăng, grăp dơi prao jât, grăp dơi pe jât.

⁹ Mbu nơm geh tôr, rkêng iăt hom!”

Rblang kloh rah vah nau hôr

¹⁰ Phung oh mon hăn dăch ôp Păng: “Mâm ƀư May ngơi ma khân păng ma nau hôr pônây?”

¹¹ Brah Yêsu lah: “Bu ăn jêh ma khân may gĭt rbăng ma nau ndâp ƀon bri hađăch klơ trôk, ƀiălah ma khân păng bu mâu ăn nâm bu pônây.

¹² Yorlah nơm geh jêh, mra ăn ntop gay geh âk rmeh, ƀiălah mbu mâu geh bu mra sŏk lơi lĕ ndơ păng hŏ geh jêh.

¹³ Yor ri, Gâp ngơi ma khân păng ma nau hôr, yorlah khân păng uănh ƀiălah mâu saơ ôh, rkêng tôr mâu tăng ôh, mâu lĕ gĭt rbăng.

¹⁴ N'hêl nanê̆ jêh ma khân păng ƀư ma nau Y-Êsai mbơh lor: ‘Khân may tăng ƀiălah mâu gĭt rbăng; Rle măt uănh ƀiălah mâu saơ.

¹⁵ Yorlah nuih n'hâm phung aơ jêng brơl; Tôr lĕ rngêl, Măt lĕ nhêp, Klach măt lĕ saơ, Tôr lĕ tăng, Nuih n'hâm lĕ gĭt rbăng, Khân păng plơ̆ tay, Jêh ri Gâp mra ƀư bah an.’

¹⁶ Ƀiălah ueh maak yơh ma măt khân may yorlah dơi saơ; ueh maak yơh ma tôr khân may yorlah dơi tăng!

¹⁷ Nanê̆, Gâp mbơh ma khân may, geh âk phung nơm mbơh lor, âk phung sŏng srăng ŭch saơ nau khân may saơ, ƀiălah mâu saơ ôh; ŭch tăng nau khân may tăng ƀiălah mâu tăng ôh.

¹⁸ Pôri, ăn khân may iăt hom nâm bu ntĭt nau hôr ma bunuyh srih grăp.

¹⁹ Mbu tăng nau ngơi ma ƀon bri hađăch klơ trôk ƀiălah mâu gĭt rbăng ôh, brah djơh văch sŏk lơi nau bu nsrih jêh tâm nuih n'hâm păng; nây jêng nâm bu găr ntil tŭp rŏ trong.

²⁰ Grăp ntil tŭp ta neh lŭ jêng bunuyh tăng nau ngơi jêh ri sŏk dơn ro ma nau răm;

²¹ ƀiălah tâm nuih n'hâm păng mâu geh reh ôh, păng gŭ rêh ƀât lât, tơlah geh nau rêh ni, mâu lah nau bu ƀư mhĭk tât yor nau ngơi; păng chalơi ro.

²² Grăp ntil tŭp ta nklang pŭm lok jêng nơm tăng nau ngơi ƀiălah nau rvê ma rnôk aơ, nau kơnh ma nau ndrŏng ƀư ma nau ngơi in nu jêh ri mâu dơi geh play ôh.

²³ Ƀiălah găr ntil nsrih ta neh ueh jêng nơm iăt, gĭt rbăng nau chroh jêh ri geh play: nguay jêng du rhiăng, nguay jêng prao jât, nguay jêng pe jât.”

²⁴ Brah Yêsu lah ma khân păng ma nau hôr êng: “Ƀon bri hađăch klơ trôk tâm rđĭl nâm bu du huê bunuyh srih grăp ueh tâm mir lŏ păng.

²⁵ Ƀiălah dôl lĕ rngôch bunuyh bê̆ch, bunuyh rlăng păng văch nsrih gơ̆ mhĭk tâm ba jêh ri păng du.

²⁶ Tơlah ba chăt hon jêh ri hŏ luh kao, gơ̆ mhĭk nây luh mpơl đŏng.

²⁷ Phung oh mon nơm ngih lŏ nây văch lah pô aơ: ‘Hơi kôranh, may mâu srih grăp ueh tâm mir lŏ may? Mbah tă luh gơ̆ mhĭk aơ mih?’

²⁸ Păng lah: ‘Du huê nơm rlăng yơh ƀư nau nây.’ Phung oh mon plơ̆ lah: ‘May ŭch lĕ hên rôk lơi păng?’

²⁹ Kôranh lah: ‘Mâu dơi, klach lah dôl rôk gơ̆ mhĭk nây, khân may rôk nđâp ma ba.

³⁰ Nđom lĕ bar ntil nây văch ma prêh kŏ tât yan rek; tâm yan rek, gâp mra ntăm ma phung rek rgum sŏk gơ̆ mhĭk lor, jêh ri put tay ăp nchăp jêh ri su lơi; bi ba prăp bun tâm jay gâp.’ ”

Nau hôr ma găr trau jêh ri ndrui

³¹ Brah Yêsu ngơi ntĭt ma khân păng du nau hôr êng: “Ƀon bri hađăch klơ trôk nâm bu du găr trau, bunuyh ri sŏk gay nsrih tâm mir lŏ păng.

³² Grăp dŭt jê̆ ma lĕ rngôch găr ntil, ƀiălah tơlah păng chăt hon jêh păng jêng dŭt toyh tâm lĕ rngôch tơm trau, nau jêng du mlâm tơm si kŏ tât phung sĭm tâm trôk văch ƀư rsuăn ta n'gĭng păng.”

³³ Păng lah ma khân păng ma nau ngơi hôr êng: “Ƀon bri hađăch klơ trôk jêng tâm ban ma ndrui, du huê bu ur ri sŏk pot tâm pe rbâng rnih, ma tât rnih dang hao âk.”

³⁴ Brah Yêsu ntĭt lĕ rngôch nau nây ma phung ƀon lan ma nau hôr, mâu geh moh nau Păng ntĭm nti ma khân păng mâu ngơi đah nau hôr.

³⁵ Pôri, n'hêl nanê̆ jêh nau nơm mbơh lor: “Gâp mra hă mbung gay ngơi lĕ nau hôr, Gâp mra mbơh lĕ nau pôn ndâp ntơm rnôk rhăk njêng neh ntu.”

³⁶ Nôk Păng ăn ma phung ƀon lan plơ̆ sĭt, Brah Yêsu lăp tâm ngih. Phung oh mon hăn dăch, lah ma Păng: “Dăn Kôranh rblang ma hên nau hôr ma gơ̆ mhĭk tâm mir lŏ.”

³⁷ Păng plơ̆ lah: “Nơm srih grăp ueh jêng Kon Bunuyh;

³⁸ mir lŏ jêng neh ntu; grăp ueh jêng phung kon ƀon bri hađăch klơ trôk; gơ̆ mhĭk jêng phung kon brah djơh;

³⁹ nơm rlăng srih grăp gơ̆ mhĭk jêng brah mhĭk; yan rek jêng nar lôch neh ntu; phung rek jêng phung tông mpăr.

⁴⁰ Tâm ban ma bu mra rgum tay gơ̆ mhĭk jêh ri su tâm ŭnh kơt nĕ, bu mra ƀư tâm ban pônây lĕ tâm nar lôch neh ntu.

⁴¹ Kon Bunuyh mra njuăl phung tông mpăr Păng nhŭp lĕ rngôch phung ƀư mhĭk jêh ri lĕ rngôch phung ƀư djơh ngluh lơi bơh ƀon bri hađăch Păng,

⁴² jêh nây mƀăr khân păng tâm ŭnh năk, ta nây mra geh nau nhĭm nhhiăng jêh ri nau rket sêk.

⁴³ Nôk nây, phung sŏng srăng mra geh nchrat ang nâm bu nar tâm ƀon bri hađăch Mbơ̆ khân păng. Mbu nơm geh tôr rkêng iăt hom!”

Nau hôr ma drăp ndơ khlay

⁴⁴ “Ƀon bri hađăch klơ trôk tâm rđĭl nâm bu jay ndơ khlay tâp ndâp lơi tâm du lôk mir lŏ. Du huê bunuyh joi saơ jêh ri pôn ro, păng răm maak sĭt tăch lĕ rngôch ndơ păng geh, gay rvăt mir lŏ nây.”

Nau hôr ma du găr nhong khlay ngăn

⁴⁵ “Ƀon bri hađăch klơ trôk nâm bu du huê bunuyh tăch rgâl joi lŭ rmah khlay ngăn;

⁴⁶ tơlah păng saơ jêh du grăp nhong khlay ngăn, păng hăn tăch lĕ rngôch ndơ păng geh gay rvăt nhong nây.”

Nau hôr ma jal

⁴⁷ “Ƀon bri hađăch klơ trôk tâm ban ma jal bu seng tâm dak mƀŭt, geh nhŭp ăp ntil ka.

⁴⁸ Tơlah jal bêng jêh, bu đŏt ta kơh jêh ri gŭ săch phung ka ueh ăn lăp tâm ra-i, jêh ri mƀăr lơi ntil mhĭk.

⁴⁹ Nâm bu pônây lĕ ta nar lôch neh ntu, phung tông mpăr mra văch, tâm pă phung mhĭk bơh phung sŏng srăng,

⁵⁰ jêh ri mƀăr khân păng tâm ŭnh năk; ta nây mra geh nau nhĭm nhhiăng jêh ri nau rket sêk.”

⁵¹ “Khân may gĭt rbăng lĕ nau aơ?” Phung oh mon lah: “Ơ gĭt rbăng.”

⁵² Păng lah: “Pôri, ăp nơm kôranh nchih samƀŭt gĭt lĕ nau ƀon bri hađăch klơ trôk, nâm bu du huê kôranh ngih ri, djôt leo lĕ ndơ mhe nđâp ndơ ơm luh bơh jay ndơ khlay păng nơm.”

Brah Yêsu sĭt ta ƀon Nasaret

⁵³ Lah Brah Yêsu nkoch jêh bri lĕ nau hôr nây, Păng hăn tă bơh ntŭk nây.

⁵⁴ Păng sĭt ta n'gor Păng nơm, Păng nti lah ma phung ƀon lan tâm ngih rƀŭn, kŏ tât khân păng hih rhâl ngăn jêh ri lah: “Mbah tă luh Păng geh nau blau mĭn nây jêh ri ƀư lĕ nau brah kơt nĕ?

⁵⁵ Di lĕ Păng jêng kon bu klâu du huê trah si? Di lĕ amoh mê̆ păng H'Mari jêh ri phung oh Păng jêng Y-Yakơ, Y-Yôsep, Y-Simôn, Y-Yuđas?

⁵⁶ Di lĕ phung oh bu ur Păng gŭ ndrel ma he ta aơ? Pôri, ntŭk tă luh bunuyh aơ geh lĕ rngôch nau nây?”

⁵⁷ Khân păng chêh prah yor Brah Yêsu. Ƀiălah Păng lah ma khân păng pô aơ: “Du huê nơm mbơh lor bu mưch ma păng knŏng tâm ƀon păng nơm jêh ri tâm ngih păng nơm.”

⁵⁸ Ta nây, Păng mâu ƀư âk ôh nau brah, yorlah khân păng mâu chroh ôh.