Mathay 12 - Nau Brah Ndu Ngơi 2023

Nau pah kan tâm nar saƀat

¹ Rnôk nây, tâm nar saƀat, Brah Yêsu hăn rgăn ta lôk mir ba ƀlê, phung oh mon Păng ji ngot rĭ dĭng khân păng roih ndrŏng ba sa.

² Phung Pharisi saơ kơt nây, lah ma Brah Yêsu: “Uănh hom, phung oh mon May ƀư nau mâu dơi vay ƀư ôh tâm nar saƀat.”

³ Ƀiălah Păng lah: “Khân may ê hŏ răk ma nau Y-Đavit ƀư jêh, tơlah păng jêh ri phung hăn ndrel păng ji ngot lĕ?

⁴ Păng lăp tâm ngih Brah Ndu jêh ri sa piăng let nhhơr, piăng let nây păng jêh ri phung hăn ndrel păng mâu dơi vay sa ôh, knŏng prăp êng ma phung kôranh ƀư brah.

⁵ Mâu lah khân may ê hŏ rŏ tâm ndrom samƀŭt nau vay pô aơ, tâm nar saƀat, phung kôranh ƀư brah tâm ngih brah ƀư tih nau vay tâm nar saƀat ƀiălah mâu geh khan nau tih ôh?

⁶ Ƀiălah Gâp lah ma khân may, ta aơ, geh du huê Nơm yơk lơn ma ngih brah.

⁷ Tơlah khân may gĭt rbăng nâm bu ntĭt trong aơ: ‘Gâp ŭch nau nuih n'hâm yô̆ nđach, mâu di ndơ ƀư brah ôh,’ khân may mâu dơi rmal ôh phung mâu geh nau tih;

⁸ yorlah Kon Bunuyh jêng Kôranh Brah ma nar saƀat.”

Brah Yêsu ƀư bah nau ji tâm nar saƀat

⁹ Brah Yêsu du tă bơh nây, lăp tâm ngih rƀŭn.

¹⁰ Ta nây, geh du huê bunuyh siăr du mpang ti. Khân păng ôp ma Brah Yêsu pô aơ: “Tâm nar saƀat dơi vay lĕ ƀư bah mâu lah mâu?” Khân păng ôp kơt nây, gay ŭch joi nau phong Păng.

¹¹ Păng lah ma khân păng: “Mbu nơm tâm phung khân may geh du mlâm biăp tŭp ta trôm ntu tâm nar saƀat ƀiălah mâu đŏt ôh păng klơ kơh?

¹² Rlau lơn ma du huê bunuyh khlay lơn ma du mlâm biăp! Pôri, tâm nar saƀat dơi vay ƀư nau ueh.”

¹³ Jêh nây Păng lah ma bunuyh siăr ti, “Yơr hom ti may!” Nơm nây yơr ti ro, jêh ri ti păng dơi bah nâm bu ti đah ri.

¹⁴ Phung Pharisi hăn luh, tâm nchră tâm rdâng đah Păng jêh ri joi nau dơi nkhĭt Păng.

¹⁵ Ƀiălah Brah Yêsu gĭt nau nây, Păng du tă bơh nây. Geh âk bunuyh tĭng Păng, jêh ri Păng ƀư bah lĕ rngôch khân păng.

¹⁶ Păng buay mprân khân păng mâu dơi mbơh ma bu gĭt Păng.

¹⁷ Pônây, gay ma nau nơm mbơh lor Y-Êsai mbơh dơi tât di ngăn:

¹⁸ “Aơ jêng oh mon Gâp săch jêh, Nơm Gâp rŏng ngăn ngên, tâm Păng Gâp geh nau maak ngăn. Gâp mra ăn Brah Huêng Ueh Gâp gŭ ta Păng, Păng mra nkoch mbơh nau di ma phung bu năch.

¹⁹ Păng mâu mra tâm rlăch, mâu lah nter huy ôh, Mâu lĕ bu mra tăng bâr Păng rŏ trong sâng.

²⁰ Păng mâu mra nkê̆ch lơi ôh tơm rpho hŏ chah jêh, Mâu nhhât ôh ŭnh kađen bơi nhhât, Kŏ tât Păng ăn nau di tât ma dơi.

²¹ Jêh ri phung padih mra kâp gân tâm amoh Păng.”

Brah Yêsu ƀư bah du huê bunuyh brah mhĭk lơh. – Ƀư tih tât Brah Huêng Ueh. – Tơm si jêh ri play

²² Nôk nây, bu njŭn leo ma Brah Yêsu du huê bunuyh brah mhĭk lơh, chieh măt jêh ri mlo; Păng ƀư bah khân păng jêh ri ƀư ăn ma bunuyh nây ngơi jêh ri dơi saơ ang.

²³ Lĕ rngôch phung ƀon lan hih rhâl da dê, lah pô aơ: “Di lĕ bunuyh aơ jêng kon Y-Đavit.”

²⁴ Ƀiălah jêh phung Pharisi tăng pôri khân păng lŏ lah: “Bunuyh nây mâu dơi mprơh brah mhĭk, tơlah mâu tâm kôranh brah mhĭk Bêlsêbul.”

²⁵ Brah Yêsu gĭt nau mĭn khân păng jêh ri lah: “Ƀon bri hađăch tâm nkhah tâm pă păng nơm mra rai yot, ăp ƀon mâu lah ăp ngih tâm nkhah tâm pă păng nơm mâu mra dơi gŭ ƀaƀơ ôh.

²⁶ Tơlah Satan mprơh Satan nơm păng tâm nkhah ndrăng păng nơm; mâm ƀon bri hađăch păng dơi dâk nâp?

²⁷ Tơlah Gâp mprơh brah mhĭk tâm amoh Bêlsêbul, bi phung kon khân may tă mbu nơm mprơh brah mhĭk? Yor nây, khân păng nơm yơh mra phat dôih khân may.

²⁸ Bi tơlah Gâp mprơh phung brah mhĭk tâm amoh Brah Huêng Ueh Brah Ndu, pôri ƀon bri hađăch Brah Ndu hŏ tât ma khân may jêh.

²⁹ Mâu lah, mâm ƀư bu dơi lăp tâm ngih du huê bunuyh ktang gay pit drăp ndơ păng, tơlah bu mâu chăp lơi bunuyh ktang nây lor? Ăn păng chăp bunuyh nây, jêh nây mơ dơi ntŭng ndô ndơ tâm ngih păng.

³⁰ Mbu nơm mâu gŭ ndrel ma Gâp jêng tâm rdâng đah Gâp; mbu nơm mâu tâm rnglăp đah Gâp jêng chah rai pru pra.

³¹ Pôri, Gâp lah ma khân may: Lĕ rngôch nau tih jêh ri nau ngơi sưr rlau bu mra yô̆ an ma kon bunuyh; ƀiălah nau ngơi sưr rlau đah Brah Huêng Ueh bu mâu mra dơi yô̆ ôh.

³² Mbu nơm ngơi mhĭk ma Kon Bunuyh mra dơi yô̆ an; ƀiălah mbu nơm ngơi mhĭk ma Brah Huêng Ueh, nau tih păng bu mâu mra dơi yô̆ ôh tâm rnôk aơ mâu lah tâm rnôk pakơi taơ.”

³³ “Mâu lah tơm si ueh play păng ueh tâm ban lĕ, mâu lah tơm si mhĭk play păng mhĭk lĕ; yorlah bu dơi gĭt năl tơm si ta play păng.

³⁴ Hơi phung kon bêh rmâng! Khân may phung djơh mhĭk, mâm dơi ngơi nau ueh? Yorlah bêng tâm nuih n'hâm rĭ dĭng mbung luh ngơi.

³⁵ Bunuyh ueh mpơl ndơ ueh tă bơh ntŭk prăp nau ueh păng; bi bunuyh mhĭk mpơl ndơ mhĭk tă bơh ntŭk prăp nau mhĭk.

³⁶ Ƀiălah Gâp mbơh ma khân may, tâm nar phat dôih, bu mra mbơh lĕ rngôch nau păng ngơi mâu khlay.

³⁷ Yorlah nau ngơi, may mra dơi kơp sŏng srăng; yor nau ngơi đŏng, may mra geh nau tâm rmal.”

Nau mbên khlay ma Y-Yôna

³⁸ Nôk nây geh ƀaƀă phung kôranh nchih samƀŭt jêh ri phung Pharisi lah ma Păng: “Hơi Nơm Nti ơi, hên ŭch uănh May ƀư du nau mbên khlay.”

³⁹ Păng plơ̆ lah: “Phung ndŭl mpôl ƀai, văng tĭr aơ, joi du ntil nau mbên khlay, ƀiălah mâu mra geh nau mbên khlay êng ma khân may ôh, knŏng nau mbên khlay ma nơm mbơh lor Y-Yôna.

⁴⁰ Yorlah nâm bu Y-Yôna gŭ tâm ndŭl ka toyh pe nar pe măng, pônây lĕ, Kon Bunuyh mra gŭ tâm trôm neh pe nar pe măng.

⁴¹ Tâm nar phat dôih, phung Ninive mra dâk ndrel ma bunuyh rnôk aƀaơ aơ jêh ri tâm rmal khân păng, yorlah phung ƀon lan nây hŏ tăng jêh nau Y-Yôna mbơh nkoch jêh ri rmal nau tih, ƀiălah ta aơ geh du huê bunuyh toyh lơn ma Y-Yôna!

⁴² Tâm nar phat dôih, hađăch bu ur mpeh pa dâng mra dâk hăn tâm rdâng đah bunuyh rnôk aƀaơ aơ jêh ri phong khân păng, yorlah păng văch tă bơh bôk neh ntu tât lôch ŭch iăt nau blau mĭn hađăch Salômôn; ƀiălah ta aơ geh du huê toyh lơn ma hađăch Salômôn!

⁴³ Tơlah brah ƀơ̆ ƀơch luh bơh du huê bunuyh, păng hăn rgăn lĕ ntŭk kro đang, joi ntŭk rlu, ƀiălah mâu dơi joi ôh.

⁴⁴ Pôri păng lah: ‘Gâp mra plơ̆ sĭt ta ngih gâp, ntŭk gâp mhe du luh jêh.’ Tơlah păng plơ̆ sĭt tât, saơ ngih hŏng, pih rep kloh jêh, dăp ăn ueh,

⁴⁵ păng hăn ro jêh ri sŏk tay pơh brah mhĭk êng janh ƀai lơn, ndrel lăp gŭ ta nây. Pôri, tâm nau pakơi bunuyh nây jêng djơh lơn ntơm saơm. Phung ndŭl mpôl ƀai aơ mra jêng tâm ban lĕ.”

Mê̆ jêh ri phung oh Brah Yêsu

⁴⁶ Nôk Brah Yêsu hôm gŭ ngơi ma phung âk nây, mê̆ Păng jêh ri phung oh Păng gŭ padih jêh ri ŭch ngơi đah Păng.

⁴⁷ Geh du huê lah ma Păng pô aơ: “Aơ mê̆ jêh ri phung oh May gŭ padih, ŭch ngơi đah May.”

⁴⁸ Păng lah: “Mbu nơm mê̆ Gâp, mbu nơm phung oh Gâp?”

⁴⁹ Jêh ri Păng yơr ti nchŏng ma phung oh mon jêh ri lah: “Aơ jêng phung mê̆ Gâp jêh ri phung oh Gâp!

⁵⁰ Yorlah mbu nơm ƀư tĭng nâm nau Mbơ̆ Gâp tâm trôk ŭch, păng nây yơh jêng oh nâu, oh ruh jêh ri jêng mê̆ Gâp.”