Mathay 11 - Nau Brah Ndu Ngơi 2023

¹ Nôk Brah Yêsu hŏ ntĭm nti jât ma bar kôranh oh mon lôch jêh, Păng du tă bơh ntŭk nây gay ntĭm nti jêh ri mbơh nkoch tâm lĕ ƀon khân păng.

Nau Y-Yôhan-Ƀaptist ôp

² Y-Yôhan gŭ tâm ndrung tăng lư ma lĕ nau kan Brah Krist, rĭ dĭng păng njuăl phung oh mon păng hăn văch ôp Brah Yêsu pô aơ:

³ “Di lĕ Nơm Nti jêng Nơm mra văch ƀơh, mâu lah hên kâp nơm êng đŏng?”

⁴ Brah Yêsu plơ̆ lah: “Plơ̆ sĭt nkoch tay hom ma Y-Yôhan lĕ nau khân may tăng jêh ri saơ:

⁵ Bunuyh chieh măt dơi saơ ang, bunuyh rvĕn dơi hăn, bunuyh phŭng sa dơi kloh, bunuyh tê̆k dơi tăng, bunuyh khĭt dơi dâk rêh tay, jêh ri bunuyh o ach dơi tăng Nau Mhe Mhan Ueh.

⁶ Ueh maak yơh ma mbu nơm mâu chêh prah ôh yor Gâp!”

⁷ Dôl khân păng sĭt, Brah Yêsu ntơm ngơi đah phung âk ma Y-Yôhan pô aơ: “Moh ndơ khân may hŏ uănh tâm bri rdah? Du tơm rpho geh sial khôm n'gơ lĕ?

⁸ Moh ndơ khân may hăn uănh? Di lĕ uănh du huê bunuyh nsoh ao dŭt ueh? Ri, phung nsoh ao dŭt ueh gŭ tâm ngih hađăch.

⁹ Moh ndơ khân may hăn uănh? Di lĕ ŭch uănh du huê nơm mbơh lor ƀơh? Di ngăn, Gâp lah ma khân may, geh bunuyh rlau lơn ma nơm mbơh lor đŏng.

¹⁰ Geh nau nchih ma bunuyh nây pô aơ: ‘Aơ, Gâp njuăl nơm mbơh Gâp hăn tanăp May, Bunuyh nây mra nkra trong lor ma May.’

¹¹ Nanê̆, Gâp lah ma khân may, tâm phung bunuyh deh tă bơh bu ur, mâu geh nơm toyh lơn ma Y-Yôhan-Ƀaptist ôh; ƀiălah, nơm jê̆ lơn tâm ƀon bri hađăch klơ trôk jêng toyh lơn ma păng.

¹² Ntơm bơh nar Y-Yôhan-Ƀaptist tât aƀaơ, ƀon bri hađăch klơ trôk geh nau n'grŭn mpet hâu ngăn, jêh ri phung djơh mhǐk ŭch pit sŏk ƀon bri hađăch nây.

¹³ Yorlah lĕ rngôch phung nơm mbơh lor jêh ri nau vay hŏ lah nau mbơh lor tât ta rnôk Y-Yôhan.

¹⁴ Tơlah khân may ŭch dơn nau aơ, păng yơh Y-Êli, nơm mra văch.

¹⁵ Mbu nơm geh tôr, iăt hom!

¹⁶ Mbu đah Gâp mra tâm rđĭl phung bunuyh rnôk aƀaơ aơ? Khân păng tâm ban ma phung kon se gŭ ta nklang ngih tăch drăp, nter ma mĭt jiăng khân păng jêh ri lah:

¹⁷ ‘Hên uh n'hôm, ƀiălah khân may mâu pâl ntalơ̆ ôh; Hên mprơ nau mprơ rngot, ƀiălah khân may mâu nhĭm nhhiăng ôh.’

¹⁸ Yorlah Y-Yôhan văch, mâu sông sa mâu nhêt, pôri bu lah: ‘Y-Yôhan geh brah mhĭk lơh.’

¹⁹ Kon Bunuyh văch, sông sa jêh ri nhêt pôri khân may lah tay: ‘Ri, bunuyh kơnh sông sa, kơnh nhêt; mĭt jiăng đah phung riu pi jêh ri phung tih!’ Ƀiălah, nau blau mĭn dơi n'gang ma lĕ nau kan păng ƀư.”

Nduyh ma phung ƀon dăng nuih n'hâm

²⁰ Yorlah tâm phung ƀon Brah Yêsu hŏ ƀư jêh âk nau khlay, jêh ri khân păng mâu rmal ôh nau tih khân păng, pôri Brah Yêsu ntơm nduyh ma khân păng pô aơ:

²¹ “Rêh ni ngăn ma may, ƀon Kôrasin! Rêh ni ngăn ma may, ƀon Ƀêtsaiđa! Yorlah tơlah nau mbên khlay ƀư jêh ta nklang khân may dơi ƀư nâm bu ta ƀon Tyre jêh ri ƀon Sidôn pôri khân păng hŏ nsoh ao ƀau, ndô buh jêh ri rmal nau tih jŏ jêh.

²² Pôri Gâp lah ma khân may, tât nar phat dôih, ƀon Tyre jêh ri ƀon Sidôn mra geh nau tâm rmal n'gơch lơn ma khân may.

²³ Bi may, ƀon Kapernum, bu n'hao jêh may tât ta klơ trôk? Mâu, may mra ntrŭnh tâm dâng tât ta ƀon phung khĭt. Yorlah nau mbên khlay ƀư jêh ta nklang may, tơlah nau nây dơi ƀư ta ƀon Sôdôm ƀon nây ăt hôm tât ta nar aơ.

²⁴ Yor ri, Gâp lah ma khân may, tâm nar phat dôih, ƀon Sôdôm mra geh nau tâm rmal n'gơch lơn khân may.”

Nau Mhe Mhan Ueh mpơl ma phung kon se jê̆

²⁵ Nôk nây Brah Yêsu ngơi pô aơ: “Ơ Mbơ̆, Kôranh Brah trôk jêh ri neh ntu, Gâp tâm rnê ma Mbơ̆, yorlah Mbơ̆ pôn jêh lĕ nau nây ma bunuyh blau mĭn, bunuyh gĭt rbăng, ƀiălah tâm mpơl jêh ma phung kon se jê̆.

²⁶ Nanê̆, ơ Mbơ̆, yorlah nau aơ ƀư ueh nau mĭn Mbơ̆ ŭch.

²⁷ Mbơ̆ Gâp jao jêh lĕ rngôch nau ma Gâp, padih Mbơ̆, mâu geh bu gĭt Kon. Padih Kon jêh ri mbu moh Kon ŭch tâm mpơl pôri ăt mâu dơi bu gĭt Mbơ̆.

²⁸ Hơi lĕ rngôch bunuyh rgănh jêh ri anh jâk, văch hom ta Gâp, Gâp mra ăn khân may rlu.

²⁹ Gâp geh nuih n'hâm rdơ̆ rbăn, dêh rhêt; ăn khân may anh ndơ mbăk Gâp jêh ri nti tă bơh Gâp ri mơ huêng khân may mra rlu.

³⁰ Yorlah ndơ mbăk Gâp rbăn jêh ri anh ndơ Gâp n'gơch dơm.”