Mathay 10 - Nau Brah Ndu Ngơi 2023

Brah Yêsu săch jât ma bar kôranh oh mon

¹ Brah Yêsu kuăl jât ma bar oh mon Păng văch, ăn ma khân păng nau dơi gay mprơh brah ƀơ̆ ƀơch, jêh ri dơi ƀư bah nau ji ăp ntil.

² Amoh săk jât ma bar kôranh oh mon: Lor lơn jêng Y-Simôn, rnha jêng Y-Pêtrôs, jêh ri Y-Andrê, oh păng; Y-Yakơ, kon Y-Sêƀêđê, jêh ri Y-Yôhan, oh păng;

³ Y-Philip jêh ri Y-Ƀartôlômi; Y-Thômas jêh ri Y-Mathiơ, nơm riu pi; Y-Yakơ, kon Y-Alphê, jêh ri Y-Thadê.

⁴ Y-Simôn, bunuyh n'gor Kananêan, jêh ri Y-Yuđas Iskariôt, nơm rlăng Păng.

⁵ Brah Yêsu njuăl jât ma bar kôranh oh mon hăn jêh ri ntĭnh ma khân păng pô aơ: “Lơi hăn ôh tâm n'gor phung bu năch, mâu đŏng lăp tâm ƀon phung Samari;

⁶ ƀiălah ueh lơn hăn ta phung biăp nhhơt tâm ngih Israel.

⁷ Nôk hăn trong, mbơh nkoch pô aơ: ‘Ƀon bri hađăch klơ trôk dăch tât jêh!’

⁸ Ăn khân may ƀư bah bunuyh ji kuet, ƀư ăn ma bunuyh khĭt dâk rêh tay, ƀư kloh bah ma phung bunuyh geh phŭng sa, jêh ri mprơh brah mhĭk. Khân may hŏ dơn jêh dơm dam, ăn hom ma bu dơm dam đŏng.

⁹ Lơi djôt ndrel mah, mâu lah prăk tâm rse vân bŭt ôh;

¹⁰ lơi djôt dŭng hăn trong, mâu lah bar blah ao, mâu lah ntâu jot mâu lah mâng jra ôh, yorlah bunuyh pah kan păng khư geh ndơ sông sa.

¹¹ Dôl lăp tâm ƀon toyh mâu lah ƀon jê̆, sek ôp hom ta nây geh moh mbu jêng nơm nanê̆ ngăn, jêh nây gŭ hom ta ntŭk nây tât hăn luh du.

¹² Moh jây he lăp, ăn lah nau đăp mpăn ma jây nây;

¹³ tơlah ngih nây dơi khư, nau đăp mpăn khân may mra tât ta khân păng; tơlah mâu, nau đăp mpăn nây mra plơ̆ sĭt ma phung kon.

¹⁴ Tơlah mbu nơm mâu vơt dơn, mâu lah mâu iăt nau khân may tơlah luh tă bơh ngih nĕ mâu lah ƀon nây, rtuh hom neh muy hŏ krêp ta jâng phung khân may.

¹⁵ Nanê̆, Gâp lah ma khân may, tât nar phat dôih, ƀon Sôdôm jêh ri ƀon Gômôrơ mra geh nau tâm rmal n'gơch lơn ma ƀon nây.”

¹⁶ “Aơ, Gâp njuăl khân may hăn nâm bu biăp ta nklang phung so bri. Pôri ăn khân may blau mĭn nâm bu bêh, jêh ri mleh nâm bu plŭk.

¹⁷ Njrăng hom bunuyh ta neh ntu, yorlah khân păng mra nhŭp jao khân may ma Mpôl Kôranh Phat Dôih jêh ri mra dong khân may tâm ngih rƀŭn.

¹⁸ Yorlah Gâp, bu mra njŭn khân may tanăp phung kôranh toyh chiă uănh jêh ri phung hađăch, gay mbơh ma khân păng jêh ri phung bu năch.

¹⁹ Ƀiălah tơlah nhŭp njŭn khân may, lơi rvê ôh khân may mra ngơi mâm nau, mâu lah moh nau mra lah; tâm mông nây, lĕ nau khân may ngơi mra mpơl ma khân may.

²⁰ Yorlah mâu di khân may nơm ngơi ôh, ƀiălah Brah Huêng Ueh Mbơ̆ khân may mra ngơi an khân may.

²¹ Nâu mra jao oh păng nơm ma bu gay ƀư nkhĭt, mbơ̆ mra jao kon păng nơm, phung kon mra plơ̆ dâk tâm rdâng đah mê̆ mbơ̆ jêh ri ƀư ăn ma khân păng khĭt.

²² Lĕ rngôch bunuyh mra tâm rmot ma khân may yor amoh Gâp, ƀiălah mbu nơm nâp nuih n'hâm tât lôch dŭt mra dơi rklaih.

²³ Tơlah bu ƀư mhĭk ma khân may tâm ƀon nây, hăn du hom ta ƀon ri; yorlah nanê̆, Gâp lah ma khân may, khân may ê hŏ lam ôh lĕ ƀon Israel nôk nây Kon Bunuyh plơ̆ văch jêh.”

²⁴ Oh mon mâu rlau lơn nơm nti, oh mon mâu rlau lơn kôranh păng.

²⁵ Oh mon dơi jêng kôranh nơm nti, oh mon jêng nâm bu kôranh păng hŏ rĭng jêh. Kôranh ngih bu rnha jêng Bêlsêbul, rlau lơn ma phung tâm ngih nây!

²⁶ Pôri, khân may lơi klach ôh khân păng; yorlah mâu geh ôh moh ndơ pôn mo mâu mpơl; mâu geh ôh moh ndơ ndâp mâu ăn bu gĭt.

²⁷ Yor nây moh nau Gâp lah ma khân may tâm nau ngo, mbơh hom tâm ntŭk ang; moh nau khân may tăng ngơi huêt jêh êp tôr khân ay may, mbơh hom ta klơ chor ngih.

²⁸ Lơi klach ôh ma phung nkhĭt săk jăn ƀiălah mâu dơi nkhĭt huêng; ƀiălah ăn khân may klach ma nơm dơi nkhĭt huêng nđâp ma săk jăn tâm ndrung ŭnh.

²⁹ Bar mlâm sĭm srai mâu di knŏng tăch du rêl lĕ? Ƀiălah aƀaơ ri, mâu mâp geh ôh du mlâm sĭm tŭp ta neh tơlah mâu tĭng nau Mbơ̆ may ŭch.

³⁰ Nđâp ma sŏk ta klơ bôk khân may dơi kơp lĕ jêh.

³¹ Yor ri, lơi klach ôh, yorlah khân may khlay lơn ma âk phung sĭm srai.

³² Yor nây, mbu nơm mbơh Gâp tanăp lĕ rngôch bunuyh, Gâp ăt mra mbơh bunuyh nây tanăp Mbơ̆ Gâp tâm trôk;

³³ ƀiălah mbu nơm dun Gâp tra năp lĕ rngôch bunuyh, Gâp ăt mra dun khân păng tanăp Mbơ̆ Gâp ta klơ trôk.

³⁴ Lơi mĭn Gâp tât gay djôt leo nau đăp mpăn ma neh ntu. Gâp tât, mâu di djôt leo nau đăp mpăn, ƀiălah tak đao.

³⁵ Gâp văch djôt nau tâm nkhah kon bu klâu đah mbơ̆, kon bu ur đah mê̆ păng, ƀăn păng đah po bu ur;

³⁶ jêh ri phung rlăng jêng bunuyh tâm ngih vâl may nơm.

³⁷ Mbu nơm rŏng ma mê̆ mâu lah mbơ̆ âk lơn ma Gâp, păng mâu khư ma gâp ôh; mbu nơm rŏng kon bu klâu mâu lah kon bu ur păng âk lơn ma gâp, păng nây mâu khư ma Gâp ôh.

³⁸ Mbu nơm mâu tuy si tâm rkăng păng nơm tĭng Gâp, păng nây mâu khư ma Gâp ôh.

³⁹ Mbu nơm joi nau rêh păng nơm mra roh; ƀiălah mbu nơm yor Gâp roh nau rêh păng nơm mra joi dơi đŏng.

⁴⁰ “Mbu nơm rom khân may jêng rom Gâp, mbu nơm rom Gâp jêng rom Nơm hŏ njuăl Gâp.

⁴¹ Mbu nơm rom du huê nơm mbơh lor yorlah păng jêng nơm mbơh lor, păng mra sŏk dơn nau nkhôm tâm nơm mbơh lor, mbu nơm rom du huê bunuyh sŏng srăng, yorlah păng jêng bunuyh sŏng srăng, mra sŏk dơn nau nkhôm tâm bunuyh sŏng srăng.

⁴² Mbu nơm ăn ma du huê tâm phung jê̆ aơ nhêt du kachok dak me, yorlah bunuyh nây jêng oh mon Gâp; nanê̆ Gâp lah ma khân may, bunuyh nây mâu mra roh nau nkhôm ma păng ôh.”