Mathay 1 - Nau Brah Ndu Ngơi 2023

Amoh phung chô yau jêh ri nau jŭr deh Brah Yêsu Krist ( 1:1 – 2:23 ) Amoh phung chô yau Brah Yêsu Krist

¹ Amoh phung chô yau Brah Yêsu Krist, kon sau Y-Đavit, kon sau Y-Abraham.

² Y-Abraham jêng mbơ̆ Y-Isăk; Y-Isăk jêng mbơ̆ Y-Yakôp; Y-Yakôp jêng mbơ̆ Y-Yuđa jêh ri phung nâu oh păng;

³ Y-Yuđa đah ur păng H'Tamar geh kon bu klâu Y-Pêres jêh ri Y-Sara; Y-Pêres jêng mbơ̆ Y-Hesrôn; Y-Hesrôn jêng mbơ̆ Y-Aram;

⁴ Y-Aram jêng mbơ̆ Y-Aminadap; Y-Aminadap jêng mbơ̆ Y-Nahsôn; Y-Nahsôn jêng mbơ̆ Y-Salmôn;

⁵ Y-Salmôn đah ur păng H'Rahap, geh Y-Bôas; Y-Bôas đah ur păng H'Rut, geh Y-Ôbet; Y-Ôbet jêng mbơ̆ Y-Yêsê.

⁶ Y-Yêsê jêng mbơ̆ hađăch Đavit. Hađăch Đavit đah ur Y-Uri, geh Y-Salômôn.

⁷ Y-Salômôn jêng mbơ̆ Y-Rôbôam. Y-Rôbôam jêng mbơ̆ Y-Abia; Y-Abia jêng mbơ̆ Y-Asa;

⁸ Y-Asa jêng mbơ̆ Y-Jôsaphat; Y-Jôsaphat jêng mbơ̆ Y-Jôram; Y-Jôram jêng mbơ̆ Y-Usia;

⁹ Y-Usia jêng mbơ̆ Y-Jôtham. Y-Jôtham jêng mbơ̆ Y-Ahas; Y-Ahas jêng mbơ̆ Y-Hêsêkia;

¹⁰ Y-Hêsêkia jêng mbơ̆ Y-Manasê. Y-Manasê jêng mbơ̆ Y-Amôn; Y-Amôn jêng mbơ̆ Y-Jôsia;

¹¹ Y-Jôsia jêng mbơ̆ Y-Jêkônia jêh ri ma phung nâu oh păng; lor rơh nau ƀư dĭk tâm bri Babilôn.

¹² Jêh bu nhŭp leo phung Israel jêng dĭk tâm bri Babilôn, Y-Jêkônia jêng mbơ̆ Y-Salathiel. Y-Salathiel jêng mbơ̆ Y-Sôrôƀaƀel;

¹³ Y-Sôrôƀaƀel jêng mbơ̆ Y-Abiut; Y-Abiut jêng mbơ̆ Y-Êliakim. Y-Êliakim jêng mbơ̆ Y-Asôr.

¹⁴ Y-Asôr jêng mbơ̆ Y-Sadôk; Y-Sadôk jêng mbơ̆ Y-Akim. Y-Akim jêng mbơ̆ Y-Êliut;

¹⁵ Y-Êliut jêng mbơ̆ Y-Êlêasar. Y-Êlêasar jêng mbơ̆ Y-Mathan; Y-Mathan jêng mbơ̆ Y-Yakôp;

¹⁶ Y-Yakôp jêng mbơ̆ Y-Yôsep jêng sai H'Mari; H'Mari deh ma Brah Yêsu, kuăl jêng Brah Krist.

¹⁷ Pôri, ntơm bơh Y-Abraham tât ta Y-Đavit geh lĕ rngôch jât ma puăn rô̆; ntơm bơh Y-Đavit tât rnôk bu nhŭp leo phung Israel jêng dĭk tâm bri Babilôn geh jât ma puăn rô̆; jêh ri ntơm bơh rnôk bu nhŭp leo phung Israel jêng dĭk tâm bri Babilôn tât ma Brah Krist geh jât ma puăn rô̆ đŏng.

Kôranh Brah Yêsu jŭr deh

¹⁸ Nau jŭr deh Brah Yêsu Krist hŏ nkoch kơt aơ: H'Mari, mê̆ Păng, hŏ ƀư ndrôi jêh đah Y-Yôsep, ƀiălah êlor khân păng gŭ ndrel păng ntreo ma Brah Huêng Ueh.

¹⁹ Y-Yôsep, sai păng jêng du huê bunuyh sŏng srăng, mâu ŭch geh nau bêk prêng ôh yor ri păng ŭch lơi ndrôi păng ma nau ndâp.

²⁰ Dôl nôk Y-Yôsep gŭ mĭn nau nây geh du huê tông mpăr Kôranh Brah mpơl ma păng tâm nau mbơi jêh ri lah pô aơ: “Hơi Y-Yôsep, kon sau Y-Đavit, lơi may klach ôh sŏk H'Mari jêng ur may, yorlah kon păng ntreo tă bơh Brah Huêng Ueh yơh ăn.

²¹ Păng mra deh du huê kon bu klâu; may mra tâm amoh Yêsu, yorlah kon nây mra tâm rklaih phung ƀon lan păng nơm bơh nau tih.”

²² Lĕ nau nây tât geh gay di ngăn đah nau Kôranh Brah hŏ ngơi jêh ma nơm mbơh lor:

²³ “Aơ, du huê bu ur druh mra bă ntreo, jêh ri deh du huê kon bu klâu, Jêh ri bu mra ntơ amoh kon bu klâu nây jêng Êmanuel,” nâm bu ntĭt Brah Ndu gŭ ndrel he.

²⁴ Y-Yôsep kah rngăl bê̆ch, păng ƀư tĭng nâm nau tông mpăr Kôranh Brah hŏ ntăm jêh ri sŏk H'Mari jêng ur păng,

²⁵ ƀiălah păng mâu geh bê̆ch ndrel bu ur bu klâu ôh, kŏ tât ur păng deh du huê kon bu klâu jêh ri păng tâm amoh jêng YÊSU.