Markôs 9 - Nau Brah Ndu Ngơi 2023

¹ Păng lah ma phung oh mon: “Nanê̆ ngăn, Gâp lah khân may, geh ƀaƀă bunuyh gŭ ta aơ mâu mra khĭt ôh lor ma saơ ƀon bri hađăch Brah Ndu tât ma nau dơi.”

Nau Brah Yêsu rgâl săk jăn

² Prao nar pakơi, Brah Yêsu jă êng Y-Pêtrôs, Y-Yakơ, jêh ri Y-Yôhan hao klơ yôk prêh, jêh ri Păng rgâl săk jăn tanăp khân păng.

³ Kho ao Păng plăch jêng chrat ang jêh ri nglang ngăn ngên kŏ tât neh ntu aơ mâu dơi geh bunuyh blau mhĭng nglang tâm ban pônây.

⁴ Y-Êli jêh ri Y-Môis mpơl gay ngơi ndrel đah Brah Yêsu.

⁵ Y-Pêtrôs lah ma Brah Yêsu: “Hơi Nơm Nti, he gŭ ta aơ ueh ngăn; dăn ăn hên ndâk pe mlâm vâl bok: du mlâm ma May, du mlâm ma Y-Môis jêh ri du mlâm ma Y-Êli.”

⁶ Yorlah lĕ pe nuyh khân păng klach krit ngăn da dê rĭ dĭng Y-Pêtrôs mâu gĭt moh nau păng lah.

⁷ Jêh nây geh du ndâr tŭk nkŭm khân păng; geh bâr ngơi luh bơh tâm ndâr tŭk pô aơ: “Aơ jêng Kon Gâp rŏng ngăn ngên, iăt hom nau Păng!”

⁸ Ƀât lât, phung oh mon uănh văr jŭm, mâu hôm saơ bunuyh, knŏng hôm du huê Brah Yêsu dơm gŭ ndrel ma khân păng.

⁹ Tơlah Păng ndrel ma phung oh mon jŭr tă bơh yôk, Păng ntăm ma khân păng mâu dơi nkoch tay nau aơ ma bu ôh lĕ ntil nau khân păng hŏ saơ jêh, kŏ tât nôk Kon Bunuyh dâk rêh tay tă bơh nau khĭt.

¹⁰ Phung oh mon kah gĭt nau nây jêh ri ôp ndrăng khân păng “nau dâk rêh tay tă bơh nau khĭt” mâm bu rnha?

¹¹ Jêh nây khân păng ôp ma Brah Yêsu: “Mâm ƀư phung kôranh nchih samƀŭt lah pô aơ Y-Êli văch lor?”

¹² Păng plơ̆ lah: “Nanê̆ Y-Êli mra văch lor gay njêng tay lĕ rngôch nau. Mâm nau bu nchih ma Kon Bunuyh pô aơ Păng mra dơn âk nau rêh ni jêh ri bu ƀư nau mhĭk?

¹³ Ƀiălah Gâp lah ma khân may gĭt, Y-Êli văch jêh, jêh ri bu ƀư jêh ma păng tĭng nau khân păng ŭch, di nâm bu nau bu nchih jêh di ma păng kơt nây.”

Brah Yêsu ƀư bah du huê kon se brah mhĭk lơh

¹⁴ Nôk Brah Yêsu jêh ri pe nuyh oh mon plơ̆ tât ta ntŭk phung oh mon êng, saơ phung bunuyh âk ngăn gŭ nchueng jŭm khân păng; geh ƀaƀă kôranh nchih samƀŭt tâm rlăch đah khân păng.

¹⁵ Nôk nây đŏng saơ Păng, lĕ rngôch phung ƀon lan hih rhâl ngăn, nchuăt hăn ran mbah Brah Yêsu.

¹⁶ Păng ôp ma khân păng: “Moh nau khân may tâm rlăch đah phung oh mon aơ?”

¹⁷ Du huê tâm phung âk nây plơ̆ lah: “Hơi Nơm Nti, gâp njŭn leo kon bu klâu gâp ma May. Păng geh brah mhĭk mlo lăp,

¹⁸ ăp tơ̆ brah mhĭk lăp, păng ƀư ma păng cha lôt ta neh, luh mpŭnh dak diu trôm mbung, rket sêk, jêh nây dăng săk jăn păng. Gâp dăn jêh ma phung oh mon Nơm Nti mprơh brah mhĭk nây, ƀiălah khân păng mâu dơi mprơh ôh.”

¹⁹ Brah Yêsu plơ̆ lah: “Hơi ndŭl mpôl mâu chroh ri, ndah jŏ Gâp mra gŭ ndrel đah khân may? Ndah jŏ Gâp mra nsrôih dơn đah khân may? Njŭn leo hom kon se nây ma Gâp.”

²⁰ Khân păng njŭn leo kon se nây ma Păng. Nôk nây saơ Brah Yêsu, ƀât lât ta nây brah mhĭk rgu ktang kon se. Păng cha lôt ta neh, plăch nkŭp mplơt, mpŭnh dak diu trôm mbung.

²¹ Brah Yêsu ôp mbơ̆ păng: “Ndah hŏ jŏ păng geh nau nây?” Păng lah: “Ntơm bơh păng hôm jê̆.

²² Brah mhĭk âk tơ̆ klŭp mƀăr păng tâm ŭnh, tâm dak gay nkhĭt păng. Ƀiălah tơlah Nơm Nti dơi ƀư, dăn yô̆ nđach ma hên jêh ri sâm kơl hên ƀă!”

²³ Brah Yêsu lah: “Mâm ƀư lah ‘tơlah Nơm Nti dơi ƀư’? Mbu nơm chroh mra dơi da dê ma lĕ ntil kan.”

²⁴ Ƀât lât mbơ̆ kon se nây nter pô aơ: “Gâp chroh yơh, dăn kơl nau mâu chroh gâp!”

²⁵ Tơlah saơ phung ƀon lan âk ri nchuăt văch tât, Brah Yêsu nduyh brah mhĭk jêh ri lah: “Hơi brah mhĭk mlo jêh ri tê̆k ri, Gâp ntrŭnh ma may luh du tă bơh kon se jê̆ aơ, mâu đŏng dơi lăp tâm păng!”

²⁶ Brah mhĭk nter, rgu ktang kon se jêh ri păng luh; kon se nây uănh nâm bu du săk jăn khĭt, rĭ dĭng âk bunuyh lah pô aơ: “Păng khĭt jêh!”

²⁷ Ƀiălah Brah Yêsu kuăn ta ti păng, sâm rdâk păng dâk, jêh ri păng dâk ro.

²⁸ Brah Yêsu lăp jêh tâm ngih, phung oh mon ôp êng Păng: “Mâm ƀư hên mâu dơi mprơh brah mhĭk nây?”

²⁹ Păng plơ̆ lah: “Lah mâu mbơh sơm mâu geh nơm dơi mprơh brah mhĭk nây luh ôh.”

Brah Yêsu mbơh lor ma nau Păng khĭt jêh ri dâk rêh tay

³⁰ Du tă bơh ntŭk nây, Brah Yêsu jêh ri phung oh mon hăn rgăn n'gor Galilê. Păng mâu ŭch ăn bu gĭt nau nây,

³¹ yorlah Păng ntĭm nti ma phung oh mon pô aơ: “Bu mra jao Kon Bunuyh tâm ti phung bunuyh, khân păng mra nkhĭt lơi Păng; jêh ri tăch pe nar pakơi jêh bu nkhĭt, Păng mra dâk rêh tay.”

³² Ƀiălah phung oh mon mâu gĭt rbăng ôh nau ngơi nây, khân păng klach mâu nănh ôp Păng ôh.

Nau toyh ngăn

³³ Brah Yêsu jêh ri phung oh mon tât ta ƀon Kapernum. Lah khân păng lăp jêh tâm ngih, Păng ôp phung oh mon: “Dôl hăn trong, moh nau tâm rlăch ndrăng khân may?”

³⁴ Ƀiălah khân păng gŭ klăk klêm, yorlah rŏ trong khân păng tâm rlăch jêh ăn gĭt mbu nơm jêng toyh lơn.

³⁵ Păng gŭ, kuăl jât ma bar kôranh oh mon jêh ri lah: “Tơlah mbu nơm ŭch jêng nơm lor lơn, ăn păng jêng nglĕ dŭt lơn jêh ri jêng oh mon ma lĕ rngôch bunuyh.”

³⁶ Jêh nây Păng leo du huê kon se jê̆ ăn ta nklang phung oh mon; Păng ut kon se tâm ti jêh ri lah:

³⁷ “Mbu nơm yor amoh Gâp rom du huê kon se jê̆ nâm bu pô aơ nâm bu ntĭt rom Gâp lĕ; mbu nơm rom Gâp, mâu di rom knŏng Gâp ôh, ƀiălah rom Nơm hŏ njuăl Gâp.”

Mâu tâm rdâng đah he jêng mpeh ma he

³⁸ Y-Yôhan lah ma Brah Yêsu: “Hơi Nơm Nti, hên saơ du huê bunuyh mprơh brah mhĭk tâm amoh May, jêh ri hên buay jêh yorlah păng mâu tĭng he.”

³⁹ Ƀiălah Brah Yêsu lah: “Lơi ta buay khân păng ôh, yorlah mâu geh ôh bunuyh sŏk amoh Gâp ƀư nau mbên khlay ngăn jêh ri lŏ ngơi mhĭk ma Gâp.

⁴⁰ Mbu nơm mâu tâm rdâng đah he jêng kơl an he.

⁴¹ Mbu nơm hôm sŏk amoh Gâp ăn ma khân may du kachok dak, yorlah khân may jêng phung ma Brah Krist. Nanê̆ ngăn, Gâp lah khân may, bunuyh nây mâu mra roh nau nkhôm ma păng ôh.

⁴² Ƀiălah mbu nơm ƀư ma du huê tâm phung kon se aơ lĕ chroh ma Gâp tŭp nau tih, ueh lơn ăn bu kât mpăl lŭ ta trô ko păng jêh ri klŭp mƀăr păng tâm dak mƀŭt.”

Nau ndơm

⁴³ Tơlah ti may nsŭk ma may ƀư tih, koh hom păng! Ueh lơn lŭt du ding ti ƀiălah dơi lăp tâm nau rêh, đah geh lĕ bar ti ƀiălah tŭp tâm ndrung ŭnh, tâm ŭnh mâu blau nhhât.

⁴⁵ Tơlah jâng may nsŭk ma may ƀư tih, koh hom păng! Ueh lơn lŭt du ding jâng ƀiălah dơi lăp tâm nau rêh, đah geh lĕ bar jâng ƀiălah bu mƀăr tâm ndrung ŭnh.

⁴⁷ Bi tơlah măt may nsŭk may ƀư tih, rvek hom păng! Yorlah may roh du ding măt ƀiălah dơi lăp tâm ƀon bri hađăch Brah Ndu, ueh lơn geh tŏng lĕ bar đah măt ƀiălah bu mƀăr tâm ndrung ŭnh,

⁴⁸ jêng ntŭk rhai mâu blau khĭt ôh jêh ri ŭnh mâu blau nhhât lĕ.

⁴⁹ Yorlah bu mra pot ăp nơm ma boh đah ŭnh.

⁵⁰ “Boh jêng ndơ ueh, ƀiălah tơlah boh roh nau kah, mâm ƀư kah đŏng? Ăn khân may geh boh tâm nuih n'hâm khân may nơm, jêh ri gŭ đăp mpăn ndrăng khân may.”