Markôs 8 - Nau Brah Ndu Ngơi 2023

Brah Yêsu njêng piăng let tal bar

¹ Tâm lĕ nar nây, geh phung bunuyh âk rgum ndrel jêh ri khân păng mâu geh ndơ sông sa ôh, pôri Brah Yêsu kuăl phung oh mon văch jêh ri lah:

² “Gâp yô̆ nđach ma phung ƀon lan aơ, yorlah khân păng gŭ ndrel ma Gâp tâm pe nar jêh, aƀaơ aơ mâu geh ndơ sông sa ôh.

³ Tơlah Gâp ăn khân păng plơ̆ sĭt tâm ndŭl ji ngot, n'hêl nanê̆ khân păng mra huăr rŏ trong, yorlah tâm khân păng geh ƀaƀă bunuyh hŏ tât jêh tă bơh ntŭk ngai.”

⁴ Phung oh mon ơh pô aơ: “Tâm nklang ntŭk bri rdah aơ, mâm blau joi dĭng tŏng piăng let ma phung aơ sa?”

⁵ Păng ôp: “Ndah âk piăng let khân may geh?” Khân păng lah: “Geh pơh mlâm.”

⁶ Brah Yêsu ntăm ma phung ƀon lan gŭ ta neh; Păng sŏk pơh mlâm piăng let, lah ueh, jêh nây nkê̆ch piăng let jêh ri ăn phung oh mon gay khân păng tâm pă ăn ma phung ƀon lan.

⁷ Phung oh mon geh đŏng ka jê̆; Brah Yêsu lah ueh, jêh nây ntăm ma phung oh mon gay khân păng tâm pă tâm ban pônây.

⁸ Ăp nơm sa hơm da dê jêh ri bu dônh pơh bĭ lĕ glo piăng let rmeh.

⁹ Rnoh bunuyh sa klăp lah tâm puăn rbăn nuyh. Brah Yêsu ăn khân păng plơ̆ sĭt,

¹⁰ Ƀât lât Brah Yêsu ncho plŭng ndrel ma phung oh mon hăn rgăn ta n'gor Đalmanutha.

Dăn nau mbên khlay tă bơh trôk

¹¹ Geh ƀaƀă bunuyh Pharisi văch jêh ri rlăch đah Păng, khân păng dăn du nau mbên khlay tă bơh trôk gay rlong uănh Păng.

¹² Brah Yêsu vơl tâm nuih n'hâm pô aơ: “Mâm ƀư bunuyh rnôk aƀaơ aơ joi nau mbên khlay? N'hêl nanê̆, Gâp mbơh ma khân may, mâu mra geh du nau mbên khlay ăn ma bunuyh rnôk aƀaơ aơ ôh.”

¹³ Jêh nây Păng du bơh khân păng, plơ̆ ncho đŏng plŭng jêh ri hăn rgăn kơh đah tê̆.

Ndrui phung Pharisi

¹⁴ Phung oh mon chuêl djôt piăng let; khân păng geh knŏng du mlâm piăng let tâm trôm plŭng.

¹⁵ Păng nkah khân păng: “Njrăng hom jêh ri njrăng ma ndrui phung Pharisi jêh ri ndrui mpôl Hêrôt.”

¹⁶ Phung oh mon nchră ndrăng khân păng: “yorlah he mâu geh piăng let.”

¹⁷ Gĭt nau nây, Brah Yêsu lah: “Mâm ƀư khân may nchră ndrăng khân may yor ma nau mâu geh piăng let? Mâm ƀư khân may ê hŏ gĭt, ê hŏ gĭt vât? Nuih n'hâm khân may ăt hôm dăng ƀơh?

¹⁸ Mâm ƀư khân may geh trôm măt ƀiălah mâu saơ? Geh tôr ƀiălah mâu tăng? Khân may mâu hôm kah gĭt ƀơh?

¹⁹ Tơlah Gâp nkê̆ch prăm mlâm piăng let ăn ma prăm rbăn bunuyh, ndah âk bĭ piăng let rmeh khân may dônh?” Khân păng ơh: “Jât ma bar bĭ.”

²⁰ “Nôk Gâp nkê̆ch pơh mlâm piăng let ăn ma puăn rbăn nuyh, ndah âk bĭ piăng let rmeh khân may dônh?” Khân păng ơh: “Pơh bĭ.”

²¹ Păng lah: “Khân may ăt hôm ê hŏ gĭt vât ƀơh?”

Bunuyh chieh măt ta ƀon Ƀêtsaiđa

²² Brah Yêsu jêh ri phung oh mon hăn tât ta ƀon Ƀêtsaiđa. Bu njŭn leo ma Păng du huê bunuyh chieh măt jêh ri vơl dăn Păng pah ta păng.

²³ Păng kuăn ta ti bunuyh chieh măt, njŭn leo păng luh bơh ƀon, mhĭng dak diu ta trôm măt jêh ri pah ti ta păng, jêh nây ôp: “May saơ lĕ ndô ndơ?”

²⁴ Bunuyh chieh măt n'gơr klơ trôk jêh ri ơh: “Gâp saơ bunuyh, ƀiălah saơ khân păng nâm bu tơm si, dôl hăn.”

²⁵ Brah Yêsu lŏ pah ti ta măt păng; păng uănh mâu mƀrêh, trôm măt dơi ang tay jêh ri păng saơ rah vah lĕ rngôch ndô ndơ.

²⁶ Brah Yêsu ăn păng plơ̆ sĭt jêh ri ntĭnh: “Lơi ta lăp ôh tâm ƀon aơ.”

Nau Y-Pêtrôs mbơh

²⁷ Brah Yêsu ndrel ma phung oh mon hăn luh bơh nây, lăp tâm lĕ ƀon jê̆ dăch ƀon Sêsarê Philip. Rgŏ trong, Brah Yêsu ôp phung oh mon pô aơ: “Mbu nơm Gâp jêng tĭng nâm bu lah?”

²⁸ Khân păng ơh: “Bu lah Nơm Nti jêng Y-Yôhan-Ƀaptist; ƀaƀă lah jêng Y-Êli; bunuyh êng lah jêng du huê tâm phung nơm mbơh lor.”

²⁹ Păng ôp: “Mbu nơm Gâp jêng tĭng nâm khân may lah?” Y-Pêtrôs ơh pô aơ: “Nơm Nti jêng Brah Krist.”

³⁰ Jêh ri Brah Yêsu ntăm ma phung oh mon mâu dơi mbơh Păng ma bu ôh.

Brah Yêsu mbơh lor ma nau Păng khĭt jêh ri dâk rêh tay

³¹ Nôk nây, Brah Yêsu ntơm nti ma phung oh mon pô aơ Kon Bunuyh dơn âk nau rêh ni, phung kôranh bu ranh, phung kôranh ƀư brah toyh jêh ri phung kôranh nchih samƀŭt dun lơi, bu nkhĭt, jêh ri tăch pe nar pakơi Păng dâk rêh tay.

³² Păng lah nau nây rah vah ma phung oh mon. Y-Pêtrôs jă Brah Yêsu hăn ntŭk êng, jêh ri buay king Păng.

³³ Ƀiălah Brah Yêsu rle măt uănh ma phung oh mon, jêh ri nduyh Y-Pêtrôs: “Hơi Satan, rŭch plơ̆ hom pakơi Gâp, yorlah may mâu mĭn ma kan Brah Ndu, ƀiălah knŏng mĭn ma kan kon bunuyh.”

³⁴ Jêh nây, Păng kuăl phung ƀon lan jêh ri phung oh mon tât jêh ri lah: “Tơlah mbu nơm ŭch tĭng Gâp, ăn păng dun êng păng nơm, tuy si tâm rkăng êng păng nơm gay tĭng Gâp.

³⁵ Yorlah mbu ŭch rklaih nau rêh păng nơm, mra roh, ƀiălah mbu yor Gâp jêh ri yor Nau Mhe Mhan Ueh roh nau rêh, mra rklaih nau rêh păng nơm.

³⁶ Moh nau khlay tơlah du huê bunuyh geh lĕ neh ntu ƀiălah roh huêng păng nơm?

³⁷ Moh ndơ bunuyh nây mra sŏk gay rgâl huêng păng nơm?

³⁸ Yorlah mbu nơm prêng ma Gâp jêh ri ma nau Gâp ngơi tâm rnôk rô̆ văng tĭr tih mhĭk aơ, tâm ban lĕ Kon Bunuyh ăt mra prêng ma bunuyh nây, tơlah Păng ndrel ma phung tông mpăr kloh ueh văch tâm nau chrêk rmah Mbơ̆ Păng.”