Markôs 7 - Nau Brah Ndu Ngơi 2023

Rao ti êlor sông sa

¹ Nôk nây geh ƀaƀă bunuyh Pharisi jêh ri kôranh nchih samƀŭt tă bơh ƀon Yêrusalem tât, rgum ndrel văr jŭm Brah Yêsu;

² khân păng saơ ƀaƀă oh mon Brah Yêsu gŭ sông sa ma ti mâu kloh, nâm bu ntĭt jêng ê hŏ rao ti.

³ (Tĭng nau vay ơm bunuyh kăl e, phung Pharisi jêh ri phung Yuđa mâu sông ôh tơlah ê hŏ rao ti;

⁴ nôk khân păng sĭt tă bơh ngih tăch drăp, tơlah ê hŏ rao ti khân păng mâu đŏng sông sa. Phung nây hôm djôt prăp âk ntil nau êng êng đŏng nâm bu nau rao kachok ngan, glah yăng jêh ri lĕ ndơ dŏng ma kông).

⁵ Yor nây, phung Pharisi jêh ri phung kôranh nchih samƀŭt ôp ma Păng: “Mâm ƀư phung oh mon May mâu tĭng nau vay ơm bunuyh kăl e, sông sa ma ti mâu kloh kơt nây?”

⁶ Păng plơ̆ lah: “Y-Êsai mbơh lor jêh ma phung bunuyh nuih n'hâm nklă khân may jêng di ngăn: ‘Phung ƀon lan aơ yơk mbah Gâp ma trôm mbung, Ƀiălah nuih n'hâm khân păng ngai đah Gâp.

⁷ Nau khân păng yơk mbah ma Gâp jêng mâu khlay, Nau khân păng nti knŏng jêng nau vay bunuyh.’

⁸ Khân may chalơi jêh nau Brah Ndu ntăm, ƀiălah djôt nau vay bunuyh!”

⁹ Păng lah đŏng ma khân păng: “Khân may blau ngăn chalơi jêh nau vay Brah Ndu ntăm, gay djôt prăp tĭng kơt nau vay ơm khân may nơm!

¹⁰ Yorlah Y-Môis lah jêh: ‘Yơk hom ma mê̆ mbơ̆ khân may’ jêh ri, ‘Mbu nơm rak rtăp ma mê̆ mbơ̆ păng nơm, bu mra nkhĭt lơi păng’;

¹¹ ƀiălah khân may lŏ lah: ‘Tơlah mbu lah ma mê̆ mbơ̆ pô aơ lĕ ntil gâp kơl ma mê̆ mbơ̆ jêng kôrban’ (ntĭt jêng ndơ hŏ nhhơr jêh ma Brah Ndu).

¹² Pônây khân may mâu ăn ma bunuyh nây dơi kơl ma mê̆ mbơ̆ păng nơm đŏng ôh.

¹³ Kơt nây, khân may srôih djôt nau vay ơm khân may nơm ƀiălah dun chalơi nau Brah Ndu ngơi. Khân may hôm ƀư âk ntil nau êng đŏng tâm ban kơt nây.”

¹⁴ Jêh ta nây, Brah Yêsu kuăl đŏng phung ƀon lan văch jêh ri lah: “Lĕ rngôch iăt hom Gâp jêh ri gĭt vât pô aơ:

¹⁵ Mâu geh ôh du ntil ndơ tă bơh padih lăp tâm bunuyh jêh ri dơi ƀư ƀơ̆ păng; ƀiălah lĕ ndơ luh tă bơh bunuyh, ndơ nây yơh ƀư ƀơ̆ păng.”

¹⁷ Nôk Păng lăp jêh tâm ngih jêh ri ƀah ngai đah phung ƀon lan jêh, phung oh mon ôp Păng tâm nau hôr nây.

¹⁸ Brah Yêsu lah: “Mâm ƀư khân may ê hŏ gĭt rbăng đŏng? Khân may mâu gĭt rbăng pô aơ mâu geh ndơ tă bơh padih lăp tâm trôm bunuyh dơi ƀư ƀơ̆ păng ƀơh?

¹⁹ Yorlah ndơ nây mâu lăp tâm nuih n'hâm bunuyh ôh, ƀiălah tâm trôm ndŭl, jêh ri luh padih ta ntŭk ndâp.” Kơt nây, Păng ŭch lah ma lĕ ndơ sa jêng kloh rsang.

²⁰ Păng lah tay: “Moh ndơ luh tă bơh bunuyh jêng ƀư ƀơ̆ păng.

²¹ Yorlah tă bơh tâm trôm, tă bơh nuih n'hâm bunuyh du luh nau mĭn djơh nâm bu: nau văng tĭr, nau ntŭng, nau nkhĭt bunuyh,

²² nau ka n'hong, nau kơnh rlau ir, janh ƀai, nau mƀruh nchơt, nau brơl rlach, nau keh nach, ngơi nchơt, nau brŭt ndrăng.

²³ Lĕ rngôch nau mhĭk nây ntơm tă bơh tâm trôm jêh ri ƀư ma bunuyh ƀơ̆ ƀơch.”

Nau chroh bu ur bri Kanaan

²⁴ Tă bơh nĕ, Păng dâk hăn tât ta nkual neh ƀon Tyre jêh ri ƀon Sidôn. Păng lăp tâm du ngih jêh ri mâu ăn bu dơi gĭt ôh Păng nơm gŭ ta nây, ƀiălah mâu dơi pôn ôh.

²⁵ Du huê bu ur ri kon păng geh brah ƀơ̆ ƀơch lăp, tơlah tăng bu lah ma Brah Yêsu, păng văch ro chon mon ta jâng Păng.

²⁶ Bu ur nây jêng bunuyh Grek, bunuyh tơm Sirôphênisi. Păng vơl dăn ma Păng mprơh brah mhĭk luh du bơh kon bu ur păng.

²⁷ Brah Yêsu lah ma păng: “Ăn ma phung kon sông sa hơm lor, yorlah sŏk piăng let phung kon mƀăr ma so sa jêng nau mâu di.”

²⁸ Ƀiălah bu ur nây ơh pô aơ: “Ơ Kôranh Brah, di ngăn jêng kơt nây, ƀiălah phung so tâm dâng sưng mpan dơi sa lĕ glo piăng let hăch phung kon se.”

²⁹ Păng lah: “Hăn sĭt hom ay, yorlah nau ay ngơi nây, brah mhĭk luh du jêh tă bơh kon bu ur ay.”

³⁰ Tơlah sĭt tât ta ngih, păng saơ kon păng lâng bê̆ch ta sưng, jêh ri brah mhĭk lĕ luh du jêh.

Brah Yêsu ƀư bah bunuyh tê̆k

³¹ Brah Yêsu du tă bơh nkual neh ƀon Tyre, hăn rgăn ƀon Sidôn n'hot tât ta dak mƀŭt Galilê jêh ri lăp ta n'gor Đêkapôlis.

³² Bu njŭn leo ma Păng du huê bunuyh tê̆k jêh ri ngơi rlem, vơl dăn ma Păng dra ti ta bunuyh nây.

³³ Păng djôt leo bunuyh nây luh bơh phung âk, dơm nglau ti Păng lăp bar tôr păng jêh ri soh dak diu lĭp ta mpiăt păng.

³⁴ Jêh nây Păng n'gơr măt klơ trôk, nsôr jong jêh ri lah: “Êpatha!” nâm bu ntĭt, “Pơk hom!”

³⁵ Ƀât lât tôr bunuyh nây dơi pơk, mpiăt dơi mpât mbrơi, jêh ri păng ntơm ngơi kloh rah vah.

³⁶ Brah Yêsu đă khân păng mâu dơi nkoch bri nau nây ma bu ôh, ƀiălah Brah Yêsu lơ hô buay, bu lơ hô nkoch bri.

³⁷ Lĕ rngôch bunuyh nây hih rhâl ngăn jêh ri lah: “Păng ƀư lĕ nau jêng ueh ngăn: Păng ăn bunuyh tê̆k dơi tăng, bunuyh mlo dơi ngơi!”