Markôs 6 - Nau Brah Ndu Ngơi 2023

Brah Yêsu ta ƀon Nasaret

¹ Brah Yêsu luh tă bơh ntŭk nây, plơ̆ sĭt ƀon tơm Păng nơm; phung oh mon hăn ndrel Păng.

² Tât nar saƀat, Păng ntơm ntĭm nti tâm ngih rƀŭn. Âk bunuyh iăt Păng nti lah hih rhâl jêh ri lah: “Mbah tă luh păng geh lĕ rngôch nau nây? Moh nau blau mĭn bu ăn ma păng? Mâm ƀư ti păng dơi geh âk nau brah kơt nĕ?

³ Mâu di bơh nơm aơ jêng bunuyh trah si, kon bu klâu H'Mari, nâu Y-Yakơ, Y-Yôsê, Y-Yuđas, jêh ri Y-Simôn ƀơh? Mâu di bơh phung oh bu ur păng gŭ ta aơ ndrel he ƀơh?” Jêh ri khân păng chêh prah yor Păng.

⁴ Ƀiălah Brah Yêsu lah: “Bu mâu geh mưch rmot nơm mbơh lor ôh, knŏng tâm ƀon tơm, ndŭl mpôl jêh ri rnăk vâl păng nơm mâu ŭch yơk ôh.”

⁵ Gŭ ta nây Păng mâu dơi ƀư du nau brah ôh, knŏng nau Păng pah ti ta bar, pe nuyh ji kuet jêh ri ƀư bah ma khân păng.

⁶ Brah Yêsu hih rhâl yor nuih n'hâm khân păng mâu chroh. Jêh nây yơh Brah Yêsu hăn nti lah lam lĕ ƀon jê̆ jê̆ dăch nây.

Prơh njuăl jât ma bar kôranh oh mon

⁷ Brah Yêsu kuăl jât ma bar kôranh oh mon, ntơm prơh hăn bar hê bar hê jêh ri ăn khân păng nau dơi nsot brah ƀơ̆ ƀơch.

⁸ Păng ntăm ma khân păng dôl hăn nsong, knŏng djôt mâng jra dơm, lơi djôt leo du ntil ndơ ôh, piăng let, dŭng cheng, mâu lah prăk tâm dŭng;

⁹ knŏng nsoh ntâu jot, mâu dơi nsoh bar blah ao.

¹⁰ Păng ntĭnh khân păng: “Moh ngih khân may lăp, gŭ hom ta nây tât khân may hăn luh du.

¹¹ Lah geh moh ntŭk bu mâu ŭch rom jêh ri mâu lĕ ŭch iăt khân may, pôri hăn hom tă bơh ntŭk nây, rtuh neh muy tă bơh jâng khân may tâm ban du nau mbơh tâm rdâng ma khân păng.”

¹² Pônây, phung kôranh oh mon luh hăn, mbơh nkoch pô aơ ăn lĕ rngôch bunuyh rmal nau tih.

¹³ Khân păng mprơh âk brah mhĭk, mhĭng dak ngi jêh ri ƀư bah phung ji.

Hêrôt nkhĭt Y-Yôhan-Ƀaptist

¹⁴ Hađăch Hêrôt tăng bu nkoch bri ma Brah Yêsu, yor geh âk bunuyh gĭt tăng nau lư n'găr Păng. Ƀaƀă bunuyh lah: “Y-Yôhan-Ƀaptist hŏ dâk rêh tay bơh nau khĭt, pônây yơh păng dơi ƀư nau mbên khlay ngăn aơ.”

¹⁵ Ƀaƀă lah: “Nây jêng Y-Êli”, ƀaƀă lah êng đŏng: “Nây jêng nơm mbơh lor, nâm bu du huê tâm phung nơm mbơh lor rnôk rô̆ kăl e.”

¹⁶ Ƀiălah dôl Hêrôt tăng kơt nây, păng lah: “Aơ ngăn jêng Y-Yôhan, bunuyh gâp hŏ koh jêh trô ko, aƀaơ dâk rêh tay.”

¹⁷ Yorlah Hêrôt hŏ prơh bu nhŭp Y-Yôhan, chăp jêh ri krŭng tâm ndrung, yorlah nau hađăch hŏ nđăp jêh H'Hêrôdias, jêng ur Y-Philip oh hađăch, ƀư ur.

¹⁸ Yorlah Y-Yôhan hŏ buay pô aơ: “Hađăch sŏk ur oh may nơm jêng mâu di nau vay ôh”

¹⁹ pôri H'Hêrôdias ji nuih ma Y-Yôhan jêh ri ŭch ƀư nkhĭt păng. Ƀiălah păng mâu dơi nkhĭt ôh,

²⁰ yorlah Hêrôt klach ma Y-Yôhan, gĭt jêh păng jêng bunuyh sŏng srăng jêh ri bunuyh kloh ueh, rĭ dĭng king n'gang ma păng. Hađăch ŭch iăt Y-Yôhan ngơi, nđâp tơlah ăp tơ̆ jêh iăt nuih n'hâm hađăch vay rŭng răng.

²¹ Tâm nar kah gĭt nar deh, Hêrôt ndrăp nau nhêt sông sa toyh ngăn ăn ma phung kâp kơl, phung kôranh tahan, jêh ri phung kan toyh tâm n'gor Galilê.

²² Kon bu ur H'Hêrôdias lăp pâl ntalơ̆, ƀư maak nuih n'hâm ma hađăch Hêrôt jêh ri ma phung bu jă râng nau nhêt sông sa, pôri hađăch lah ma bu ur druh: “Dăn hom moh ndơ ay ŭch, gâp mra ăn ma ay.”

²³ Hađăch lŏ ton: “Moh ntil ay dăn, gâp mra ăn ma ay, nđâp tơlah du n'gul ƀon bri hađăch gâp kđôi lĕ.”

²⁴ Bu ur nây hăn ôp mê̆ păng: “Moh ndơ gâp mra dăn?” Mê̆ păng plơ̆ lah: “Dăn bôk Y-Yôhan-Ƀaptist.”

²⁵ Gơnh ro, bu ur ndal hăn lăp jêh ri mbơh ma hađăch: “Gâp ŭch hađăch ăn gâp bôk Y-Yôhan-Ƀaptist n'gân ta ngan grưng aƀaơ aơ ro.”

²⁶ Hađăch rngot ngăn; ƀiălah yor nau ton săk jêh ri yor phung bu jă râng nhêt sông sa, hađăch mâu ŭch dun ôh.

²⁷ Hađăch prơh ro du huê tahan jêh ri ntrŭnh ma păng sŏk bôk Y-Yôhan.

²⁸ Bunuyh nây lăp tâm ndrung koh bôk Y-Yôhan, jêh nây n'gân bôk tâm ngan grưng jêh ri ăn ma bu ur druh. Bu ur druh nây ăn ma mê̆ păng.

²⁹ Phung oh mon Y-Yôhan tăng lư jêh nau nây, hăn sŏk săk jăn păng jêh ri tâp tâm môch.

Brah Yêsu njêng kapŭng tal nguay

³⁰ Phung kôranh oh mon rgum jŭm Brah Yêsu, mbơh ma Păng lĕ kan khân păng hŏ ƀư jêh ri ntĭm nti.

³¹ Păng đă ma phung kôranh oh mon: “Khân may hăn hom ta ntŭk nsoih, gŭ rlu ƀât.” Yor geh âk bunuyh hăn luh lăp, rĭ dĭng Păng jêh ri phung kôranh oh mon mâu ru gay sông sa ôh.

³² Pônây, khân păng luh bơh plŭng hăn lăp tâm ntŭk nsoih.

³³ Âk bunuyh saơ jêh ri gĭt năl Brah Yêsu jêh ri phung oh mon, pônây, tă bơh ăp ƀon khân păng nchuăt jâng tĭng jêh ri tât ta nây lor.

³⁴ Tơlah luh bơh plŭng, Brah Yêsu saơ phung bunuyh âk pôri Păng yô̆ nđach ma khân păng, yorlah khân păng nâm bu phung biăp mâu geh bunuyh rmăk biăp. Păng ntơm ntĭm nti âk ntil ma khân păng.

³⁵ Dôl trôk lĕ mhaơ jêh, phung oh mon văch lah ma Păng: “Ntŭk aơ jêng rngot njăp, jêh ri trôk lĕ mhaơ jêh;

³⁶ dăn Nơm Nti ăn ma phung ƀon lan sĭt gay khân păng hăn lăp tâm ƀon jê̆ dăch jŭm aơ gay rvăt ndơ sông sa.”

³⁷ Ƀiălah Păng lah: “Khân may nơm yơh ăn ndơ sông sa ma khân păng.” Khân păng lah: “Ăn hên hăn rvăt bar rhiăng đơniê piăng let ăn ma khân păng sa ƀơh?”

³⁸ Păng lah: “Hăn uănh, ndah âk piăng let khân may geh?” Lah jêh khân păng sek uănh jêh ri ơh: “Geh prăm mlâm piăng let jêh ri bar mlâm ka.”

³⁹ Păng đă ma phung oh mon dăp phung ƀon lan gŭ tĭng mpôl ta klơ gơ̆ nđĭr.

⁴⁰ Khân păng gŭ jêng du mpôl du mpôl, mpôl geh du rhiăng nuyh, mpôl geh prăm jât nuyh.

⁴¹ Brah Yêsu sŏk prăm mlâm piăng let jêh ri bar mlâm ka, n'gơr măt klơ trôk, lah ueh, jêh nây nkê̆ch piăng let jêh ri jao ăn ma phung oh mon tâm pă ma phung ƀon lan. Păng tâm pă đŏng bar mlâm ka ma lĕ rngôch bunuyh.

⁴² Lĕ rngôch bunuyh sa hơm da dê.

⁴³ Khân păng dônh sĭt piăng let jêh ri ka hôm rmeh bêng jât ma bar bĭ.

⁴⁴ Lĕ rngôch bunuyh sa piăng let jêng prăm rbăn nuyh.

Brah Yêsu hăn ta klơ mpiăt dak mƀŭt

⁴⁵ Pakơi nây, Brah Yêsu ntrŭt phung oh mon ncho plŭng hăn lor rgăn ta kơh mpeh kăl tê̆, rle mpeh ƀon Ƀêtsaiđa, tâm nôk Păng ăn phung ƀon lan plơ̆ sĭt.

⁴⁶ Jêh Păng luh tă bơh khân păng, Păng hăn hao ta klơ yôk gay mbơh sơm.

⁴⁷ Trôk ntơm ngo jêh, plŭng nây hôm tâm nklang dak mƀŭt, ƀiălah Păng hôm gŭ êng klơ kơh.

⁴⁸ Păng saơ phung oh mon vah plŭng dŭt hŏt ngăn, yorlah rlơ̆ sial, tât klăp lah puăn tong iăr ndrau tâm măng nây, Păng hăn ta klơ mpiăt dak mƀŭt văch ta phung oh mon. Păng ŭch hăn lor lơn khân păng.

⁴⁹ Ƀiălah dôl saơ Păng hăn klơ mpiăt dak mƀŭt, phung oh mon mĭn jêng chiak nhhu, yor ri khân păng nter,

⁵⁰ yor lĕ rngôch saơ Păng da dê jêh ri klach ngăn. Ƀiălah Brah Yêsu lah ro ma khân păng: “Gŭ đăp hom nuih n'hâm, Gâp yơh aơ, lơi klach ôh!”

⁵¹ Jêh ri Păng hao ncho tâm plŭng ndrel phung oh mon, jêh ri phŭt sial gŭ klăk klêm. Khân păng hih rhâl dŭt n'hâm ngăn,

⁵² yorlah mâu gĭt vât ôh nau rblang tâm nau mbên njêng piăng let, yorlah nuih n'hâm khân păng hôm dăng ngăn.

Brah Yêsu ƀư bah nau ji ta ƀon Gênêsaret

⁵³ Tơlah lĕ găn tât ta kơh đah tê̆, Brah Yêsu jêh ri phung oh mon hăn tât ta n'gor Gênêsaret, jêh ri kât plŭng ta nây.

⁵⁴ Dôl khân păng du luh bơh plŭng, phung ƀon lan gĭt năl Păng ro.

⁵⁵ Khân păng nchuăt lam nkual nây, ta ntŭk bu tăng lư Păng njưh, bu tung phung ji ta klơ sưng bê̆ch tât ta nây.

⁵⁶ Ăp ntŭk Brah Yêsu tât, ƀon jê̆, ƀon toyh, mâu lah ƀon tơm, bu njŭn leo da dê phung ji gŭ ta lĕ ntŭk tăch drăp, jêh ri khân păng vơl dăn Păng ăn khân păng pah bi knŏng ta chiăng ao Păng; lĕ bunuyh hŏ pah ta ao Păng dơi bah da dê.