Markôs 5 - Nau Brah Ndu Ngơi 2023

Bunuyh geh brah mhĭk lăp ta ƀon Gađara

¹ Brah Yêsu ndrel ma phung oh mon rgăn tât kơh đah tê̆ dak mƀŭt, tâm n'gor Yêrasê.

² Nôk Păng luh bơh plŭng, ƀât lât geh du huê bunuyh brah ƀơ̆ ƀơch lăp nchuăt tă bơh môch văch tanăp Păng.

³ Bunuyh aơ vay gŭ tâm ntŭk môch, bu mâu dơi kât păng ôh, nđâp lah kât ma rse rvăk kŏ mâu dơi lĕ.

⁴ Âk tơ̆ jêh bu nkông jâng, nkông ti, ƀiălah păng nkê̆ch da dê lĕ rse rvăk doh nkông, bu mâu hôm tŏng n'hâm suan gay đăp păng ôh.

⁵ Păng vay nsong mblêng ƀaƀơ nar nâm măng tâm lam môch tât tâm ăp yôk, vay lung nter, jêh ri ntăp rnglay săk nơm đah lŭ mplanh.

⁶ Dôl saơ Brah Yêsu bơh ngai, păng nchuăt ran ro, chon mon tanăp măt Păng

⁷ jêh ri kuăl huy: “Ơ Brah Yêsu, Kon Brah Ndu Nơm Dŭt Prêh, moh nau gâp geh đah May? Tâm amoh Brah Ndu gâp vơh vơl ma May lơi ƀư mhĭk ma gâp ôh.”

⁸ Yorlah Brah Yêsu lah: “Hơi brah ƀơ̆ ƀơch, luh du hom tă bơh bunuyh aơ.”

⁹ Jêh nây Păng ôp tay: “Mâm moh săk may?” Brah ƀơ̆ ƀơch lah: “Amoh gâp jêng ‘Phung mpôl tahan’ yorlah hên âk ngăn.”

¹⁰ Brah ƀơ̆ ƀơch vơl dăn ma Păng lơi mprơh khân păng tă bơh n'gor nây.

¹¹ Nôk nây geh phung sŭr âk râk gŭ sa ta klơ dor yôk.

¹² Phung brah ƀơ̆ ƀơch vơl dăn: “Dăn May ăn hên lăp tâm phung sŭr nây.” Brah Yêsu ăn.

¹³ Phung brah ƀơ̆ ƀơch luh bơh bunuyh nây jêh ri lăp tâm phung sŭr. Phung sŭr nây geh klăp lah bar rbăn, du tă bơh kơh sop nsăt jŭr tâm dak mƀŭt jêh ri khĭt ngâm tâm nây.

¹⁴ Phung bunuyh chiăp sŭr nchuăt du jêh ri mbơh nau mhe mhan nây tâm lam ƀon toyh, ƀon jê̆; phung ƀon lan hăn văch uănh moh nau tât nây.

¹⁵ Nôk tât ta ntŭk Brah Yêsu, khân păng saơ du huê bunuyh hŏ tă brah mhĭk “Phung mpôl tahan” lơh dôl gŭ ta nây, nsoh kho ao jêh ri nau mĭn kah rngăl, khân păng klach ngăn.

¹⁶ Phung bunuyh saơ jêh nau nây nkoch bri ma khân păng tăng ma nau hŏ tât ma bunuyh geh brah ƀơ̆ ƀơch lăp jêh ri ma phung sŭr.

¹⁷ Khân păng vơl dăn Păng du tă bơh nkual neh khân păng nơm.

¹⁸ Dôl Brah Yêsu ncho plŭng, bunuyh hŏ geh brah mhĭk lơh nây dăn tĭng Păng.

¹⁹ Ƀiălah Brah Yêsu dun jêh ri lah: “Sĭt hom ma ngih may, tât ma ndŭl mpôl may jêh ri nkoch bri ma khân păng lĕ nau khlay toyh Kôranh Brah hŏ ƀư jêh ma may, jêh ri mâm nau Păng yô̆ an jêh ma may.”

²⁰ Bunuyh nây hăn lam tâm n'gor Đêkapôlis nkoch bri lĕ nau Brah Yêsu hŏ ƀư ăn jêh ma păng nơm; lĕ rngôch bunuyh hih rhâl da dê.

Kon bu ur Y-Jairus jêh ri bu ur luh mham

²¹ Brah Yêsu ncho plŭng hăn rgăn kơh đah tê̆. Du mpôl bunuyh âk ngăn tâm rƀŭn jŭm Păng, nôk Păng gŭ ta kơh dak mƀŭt.

²² Nôk nây, geh du huê kôranh mât uănh ngih rƀŭn, amoh Y-Jairus văch. Lah saơ Brah Yêsu, păng chon mon ta jâng Păng ro,

²³ vơl dăn: “Kon bu ur gâp bơi khĭt. Dăn Nơm Nti văch jêh ri pah ti ta păng, ăn păng dơi bah jêh ri rêh.”

²⁴ Brah Yêsu dâk hăn ndrel ma Y-Jairus. Du phung mpôl âk ngăn hăn tĭng jêh ri mpet Păng.

²⁵ Tâm mpôl nây geh du huê bu ur ji rih hŏ jât ma bar năm.

²⁶ Jŏ nar jêh păng rêh ni ngăn tâm ti âk nai dak si, huach lĕ jêh prăk, drăp ndơ, ƀiălah nau ji mâu geh hŭch, lơ nar lơ glăm lơn.

²⁷ Păng tăng lư bu nkoch bri ma Brah Yêsu rĭ dĭng lăp tâm nklang phung âk, văch pakơi Păng jêh ri pah ta ao Păng.

²⁸ Yor păng mĭn êng: “Knŏng dơi pah ta ao Păng, gâp mra dơi bah ro.”

²⁹ Ƀât lât, mham păng suăt ro. Păng gĭt êng pô aơ păng hŏ dơi bah jêh.

³⁰ Brah Yêsu gĭt năl geh du nau brah luh jêh tă bơh Păng, yor nây Păng rle ta phung âk jêh ri ôp: “Mbu moh pah ao Gâp?”

³¹ Phung oh mon lah: “Kôranh saơ bơh phung âk aơ mpet Kôranh, mâm Kôranh hôm ôp, ‘mbu moh pah Gâp?’”

³² Ƀiălah Brah Yêsu joi uănh jŭm păng gay ma gĭt năl mbu nơm ƀư pônây.

³³ Bu ur nây klach nsâr săk jăn yorlah păng gĭt mâm nau tât tâm rnglay săk păng, păng văch chon mon ta jâng Păng jêh ri nkoch mbơh ma Păng lĕ nau ngăn.

³⁴ Brah Yêsu lah: “Hơi kon bu ur Gâp, nau chroh ay hŏ rklaih jêh ay; hăn hom đăp mpăn jêh ri dơi bah nau ji.”

³⁵ Dôl Brah Yêsu hôm e ngơi, geh bar pe nuyh tă bơh ngih Y-Jairus văch lah ma păng: “Kon bu ur may khĭt jêh, moh nau hôm rsuak Nơm Nti đŏng?”

³⁶ Brah Yêsu mâu meng lĕ nau ngơi nây, Păng đă ma kôranh mât uănh ngih rƀŭn: “Lơi klach ôh, knŏng may chroh dơm.”

³⁷ Păng mâu ăn bunuyh hăn tĭng Păng, knŏng Y-Pêtrôs, Y-Yakơ jêh ri Y-Yôhan, oh Y-Yakơ.

³⁸ Tât ta ngih Y-Jairus, Brah Yêsu saơ lĕ rngôch bunuyh uh ah, nơm aơ gŭ nhĭm nhhiăng, nơm ri nter nđor,

³⁹ Păng hăn lăp tâm ngih jêh ri Păng lah ma khân păng: “Mâm ƀư khân may ƀư uh ah jêh ri nhĭm nhhiăng? Kon se mâu di khĭt ôh, ƀiălah păng dôl bê̆ch.”

⁴⁰ Khân păng mưch gơm ma Păng. Păng mprơh lĕ rngôch bunuyh luh padih, jêh nây Păng leo mê̆ mbơ̆ kon se ndrel ma pe nuyh oh mon lăp ta ntŭk kon se gŭ bê̆ch.

⁴¹ Brah Yêsu kuăn ta ti kon se jêh ri lah: “Talitha kum”; nâm bu ntĭt: “Bu ur jê̆ ơi, Gâp lah ma ay dâk hom.”

⁴² Ƀât lât ta nây, bu ur jê̆ nây dâk jêh ri chuat hăn, yorlah păng hŏ geh jêh jât ma bar năm. Lĕ rngôch bunuyh hih rhâl da dê.

⁴³ Ƀiălah Brah Yêsu buay dăng ngăn ma khân păng lơi ăn bu gĭt nau aơ ôh, jêh ri lah ma khân păng ăn kon se nây sông sa.