Markôs 4 - Nau Brah Ndu Ngơi 2023

Nau hôr ma ƀon bri hađăch Brah Ndu

¹ Brah Yêsu ntơm nti lah êp meng kơh dak mƀŭt. Geh du mpôl bunuyh âk ngăn gŭ jŭm Păng, yor ri Păng hăn trŭnh gŭ tâm plŭng, bi lĕ rngôch phung ƀon lan gŭ klơ kơh.

² Brah Yêsu dŏng nau hôr nti ma khân păng âk ntil. Păng lah:

³ “Iăt hom! Geh du huê nơm hăn luh srih grăp.

⁴ Dôl păng srih, ƀaƀă grăp tŭp rŏ trong, sĭm chôk lĕ ƀhiau.

⁵ Ƀaƀă êng tŭp ta neh lŭ, knŏng geh djê̆ neh, yorlah brôi mâu jru rĭ dĭng chăt hon gơnh.

⁶ Ƀiălah nôk geh nar luh, duh nđat păng kro klêu ro yorlah mâu geh reh.

⁷ Ƀaƀă êng tŭp tâm nklang pŭm lok; lok hon lor ƀư nu jêh ri mâu geh play.

⁸ Ƀaƀă êng êng đŏng tŭp ta neh ueh geh play, văch ma toyh jêh ri bĭk rơ̆, du grăp geh pe jât grăp, ƀă prao jât grăp, ƀă du rhiăng grăp.”

⁹ Păng lah tay: “Mbu nơm geh tôr gay iăt, iăt hom!”

Nau khlay tâm nau hôr

¹⁰ Dôl Brah Yêsu hôm gŭ êng păng, phung bunuyh gŭ jŭm Păng ndrel ma jât ma bar kôranh oh mon, khân păng văch ôp Păng ma lĕ nau hôr.

¹¹ Păng lah: “Nau khlay ndâp ƀon bri hađăch Brah Ndu hŏ dơi ăn ma khân may; ƀiălah ma phung padih, bu ngơi ma khân păng ma nau hôr da dê,

¹² gay ăn: Uănh ăt uănh, ƀiălah mâu saơ, Tăng ăt tăng, ƀiălah mâu gĭt rbăng ôh; Klach lah khân păng rmal nau tih jêh ri geh nau yô̆ an.”

¹³ Jêh nây Brah Yêsu lah: “Khân may mâu gĭt rbăng nau hôr aơ? Pôri mâm ƀư dơi gĭt rbăng lĕ rngôch nau hôr êng?”

¹⁴ “Bunuyh srih găr, nâm bu ntĭt srih nau ngơi.

¹⁵ Lĕ găr tŭp rŏ trong jêng phung hŏ dơn iăt nau ngơi bu srih jêh, ƀiălah khân păng mhe pơ jêh iăt pôri Satan văch ro, sŏk lơi nau ngơi bu srih jêh tâm nuih n'hâm khân păng.

¹⁶ Tâm ban lĕ, lĕ găr srih ta ntŭk neh lŭ jêng phung bunuyh jêh tăng nau ngơi răm maak sŏk dơn ro;

¹⁷ ƀiălah nau ngơi mâu sŏr reh tâm nuih n'hâm, knŏng rêh ƀât lât dơm; yor ri tơlah yor nau ngơi mâp nau rêh ni mâu lah nau bu ƀư mhĭk, khân păng cha lôt ro.

¹⁸ Lĕ găr tŭp tâm nklang pŭm lok tâm ban ma bunuyh tăng nau ngơi,

¹⁹ ƀiălah mĭn rvê ma nau rêh rnôk aơ, kơnh tâm nau ndrŏng, jêh ri kơnh drăp ndơ êng êng pit in nuih n'hâm khân păng, ƀư nu nau ngơi, mâu dơi geh play ôh.

²⁰ Bi lĕ găr srih ta neh ueh tâm ban ma phung bunuyh tăng nau ngơi, sŏk dơn jêh ri dơi play, găr aơ play pe jât, găr êng dơi geh prao jât, găr êng đŏng dơi geh du rhiăng.”

Nau hôr ma ŭnh kađen

²¹ Brah Yêsu lah đŏng ma khân păng: “Geh lĕ bu sŏk ŭnh kađen n'gân păng tâm dâng thŭng mâu lah tâm dâng sưng bê̆ch, ntrok dơm klơ jâng kađen?

²² Yorlah mâu geh moh ndơ pôn ndâp dĭng mâu mpơl, mâu geh ôh moh ndơ pôn ndâp dĭng bu mâu saơ rah vah.

²³ Tơlah mbu nơm geh tôr gay iăt, iăt hom!”

²⁴ Brah Yêsu lah tay: “Sek uănh hom nau khân may tăng. Ndah khân may veh ma bu dah nây đŏng bu mra veh ma khân may, jêh ri bu mra dơi ntop ăn ma khân may đŏng

²⁵ Yorlah nơm geh jêh, mra ăn ntop; bi mbu mâu geh bu mra sŏk lơi lĕ ndơ khân păng hŏ geh jêh.”

Nau hôr ma găr ntil

²⁶ Brah Yêsu lah tay: “Ƀon bri hađăch Brah Ndu nâm bu ntĭt ma du huê srih grăp tâm neh;

²⁷ nđâp lah lêt bê̆ch mâu lah kah rngăl, nđâp lah nar jêh ri măng, găr ntil chăt hon jêh ri hon prêh, ƀiălah bunuyh nây mâu gĭt rbăng ôh nau nây.

²⁸ Yorlah neh hon êng play do, ntơm saơm jêng n'ha nse, jêh nây luh mbôn jêh ri geh găr.

²⁹ Tât ba dŭm, bunuyh nây djôt leo nhuĕ hăn rek, yorlah yan rek lĕ tât jêh.”

Nau hôr ma găr trau

³⁰ Brah Yêsu lah tay: “Moh nau he sŏk gay tâm ntĭt mâu lah moh nau hôr he dŏng gay lah ma ƀon bri hađăch Brah Ndu?

³¹ Ƀon bri hađăch nây nâm bu du găr trau, nôk srih, păng jêng dŭt jê̆ tâm lĕ rngôch găr ntil tâm neh ntu;

³² ƀiălah tơlah bu srih jêh, păng chăt hon, dơi jêng dŭt toyh tâm lĕ ntil tơm trau, n'gĭng n'ha pŭm ngăn kŏ tât sĭm tâm trôk ƀư rsuăn tâm dâng nthan păng.”

³³ Brah Yêsu dŏng âk nau hôr kơt nây gay mbơh nkoch nau ngơi, tĭng nâm nau blau khân păng dơi gĭt vât.

³⁴ Păng vay mbơh nkoch ma khân păng ma nau hôr da dê; ƀiălah dôl păng gŭ êng ndrel ma phung oh mon, Păng rblang lĕ rngôch nau nây ma khân păng.

Brah Yêsu buay phŭt sial

³⁵ Mhaơ măng nar nây, Brah Yêsu lah ma phung oh mon: “Hăn hom he rgăn kơh tê̆ dak ri.”

³⁶ Jêh du tă bơh phung ƀon lan, Păng hôm gŭ tâm plŭng jêh ri phung oh mon leo Păng hăn; geh đŏng plŭng êng tĭng hăn ndrel.

³⁷ Geh phŭt chuănh ktang ngăn, dak rbuh lăp tâm trôm plŭng kŏ tât plŭng bêng dak;

³⁸ ƀiălah Păng nơm dôl gŭ pakơi ntŭk ƀĭt, nsing klơ ka n'hơi gay bê̆ch. Phung oh mon rlay Păng jêh ri lah: “Hơi Nơm Nti, May mâu rvê ma he bơi khĭt jêh?”

³⁹ Păng kah rngăl, buay phŭt sial jêh ri lah ma dak mƀŭt pô aơ: “Đăp mpăn hom jêh ri rngân!” Sial nsrŭng ro jêh ri dak mƀŭt rngân njup.

⁴⁰ Jêh nây Păng đă phung oh mon: “Mâm ƀư khân may klach hâu ir kơt nây? Mâu geh nau chroh ƀơh?”

⁴¹ Phung oh mon klach dŭt n'hâm ngăn, lah ndrăng khân păng: “Mbu moh bunuyh aơ nđâp ma sial jêh ri dak mƀŭt tông bâr păng ntrŭnh da dê?”