Markôs 3 - Nau Brah Ndu Ngơi 2023

Brah Yêsu ƀư bah nau ji tâm nar saƀat

¹ Tơ̆ êng đŏng, Brah Yêsu lăp tâm ngih rƀŭn; ta nây geh du huê bunuyh bu klâu siăr du mpang ti.

² Khân păng kâp uănh Păng gĭt lah ƀư bah bunuyh aơ tâm nar saƀat lĕ, gay phong Păng.

³ Păng lah ma bunuyh siăr ti: “Dâk hom ta nklang aơ!”

⁴ Jêh nây Păng ôp ma khân păng: “Tâm nar saƀat dơi vay ƀư nau ueh mâu lah nau mhĭk, rklaih bunuyh mâu lah nkhĭt bunuyh?” Ƀiălah khân păng gŭ răk klăk da dê.

⁵ Păng uănh ma khân păng, ji nuih ƀă rngot ƀă yor nuih n'hâm khân păng dăng ngăn, jêh ri Păng lah ma bunuyh siăr ti: “Yơr ti may.” Nơm nây yơr ti ro, ti păng bah.

⁶ Phung Pharisi hăn luh, tâm chră ro đah phung bunuyh tâm mpôl Hêrôt tâm rdâng đah Păng gay joi nau dơi nkhĭt Păng.

Phung ƀon lan ta kơh dak mƀŭt

⁷ Brah Yêsu du ndrel ma phung oh mon hăn der mpeh ta dak mƀŭt; geh du mpôl bunuyh âk ngăn tă bơh n'gor Galilê văch tât tĭng Brah Yêsu. Rlau ma nây geh đŏng phung mpôl bu nuyh êng tă bơh Yuđa,

⁸ ƀon Yêrusalem, tă bơh n'gor Iđumê, tă bơh kăl tê̆ dak krong Yurdan, nkual văr jŭm ƀon Tyre jêh ri ƀon Sidôn, lah tăng lư ma lĕ nau Păng ƀư, hăn ran ma Păng da dê.

⁹ Yorlah âk ir bunuyh rĭ dĭng Păng đă phung oh mon ndrăp nkra lor ma Păng du mlâm plŭng, gay ma khân păng mâu mpet in ôh Păng.

¹⁰ Păng hŏ ƀư bah jêh âk bunuyh ji; yor ri, mbu nơm geh nau ji kuet srôih hăn dăch Păng gay ma Păng pah bi.

¹¹ Ăp tơ̆ huêng brah ƀơ̆ ƀơch saơ Brah Yêsu, khân păng chon mon panăp Păng da dê jêh ri kuăl huy: “May jêng Kon Brah Ndu!”

¹² Ƀiălah Păng buay mprân khân păng mâu dơi mbơh Păng mbu nơm jêng.

Brah Yêsu săch jât ma bar kôranh oh mon

¹³ Brah Yêsu hăn hao klơ yôk, kuăl phung bunuyh Păng ŭch, jêh ri khân păng văch ta Păng.

¹⁴ Păng njêng jât ma bar nuyh, rnha jêng kôranh oh mon, gay gŭ ndrel Păng, prơh khân păng hăn mbơh nkoch,

¹⁵ jêh ri ăn ma khân păng nau dơi mprơh brah mhĭk.

¹⁶ Aơ jêng jât ma bar kôranh oh mon, Păng hŏ dăp jêh: Y-Simôn, Păng amoh Y-Pêtrôs;

¹⁷ Y-Yakơ kon Y-Sêƀêđê, jêh ri Y-Yôhan nâu Y-Yakơ, Păng ntơ amoh bar hê aơ jêng Bôanerjơ, nâm bu ntĭt phung kon bu klâu nglaih;

¹⁸ Y-Andrê, Y-Philip; Y-Ƀartôlômi, Y-Mathiơ, Y-Thômas, Y-Yakơ, kon Y-Alphê, Y-Thadê, Y-Simôn, bunuyh n'gor Kananêan,

¹⁹ jêh ri Y-Yuđas Iskariôt jêng nơm rlăng Păng.

Nau tih đah Brah Huêng Ueh

²⁰ Brah Yêsu plơ̆ sĭt ta ngih; geh phung âk văch rgum ta nây, kŏ tât Păng jêh ri phung oh mon mâu geh sông sa.

²¹ Phung tâm ngih Păng tăng nau nây, hăn joi ro gay nkân lơi Păng, yorlah bu lah pô aơ: “Păng hŏ lĕ roh nau mĭn jêh.”

²² Phung kôranh nchih samƀŭt tă bơh ƀon Yêrusalem hăn trŭnh lah: “Bunuyh aơ geh Bêlsêbul lăp, jêh ri geh nau dơi kôranh brah mhĭk ăn, gay mprơh brah mhĭk.”

²³ Brah Yêsu kuăl khân păng hăn dăch, dŏng nau hôr gay lah: “Mâm ƀư Satan dơi mprơh Satan nơm?

²⁴ Tơlah du bri dak tâm nkhah êng păng nơm, bri dak nây mâu dơi dâk nâp ôh;

²⁵ tơlah du rnăk vâl tâm rnglah êng, rnăk vâl nây mâu dơi gŭ jŏ ôh.

²⁶ Tâm ban đŏng, tơlah Satan tâm rdâng đah păng nơm jêh ri tâm nkhah ndrăng nơm pôri păng mâu dơi dâk nâp ôh, ƀiălah hŏ tât ta mrô nglĕ dŭt jêh!

²⁷ Bu mâu dơi lăp tâm ngih du huê bunuyh ktang gay pit drăp ndơ păng, ƀiălah mâu chăp lơi păng lor; ăn chăp bunuyh nây, jêh nây mơ dơi ntŭng ndô ndơ păng.

²⁸ Nanê̆ ngăn, Gâp lah ma khân may, lĕ rngôch nau tih mra dơi yô̆ an ma kon bunuyh, nđâp ma lĕ nau ngơi sưr rlau khân păng hŏ ngơi jêh.

²⁹ Ƀiălah mbu nơm ngơi sưr đah Brah Huêng Ueh mâu mra geh nau yô̆ an ôh, ƀiălah ăn păng geh nau tih n'ho ro.”

³⁰ Păng lah kơt nây yorlah khân păng lah pô aơ: “Bunuyh aơ geh brah huêng ƀơ̆ ƀơch lăp.”

Mê̆ jêh ri oh nâu Brah Yêsu

³¹ Mê̆ jêh ri oh Brah Yêsu tât, gŭ padih jêh ri ăn bu kuăl Păng.

³² Phung âk dôl gŭ jŭm Păng, mbơh ma Păng: “Ri, mê̆ jêh ri phung oh May gŭ padih ri, ŭch joi May.”

³³ Păng plơ̆ sĭt: “Mbu nơm jêng mê̆ Gâp, mbu nơm jêng oh nâu Gâp?”

³⁴ Jêh nây Păng rle uănh ma phung âk gŭ jŭm Păng ta nây jêh ri lah: “Aơ jêng mê̆ Gâp jêh ri oh nâu Gâp!

³⁵ Mbu nơm ƀư tĭng nau Brah Ndu ŭch, nây jêng oh nâu, oh ruh, jêh ri mê̆ Gâp.”