Markôs 2 - Nau Brah Ndu Ngơi 2023

Brah Yêsu ƀư bah nau ji rvĕn

¹ Bar pe nar pakơi, Brah Yêsu plơ̆ đŏng ma ƀon Kapernum, phung ƀon lan tăng lư Păng gŭ tâm ngih

² rĭ dĭng văch âk râk ngăn, kŏ tât pa năp bôk mpông mâu hôm geh ntŭk gŭ ôh. Păng nti lah nau Brah Ndu ngơi ma khân păng.

³ Nôk nây geh puăn nuyh tung njŭn leo tât ma Păng du huê bunuyh rvĕn.

⁴ Yorlah âk ir bunuyh, khân păng mâu dơi djôt leo bunuyh nây văch dăch Păng ôh, pôri khân păng plơk chor ngih tâm sŏng ta ntŭk Brah Yêsu gŭ; jêh nây ta trôm nây ro khân păng yur ntrŭnh sưng bê̆ch bunuyh rvĕn.

⁵ Brah Yêsu saơ nau khân păng chroh, Păng lah ma bunuyh rvĕn nây: “Hơi kon, nau tih may hŏ yô̆ an jêh.”

⁶ Ƀiălah geh ƀaƀă kôranh nchih samƀŭt gŭ ta nây geh nau mĭn êng tâm nuih n'hâm lah:

⁷ “Mâm ƀư bunuyh aơ ngơi kơt nây? Ngơi sưr rlau ngăn yơh! Mbu moh dơi yô̆ an nau tih, knŏng du huê Brah Ndu dơm yơh?”

⁸ Tâm nau mĭn Brah Yêsu gĭt năl ro lĕ moh nau khân păng lah ndrăng khân păng jêh ri Păng lah: “Mâm ƀư tâm nuih n'hâm khân may geh nau mĭn êng kơt nây?

⁹ Tĭng khân may, lah Gâp lah ma bunuyh rvĕn pô aơ: ‘Nau tih may hŏ yô̆ an jêh,’ jêh ri đă: ‘Dâk hom, tuy sưng bê̆ch may jêh ri chuat hăn’ moh nau dơh lơn?

¹⁰ Ƀiălah, gay ma khân may gĭt pô aơ Kon Bunuyh gŭ ta neh ntu geh nau dơi yô̆ an nau tih” — Păng lah ma bunuyh rvĕn —

¹¹ “Gâp đă may, dâk hom, tuy sưng bê̆ch may jêh ri plơ̆ sĭt ta ngih!”

¹² Bunuyh rvĕn dâk, gơnh ro tuy sưng bê̆ch du luh bơh panăp lĕ rngôch bunuyh kŏ tât lĕ rngôch khân păng hih rhâl jêh ri tâm rnê Brah Ndu pô aơ: “He ê hŏ mâp saơ ôh nau nâm bu pô aơ!”

Brah Yêsu kuăl Y-Lêvi. – Nau ât sông sa

¹³ Brah Yêsu plơ̆ hăn ta meng kơh dak mƀŭt; lĕ rngôch phung âk văch ta Păng, jêh ri Păng ntĭm nti ma khân păng.

¹⁴ Ta trong hăn, Păng saơ Y-Lêvi, kon Y-Alphê, dôl gŭ ta jrô riu pi jêh ri lah ma Y-Lêvi: “Tĭng hom Gâp.” Y-Lêvi dâk hăn tĭng Păng.

¹⁵ Dôl Brah Yêsu gŭ sông sa tâm ngih Y-Lêvi, geh âk phung riu pi jêh ri phung geh nau tih hăn gŭ sông sa ndrel ma Brah Yêsu jêh ri phung oh mon Păng, yorlah tâm phung nây geh âk bunuyh lĕ tĭng jêh Păng.

¹⁶ Phung kôranh nchih samƀŭt jêng mpôl Pharisi saơ Brah Yêsu gŭ sông sa ndrel ma phung tih jêh ri phung riu pi, khân păng lah ma phung oh mon Păng pô aơ: “Mâm ƀư Păng gŭ sông sa ndrel ma phung riu pi jêh ri phung tih pônây?”

¹⁷ Tăng kơt nây, Brah Yêsu lah: “Bunuyh ueh săk jăn mâu ŭch ma nai dak si ôh, ƀiălah bunuyh ji kuet. Gâp văch mâu di kuăl bunuyh sŏng srăng ôh, ƀiălah kuăl bunuyh geh nau tih.”

¹⁸ Nôk nây phung oh mon Y-Yôhan jêh ri phung Pharisi ât sông sa da dê, geh du huê văch ngơi ma Brah Yêsu pô aơ: “Mâm ƀư phung oh mon Y-Yôhan jêh ri phung Pharisi ât sông sa da dê, ƀiălah phung oh mon May mâu ât sông sa ôh?”

¹⁹ Brah Yêsu plơ̆ sĭt lah: “Mâm ƀư phung bu jă râng nau nhêt sông tâm nkol ur sai ât sông sa dôl bu klâu gŭ ur hôm gŭ ndrel ma khân păng? Dôl bu klâu gŭ ur hôm gŭ ndrel ma khân păng, khân păng mâu dơi ât sông sa ôh.

²⁰ Ƀiălah tât nôk bu sŏk lơi bu klâu gŭ ur tă bơh khân păng, tâm nar nây khân păng mra ât sông sa.

²¹ Mâu geh du huê bunuyh jĭm bok mhe ndop đah ao ơm ôh; lah ƀư pônây blah bok mhe mra ƀư sat ao ơm, ntŭk sat mra hêk huy lơn.

²² Mâu đŏng geh bunuyh troch ndrănh mhe tâm nông ntâu ơm; lah ƀư pônây, ndrănh mra ƀư đang nông ntâu, ndrănh roh lĕ jêh ri nông ntâu mâu hôm ôh; ƀiălah ndrănh mhe dơm tâm nông ntâu mhe.”

Pah kan tâm nar saƀat

²³ Geh du nar saƀat Brah Yêsu hăn rgăn mir ba ƀlê. Dôl hăn, phung oh mon Păng ntơm tôch bar pe nkong ndrŏng ba.

²⁴ Phung Pharisi lah ma Păng: “Uănh ri, mâm ƀư phung oh mon May ƀư nau mâu dơi vay ƀư ôh tâm nar saƀat?”

²⁵ Brah Yêsu lah: “Mâm khân may ê hŏ rŏ ma nau Y-Đavit hŏ ƀư tơlah păng ndrel ma phung hăn tĭng păng dôl geh nau ji ngot?

²⁶ Tâm rô̆ Y-Abiathar ƀư kôranh ƀư brah toyh lơn, Y-Đavit hŏ lăp tâm ngih Brah Ndu jêh ri sa piăng let nhhơr jêh ri ăn ma phung bunuyh hăn tĭng păng sa đŏng, nđâp lah piăng let nây knŏng ăn phung kôranh ƀư brah dơm dơi vay sa.”

²⁷ Jêh nây Păng lah: “Nar saƀat dơi njêng yor kon bunuyh, mâu di kon bunuyh dơi njêng yor nar saƀat ôh.

²⁸ Pônây yơh Kon Bunuyh jêng Kôranh Brah ma nar saƀat.”