Markôs 16 - Nau Brah Ndu Ngơi 2023

Nau Brah Yêsu dâk rêh tay

¹ Nar saƀat lĕ rlau jêh, H'Mari Mađala, H'Mari mê̆ Y-Yakơ, jêh ri H'Salômê rvăt dak si ƀâu kah gay hăn mhĭng săk jăn Brah Yêsu.

² Nar tal nguay tâm pơh, ntơm bơh ơm ôi, dôl luh nar, pe nuyh tât ntŭk môch.

³ Khân păng lah ndrăng khân păng: “Mbu nơm mra sâm rlă lŭ toyh bơh mpông môch ăn ma he?”

⁴ Ƀiălah dôl n'gơr uănh, khân păng saơ ro lŭ toyh lĕ rlă; nây jêng lŭ toyh ngăn.

⁵ Lăp tâm trôm môch, khân păng saơ du huê bu klâu ndăm nsoh ao jong nglang, gŭ mpeh pa ma, khân păng hih rhâl hâu ngăn.

⁶ Ƀiălah păng lah ma khân păng: “Lơi klach ôh! Khân ay joi Brah Yêsu ƀon Nasaret, jêng Nơm bu pâng kđĭn ta si tâm rkăng. Păng lĕ dâk rêh tay jêh, mâu hôm gŭ ta aơ ôh. Uănh hom ntŭk njor Păng.

⁷ Hăn hom, mbơh ma phung oh mon Păng jêh ri Y-Pêtrôs pô aơ Brah Yêsu lĕ hăn tât ta n'gor Galilê lor ma khân may. Ta nây, khân may mra saơ Păng nâm bu Păng hŏ lah jêh ma khân may.”

⁸ Dôl luh tă bơh môch, phung bu ur nchuăt du yorlah khân păng hih rhâl jêh ri klach râm sâr. Khân păng mâu nănh ngơi ma bu ôh yorlah khân păng klach hâu ngăn. [

Brah Yêsu tâm mpơl ma H'Mari Mađala

⁹ Nôk Brah Yêsu dâk rêh tay tâm ơm ôi nar tal nguay tâm pơh, lor lơn Păng tâm mpơl ma H'Mari Mađala, jêng nơm Păng sâm mprơh ngluh jêh pơh brah djơh.

¹⁰ Ay hăn mbơh nau nây ma phung hŏ hăn tĭng Păng dôl rngot klâng, nhĭm nhhiăng.

¹¹ Ƀiălah lah khân păng tăng jêh ma Păng lĕ dâk rêh tay jêh ri bu ur nây saơ jêh Păng, khân păng mâu chroh ôh.

Brah Yêsu tâm mpơl ma phung oh mon

¹² Jêh nĕ, Brah Yêsu sŏk muh măt êng tâm mpơl ma bar hê tâm phung oh mon, dôl hăn trong plơ̆ sĭt ma ƀon.

¹³ Bar hê nây plơ̆ sĭt mbơh nau nây ma phung oh mon êng, ƀiălah khân păng mâu chroh ôh.

¹⁴ Jêh nây, Păng tâm mpơl ma jât ma nguay oh mon dôl khân păng gŭ sông sa. Păng nduyh ma khân păng nau khân păng mâu chroh jêh ri dăng nuih n'hâm, yor khân păng mâu chroh ma phung lĕ saơ jêh Păng dâk rêh tay.

¹⁵ Păng lah ma khân păng: “Hăn hom lam neh ntu, mbơh nkoch Nau Mhe Mhan Ueh ma lĕ rngôch bunuyh.

¹⁶ Mbu nơm chroh jêh ri dơn nau ƀaptem mra rklaih; ƀiălah mbu nơm mâu chroh ôh mra dơn nau tâm rmal.

¹⁷ Phung bunuyh chroh mra dơi geh nau tâm mbên khlay hăn ndrel: Khân păng mra sŏk amoh Gâp gay mprơh brah mhĭk; mra ngơi lĕ nau ngơi mhe;

¹⁸ nhŭp bêh tâm ti, mâu lah tơlah geh nhêt dak kăch mâu đŏng geh khêh; khân păng pah ti ta bunuyh ji kuet pôri bunuyh ji kuet mra dơi bah.”

Brah Yêsu hao klơ trôk

¹⁹ Jêh ngơi kơt nây, Brah Ndu chông Păng hao klơ trôk, gŭ mpeh pa ma Brah Ndu.

²⁰ Phung oh mon luh hăn mbơh nkoch lam ntŭk; Kôranh Brah pah kan ndrel ma khân păng jêh ri ăn lĕ nau mbên khlay tĭng groi gay ƀư ăn nâp nau chroh.]