Markôs 15 - Nau Brah Ndu Ngơi 2023

Brah Yêsu panăp Pilat

¹ Tât ơm ôi, phung kôranh ƀư brah toyh rgum tâm nchră đah kôranh phung bu ranh, kôranh nchih samƀŭt, jêh ri lĕ rngôch Mpôl Kôranh Phat Dôih; khân păng chăp Brah Yêsu jêh ri njŭn leo jao Păng ma Pilat.

² Pilat ôp Păng: “May jêng Hađăch phung Yuđa ƀơh?” Brah Yêsu plơ̆ lah: “May lah jêh nau nây.”

³ Phung kôranh ƀư brah toyh phong Brah Yêsu âk ntil nau.

⁴ Pilat ôp đŏng ma Păng: “May mâu hôm plơ̆ lah ƀơh? Uănh hom, khân păng phong may âk ngăn!”

⁵ Ƀiălah Brah Yêsu mâu hôm plơ̆ lah đŏng ôh, kŏ tât Pilat hih rhâl.

⁶ Tâm nar rƀŭn, Pilat vay mbơk ăn kon me ma du huê bu nă phung ƀon lan dăn.

⁷ Nôk nây geh du huê bunuyh amoh păng Y-Barabas bu krŭng ta ndrung ndrel ma phung tâm rdâng, jêng phung ƀư nkhĭt bunuyh tâm nôk dâk tâm rdâng.

⁸ Phung ƀon lan hŏ văch jêh ri dăn ma Pilat ƀư nau păng vay ƀư ma khân păng.

⁹ Pilat ôp: “Khân may ŭch lĕ gâp mƀơk Hađăch phung Yuđa ma khân may?”

¹⁰ Yorlah păng gĭt rah vah jêh ma phung kôranh ƀư brah toyh jao jêh Brah Yêsu yor nau tâm rmot.

¹¹ Ƀiălah phung kôranh ƀư brah toyh nsŭk nsôr phung ƀon lan gay dăn Pilat mƀơk Y-Barabas.

¹² Pilat lŏ ôp tay: “Pônây, mâm khân may ŭch gâp ƀư ma bunuyh nơm khân may ntơ Hađăch phung Yuđa?”

¹³ Khân păng nter tay: “Pâng hom păng ma kđĭn ta si tâm rkăng!”

¹⁴ Pilat ôp ma khân păng: “Ƀiălah moh nau mhĭk bunuyh aơ ƀư jêh?” Khân păng nter ktang lơn: “Pâng păng ma kđĭn ta si tâm rkăng!”

¹⁵ Yor Pilat ŭch ƀư maak ma phung ƀon lan, păng mƀơk Y-Barabas. Jêh ri ăn bu dong Brah Yêsu ma mâng, Pilat jao Brah Yêsu ăn khân păng djôt leo gay pâng kđĭn ta si tâm rkăng.

¹⁶ Phung tahan njŭn Brah Yêsu lăp tâm ngih kôranh n'gor; lĕ rngôch mpôl tahan rgum ta nây da dê.

¹⁷ Khân păng nsoh ao chăng ma Brah Yêsu jêh ri ndô ta bôk Brah Yêsu du đon hađăch ma lok hŏ ơm tanh jêh,

¹⁸ jêh nây mbah ma Păng: “Hơi Hađăch phung Yuđa!”

¹⁹ Khân păng sŏk đŏng tơm rpho mbang ta bôk Păng, soh dak diu ta Păng, jêh ri chon kômâk mbah ma Păng.

²⁰ Jêh hŏ mưch rmot ma Păng, phung tahan doh lơi ao chăng, nsoh ao Păng nơm jêh ri njŭn leo Păng luh padih gay pâng kđĭn ta si tâm rkăng.

Bu pâng kđĭn Brah Yêsu

²¹ Khân păng nchâp du huê bunuyh hăn rgăn trong tuy si tâm rkăng Păng. Bunuyh nây amoh Y-Simôn, bunuyh Siren, jêng mbơ̆ Y-Aleksandrơ jêh ri Y-Ruphus, văch tă bơh ƀon tơm.

²² Khân păng njŭn leo Brah Yêsu tât du ntŭk bu kuăl jêng Gôgôtha, nâm bu ntĭt Ntŭk Nting Bôk.

²³ Khân păng ăn ma Păng nhêt ndrănh pot đah dak si tăng, ƀiălah Păng mâu nhêt ôh.

²⁴ Nôk pâng Păng ma kđĭn ta si tâm rkăng, khân păng tâm pă kho ao Păng, nchroh n'hôr, gay ŭch gĭt mbu nơm geh.

²⁵ Ta sĭn mông ôi khân păng pâng kđĭn Păng.

²⁶ Nau dôih Păng bu nchih ta klơ plơp kađar: “HAĐĂCH PHUNG YUĐA.”

²⁷ Ndrel ma Brah Yêsu, khân păng pâng kđĭn đŏng bar hê bunuyh ntŭng: du huê pa ma, du huê pa chiau Brah Yêsu.

²⁹ Phung hăn rgăn ta nây gơm mưch, rteh bôk jêh ri lah: “Hơ hơ! May jêng nơm ƀư rai ngih brah jêh ri ndâk đŏng tâm pe nar,

³⁰ rklaih hom may nơm jêh ri ntrŭnh hom tă bơh si tâm rkăng!”

³¹ Phung kôranh ƀư brah toyh jêh ri kôranh nchih samƀŭt gơm mpray tâm ban pônây đŏng. Khân păng lah ndrăng khân păng: “Păng hŏ rklaih jêh bunuyh êng ƀiălah mâu dơi rklaih ôh păng nơm!

³² Hơi Brah Krist, Hađăch Phung Israel, aƀaơ aơ jŭr hom bơh si tâm rkăng, gay hên saơ jêh ri chroh!” Bar hê bunuyh ntŭng bu pâng kđĭn ndrel ma Păng suai rak ma Păng tâm ban lĕ.

Nau Brah Yêsu khĭt

³³ Klăp lah nklang bôk nar, nau ngo klĕng nkŭm lam neh ntu tât pe mông mhaơ.

³⁴ Ta pe mông mhaơ Brah Yêsu nter dŭt nteh: “Êli, Êli, lama sabaktani?” Nâm bu ntĭt: “Ơ Brah Ndu Gâp, Ơ Brah Ndu Gâp, mâm ƀư May chalơi Gâp?”

³⁵ Tăng kơt nây ƀaƀă bunuyh gŭ dăch ta nây lah: “Uănh ri, păng kuăl Êli.”

³⁶ Geh du huê bunuyh nchuăt hăn sŏk bok mli mbŭk tâm dak srat, kât ta chiông tơm rpho, ndơ̆ ăn Păng nhêt jêh ri lah: “Gŭ kâp hom, uănh Y-Êli mra văch gay djôt leo păng trŭnh mâu lah mâu.”

³⁷ Ƀiălah Brah Yêsu nter du tong dŭt ktang, jêh nây tăch n'hâm.

³⁸ Bok nching tâm ngih brah nkhêk jêng bar ntơm bơh klơ jŭr tât tâm dâng.

³⁹ Du huê kôranh tahan gŭ mpeh panăp Brah Yêsu, saơ Păng tăch n'hâm tâm ban pônây jêh ri lah: “Nanê̆ bunuyh aơ jêng Kon Brah Ndu!”

⁴⁰ Geh lĕ phung bu ur dâk uănh bơh ngai; tâm phung nây geh H'Mari Mađala, H'Mari mê̆ Y-Yakơ jê̆ jêh ri Y-Yôsê, ndrel ma H'Salômê,

⁴¹ jêng phung bunuyh hŏ tĭng jêh ri pah kan jêh ma Brah Yêsu dôl Păng gŭ ta n'gor Galilê; geh đŏng âk phung bu ur êng, jêng phung bunuyh ndrel ma Brah Yêsu hăn ma ƀon Yêrusalem.

Nau bu tâp Brah Yêsu

⁴² Tơlah trôk dăch kêng măng, nar nây jêng nar Ndrăp Nkra, nâm bu ntĭt lor ma nar saƀat,

⁴³ geh Y-Yôsep, bunuyh ƀon Arimathê, du huê nơm bu yơk tâm Mpôl Kôranh Phat Dôih, păng kâp gân ma ƀon bri hađăch Brah Ndu, janh nănh hăn tât ntŭk Pilat dăn săk jăn Brah Yêsu.

⁴⁴ Pilat hih rhâl nau Brah Yêsu khĭt jêh, rĭ dĭng păng kuăl kôranh tahan gay ôp Brah Yêsu khĭt ngăn mâu lah mâu.

⁴⁵ Nôk hŏ tăng jêh kôranh tahan mbơh, Pilat jao săk jăn Brah Yêsu ma Y-Yôsep.

⁴⁶ Y-Yôsep rvăt du blah bok mhay jêh ri djôt leo săk jăn Brah Yêsu trŭnh bơh si tâm rkăng, sŏk bok put njor Păng jêh ri n'gân Păng tâm môch bu lôk jêh tâm lŭ. Jêh ri păng rlă du lŭ toyh rdâl ta mpông môch.

⁴⁷ H'Mari Mađala jêh ri H'Mari mê̆ Y-Yôsê hŏ saơ da dê ntŭk bu njor Brah Yêsu.