Markôs 14 - Nau Brah Ndu Ngơi 2023

Nau rêh ni, nau khĭt jêh ri nau dâk rêh tay Brah Yêsu ( 14:1 – 16:20 ) Nau phung kôranh ƀư brah tâm chră

¹ Hôm bar nar ma tât rƀŭn Nau Găn jêh ri rƀŭn Piăng Let Mâu Geh Ndrui, phung kôranh ƀư brah toyh jêh ri phung kôranh nchih samƀŭt joi trong gay nhŭp jêh ri nkhĭt Brah Yêsu.

² Khân păng lah: “Lơi ƀư ôh tâm nar rƀŭn, klach lah ƀư nau uh ah tâm phung ƀon lan.”

Nau tŏ dak ƀâu kah ma Brah Yêsu ta ƀon Bêthani

³ Brah Yêsu gŭ ta ƀon Bêthani, tâm ngih Y-Simôn jêng nơm geh phŭng sa. Dôl Păng hôm gŭ ta sưng sông sa, geh du huê bu ur lăp, djôt du mlâm rchŏk ma lŭ khlay geh dak ƀâu kah mâu hŏ pot li khlay prăk ngăn. Bu ur nây dong nchah lơi rchŏk jêh ri lĭng dak ƀâu kah ta klơ bôk Brah Yêsu.

⁴ Geh ƀaƀă bunuyh ji nuih, lah ndrăng khân păng: “Mâm ƀư mpŭng dak ƀâu kah tâm ban pônây?

⁵ Yorlah bu tăch dak ƀâu kah aơ rlau pe rhiăng đơniê gay tâm pă ma phung o ach.” Khân păng nduyh bu ur nây.

⁶ Ƀiălah Brah Yêsu lah: “Kđôi păng. Mâm ƀư khân may ƀư rsuak ma păng? Păng ƀư jêh nau ueh ma Gâp.

⁷ Yorlah khân may geh ƀaƀơ phung o ach ndrel ma khân may, moh mông khân may ŭch ƀư nau ueh ma khân păng dơi da dê; ƀiălah Gâp mâu mra gŭ ndrel ma khân may ƀaƀơ ôh.

⁸ Bu ur aơ ƀư jêh tĭng nâm nau păng dơi ƀư, tŏ jêh dak ƀâu kah ma săk jăn Gâp gay ndrăp lor ma nau tâp brôi.

⁹ N'hêl nanê̆, Gâp lah ma khân may, lam neh ntu aơ, ăp ntŭk bu mbơh nkoch ma Nau Mhe Mhan Ueh, nau kan bu ur nây hŏ ƀư bu mra nkah tay gay kah gĭt păng.”

Y-Yuđas rlăng Brah Yêsu

¹⁰ Y-Yuđas Iskariôt, jêng du huê tâm jât ma bar kôranh oh mon, hăn tâm mâp đah phung kôranh ƀư brah toyh gay jao Brah Yêsu ma khân păng.

¹¹ Tăng nau nây khân păng răm maak ngăn, jêh ri ton ăn prăk ma Y-Yuđas. Y-Yuđas joi mông găl gay rlăng jao Păng.

Brah Yêsu kah gĭt ndray rƀŭn Nau Găn jêh ri njêng rƀŭn Nhêt Sa Tâm Êp

¹² Ta nar tal nguay tâm nau rƀŭn Piăng Let Mâu Geh Ndrui, jêng nar bu nkhĭt kon biăp rƀŭn Nau Găn, phung oh mon lah ma Brah Yêsu: “Ta ntŭk Nơm Nti ŭch hên hăn jêh ri nkra rƀŭn Nau Găn?”

¹³ Păng prơh bar hê oh mon păng hăn jêh ri lah: “Lăp hom tâm ƀon, geh du huê bunuyh mbăk yăng dak mra mâp khân may. Hăn hom tĭng păng;

¹⁴ moh ngih păng lăp, ăn khân may lah ma kôranh ngih nây pô aơ: ‘Nơm Nti ôp: Mbah ntŭk jrô Gâp ndrel ma phung oh mon Gâp sông sa rƀŭn Nau Găn?’

¹⁵ Nơm ngih mra ntĭm ma khân may du jrô toyh ta klơ bu rơm ndrăp jêh. Ndrăp hom ma he ta nây.”

¹⁶ Bar hê oh mon hăn ma ƀon jêh ri saơ lĕ nau di nâm bu Păng lah jêh, jêh nây khân păng nkra rƀŭn Nau Găn.

¹⁷ Tât kêng măng, Brah Yêsu văch ndrel jât ma bar kôranh oh mon.

¹⁸ Dôl sông sa, Brah Yêsu lah: “Nanê̆ ngăn, Gâp lah ma khân may, du huê tâm phung khân may gŭ sông sa ndrel ma Gâp ta aơ mra tâm rlăng đah Gâp.”

¹⁹ Phung oh mon rngot ngăn, ăp nơm khân păng ôp Păng: “Di gâp lĕ?”

²⁰ Păng plơ̆ lah: “Nây jêng du huê tâm jât ma bar nuyh, jêng nơm dôl mbŭk piăng let tâm ngan ndrel ma Gâp.

²¹ Yorlah Kon Bunuyh hăn kơt nau nchih jêh ma Păng, ƀiălah rêh ni yơh ma nơm tâm rdâng ma Kon Bunuyh! Ueh lơn lơi deh ôh ma nơm nây.”

²² Dôl gŭ sông sa, Brah Yêsu sŏk piăng let, lah ueh, jêh ri nkê̆ch piăng let jêh ri ăn ma phung oh mon jêh ri lah: “Sŏk hom, aơ jêng săk jăn Gâp.”

²³ Păng sŏk kachok, lah ueh, jêh ăn ma phung oh mon, jêh ri lĕ rngôch khân păng nhêt da dê.

²⁴ Brah Yêsu lah: “Aơ jêng mham Gâp, mham ma nau tâm rnglăp nkhŭt ăn ma âk bunuyh.

²⁵ N'hêl nanê̆, Gâp lah ma khân may, Gâp mâu mra nhêt dak krăk ƀâu aơ đŏng, kŏ tât nar Gâp mra nhêt dak krăk ƀâu mhe tâm ƀon bri hađăch Brah Ndu.”

Nau mbơh lor ma Y-Pêtrôs

²⁶ Jêh khân păng mprơ samƀŭt nau mprơ, Brah Yêsu jêh ri phung oh mon luh hăn, hao klơ yôk Ôlive.

²⁷ Brah Yêsu lah ma phung oh mon: “Lĕ rngôch khân may mra cha lôt; yorlah geh nau hŏ nchih pô aơ: ‘Gâp mra lơh bunuyh rmăk biăp, Jêh ri phung biăp mra nchah rai pru pra.’

²⁸ Ƀiălah jêh Gâp dâk rêh tay, Gâp mra hăn tât n'gor Galilê lor ma khân may.”

²⁹ Y-Pêtrôs ơh: “Nđâp tơlah lĕ rngôch khân păng mra chalơi, ƀiălah gâp mâu mra chalơi ôh.”

³⁰ Brah Yêsu plơ̆ lah: “Nanê̆ ngăn Gâp lah may, nar aơ, ta măng aơ ro, êlor ma iăr ndrau bar tơ̆, may mra dun ma gâp pe tơ̆.”

³¹ Ƀiălah Y-Pêtrôs lah ma nau ktang lơn: “Tơlah gâp khĭt ndrel ma Nơm Nti kđôi lĕ, gâp mâu mra dun ma May ôh.” Lĕ rngôch oh mon êng lah kơt nây da dê.

Brah Yêsu mbơh sơm ta n'gar Gêtsêmanê

³² Jêh nây, Brah Yêsu hăn ndrel ma phung oh mon tâm du ntŭk rnha Gêtsêmanê. Păng lah ma khân păng: “Gŭ hom ta aơ dôl Gâp mbơh sơm.”

³³ Păng jă Y-Pêtrôs, Y-Yakơ jêh ri Y-Yôhan hăn ndrel. Păng ntơm geh nau rngot rvê jêh ri nau rŭng răng.

³⁴ Păng lah ma khân păng: “Huêng gâp rngot rvê ngăn kŏ tât khĭt, khân may hôm gŭ ta aơ jêh ri rngeh njrăng.”

³⁵ Hăn tay ngai đê̆, Păng chon mon ta neh jêh ri mbơh sơm, gay tơlah dơi dăn mông aơ mâu tât ôh ma Păng.

³⁶ Păng ơh: “Aƀa, ơ Mbơ̆, lĕ rngôch nau Mbơ̆ dơi ƀư da dê. Dăn Mbơ̆ sŏk lơi kachok aơ bơh Gâp, ƀiălah mâu di tĭng nau Gâp ŭch ôh, ƀiălah tĭng nâm nau Mbơ̆ nơm ŭch.”

³⁷ Jêh nây Păng plơ̆ văch, saơ pe bunuyh lêt bê̆ch; Păng lah ma Y-Pêtrôs: “Hơi Y-Simôn, may bê̆ch ƀơh! Mâu ƀơh may dơi rngeh du mông?

³⁸ Rngeh njrăng hom jêh ri mbơh sơm, gay ma khân may mâu tŭp tâm nau ndơm. Huêng ŭch ngăn, ƀiălah nglay săk rdja.”

³⁹ Brah Yêsu hăn jêh ri mbơh sơm nâm bu kơt panăp.

⁴⁰ Jêh ri Păng plơ̆ tay saơ phung oh mon hôm bê̆ch, yorlah măt khân păng hŏ ŭch bê̆ch ngăn jêh ri khân păng mâu gĭt moh nau plơ̆ lah ma Păng.

⁴¹ Păng plơ̆ tay đŏng rơh pe, jêh ri lah ma phung oh mon: “Mâm khân may hôm bê̆ch jêh ri gŭ rlu? Găp jêh, mông tât jêh! Aơ, nơm rlăng mra jao Kon Bunuyh tâm ti phung tih.

⁴² Dâk hom, hăn hom he. Ri, nơm rlăng ma Gâp tât jêh.”

Bu nhŭp Brah Yêsu

⁴³ Ƀât lât dôl Brah Yêsu hôm ngơi, Y-Yuđas, du huê tâm jât ma bar kôranh oh mon, văch. Păng hăn ndrel phung âk djôt đao jêh ri mâng, tă bơh phung kôranh ƀư brah toyh, phung kôranh nchih samƀŭt, jêh ri kôranh phung bu ranh njuăl tât.

⁴⁴ Nôk nây, nơm rlăng ăn khân păng du nau mbên: “Nơm gâp mra chŭm, nĕ yơh jêng bunuyh nây; nhŭp hom jêh ri leo hăn ăn rjăp.”

⁴⁵ Pônây, Y-Yuđas hăn tât dăch Păng ro jêh ri lah: “Hơi Nơm Nti!” jêh ri chŭm Păng.

⁴⁶ Phung nây nhŭp Păng ro.

⁴⁷ Du huê tâm phung bunuyh gŭ dăch tăk đao, dong jêh ri sreh tăch tôr du huê oh mon kôranh ƀư brah toyh lơn.

⁴⁸ Brah Yêsu lah ma khân păng: “Di lĕ khân may djôt đao jêh ri mâng jra gay nhŭp Gâp nâm bu nhŭp du huê ntŭng?

⁴⁹ Ăp nar Gâp gŭ ndrel ma khân may, nti lah tâm ngih brah, ƀiălah khân may mâu nhŭp Gâp. Nđâp lah pônây, nđâp lah kơt nây, ăn tât hom tĭng nâm nau Brah Ndu Ngơi hŏ lah.”

⁵⁰ Lĕ rngôch chalơi Păng, nchuăt du.

⁵¹ Geh du huê bu klâu ndăm hăn tĭng Păng, n'gut knŏng du blah bok mhay. Khân păng nhŭp bu klâu nây,

⁵² ƀiălah păng chalơi bok mhay nây, nchuăt du săk hưl.

Brah Yêsu tanăp Mpôl Kôranh Phat Dôih

⁵³ Khân păng njŭn leo Brah Yêsu tât ta ngih kôranh ƀư brah toyh lơn. Lĕ rngôch phung kôranh ƀư brah toyh lơn, kôranh phung bu ranh, jêh ri phung kôranh nchih samƀŭt rgum ndrel ta nây.

⁵⁴ Y-Pêtrôs hăn tĭng Păng ngai ngai, lăp tâm nkual ngih kôranh ƀư brah toyh lơn, păng gŭ ndrel tahan, njâr ŭnh ta nây.

⁵⁵ Phung kôranh ƀư brah toyh jêh ri lĕ rngôch Mpôl Kôranh Phat Dôih joi nau mbơh phong ma Brah Yêsu gay nkhĭt Păng, ƀiălah mâu saơ du ntil nau ôh.

⁵⁶ Yorlah geh âk bunuyh phong nchơt gay tâm rdâng đah Păng, ƀiălah nau khân păng mbơh mâu tâm di.

⁵⁷ Geh ƀaƀă bunuyh dâk mbơh nchơt gay tâm rdâng ma Păng lah:

⁵⁸ “Hên tăng jêh păng lah: ‘Gâp mra ƀư rai lơi ngih brah ti kon bunuyh ndâk njêng; tâm pe nar Gâp mra ndâk tay du ngih brah êng, mâu di ti kon bunuyh ƀư ôh.’ ”

⁵⁹ Ƀiălah ta ntŭk aơ, nau khân păng mbơh mâu tâm di.

⁶⁰ Kôranh ƀư brah toyh lơn dâk ta nklang Mpôl kôranh phat dôih jêh ri ôp Brah Yêsu: “May mâu plơ̆ lah ma lĕ nau phung aơ phong may ƀơh?”

⁶¹ Ƀiălah Păng gŭ rklăk, mâu plơ̆ lah du nau ôh. Kôranh ƀư brah toyh lơn ôp tay: “May jêng Brah Krist lĕ, Kon Brah Ndu Nơm Khư Bu Tâm Rnê?”

⁶² Brah Yêsu lah: “Gâp yơh nây. Jêh ri khân may mra saơ Kon Bunuyh Gŭ mpeh pa ma Nơm Nau Brah, Jêh ri plơ̆ văch ta ndâr tŭk klơ trôk.”

⁶³ Kôranh ƀư brah toyh lơn nkhêk ao păng jêh ri lah: “Moh nau mbơh êng ma he hôm joi đŏng?

⁶⁴ Khân may tăng jêh nau ngơi sưr rlau nây! Moh nau khân may tâm nal?” Lĕ rngôch khân păng phat dôih Păng jêng khư ma nau khĭt.

⁶⁵ Ƀaƀă bunuyh ntơm soh dak diu ta Păng, nsêt măt Păng, đŏl Păng jêh ri lah: “Mbơh lor hom!” Phung tahan gak kuăn jêh ri tap Păng.

Y-Pêtrôs dun ma Brah Yêsu

⁶⁶ Dôl Y-Pêtrôs gŭ tâm dâng ndring, du huê tâm phung oh mon bu ur kôranh ƀư brah toyh lơn văch dăch,

⁶⁷ saơ Y-Pêtrôs njâr ŭnh, uănh muh măt păng jêh ri lah: “May gŭ jêh ndrel ma Brah Yêsu, bunuyh Nasaret.”

⁶⁸ Ƀiălah Y-Pêtrôs dun: “Gâp mâu gĭt ôh, mâu lĕ gĭt rbăng moh nau ay lah nây.” Jêh nây Y-Pêtrôs du luh hăn ta ndring panăp, nôk nây iăr ndrau.

⁶⁹ Oh mon bu ur nây saơ păng, lah đŏng ma phung bunuyh gŭ dăch: “Bu klâu aơ đŏng jêng du huê tâm phung mpôl nây.”

⁷⁰ Ƀiălah Y-Pêtrôs dun du tơ̆ đŏng. Ƀât lât pakơi, phung gŭ dăch lah tay ma Y-Pêtrôs: “Nanê̆ ngăn may jêng du huê tâm phung mpôl nây, yorlah may jêng bunuyh n'gor Galilê.”

⁷¹ Ƀiălah Y-Pêtrôs rak săk ro jêh ri ton: “Gâp mâu gĭt năl ôh bunuyh khân ay may lah nây!”

⁷² Dôl nôk nây, iăr ndrau rơh bar. Y-Pêtrôs kah gĭt ma nau Brah Yêsu lah jêh ma păng: “Êlor ma iăr ndrau rơh bar, may mra dun ma Gâp pe tơ̆.” Păng nhĭm rngot hâu ngăn.