Markôs 13 - Nau Brah Ndu Ngơi 2023

Nau mbơh lor ma nau ƀư rai Yêrusalem jêh ri nau Kôranh Brah plơ̆ văch

¹ Dôl Brah Yêsu luh du bơh ngih brah, du huê oh mon lah ma Păng: “Hơi Nơm Nti, May uănh ri, âk lŭ toyh jêh ri lĕ ngih toyh ngăn!”

² Brah Yêsu plơ̆ lah: “May saơ lĕ ngih toyh aơ? Jêh aơ taơ mâu mra hôm du mlâm lŭ dăp gŭ ta klơ mlâm lŭ êng ôh. Lĕ rngôch mra rlâm da dê.”

³ Nôk Păng dôl gŭ ta yôk Ôlive, tâm tham đah ngih brah, Y-Pêtrôs, Y-Yakơ, Y-Yôhan, jêh ri Y-Andrê văch ôp êng Păng:

⁴ “Dăn Nơm Nti mbơh ma hên gĭt ndah jŏ lĕ nau nây mra tât jêh ri moh nau mbên gay ma gĭt mông nglĕ dŭt lĕ rngôch nau nây?”

⁵ Brah Yêsu ntơm lah ma khân păng: “Njrăng hom, lơi ăn bu ndơm khân may.

⁶ Yorlah geh âk bunuyh mra nchơt nklă amoh Gâp văch jêh ri lah pô aơ: ‘Gâp nơm yơh jêng nơm nây!’ jêh ri khân păng mra ndơm âk bunuyh.

⁷ Nôk khân may tăng bu lah ma nau tâm lơh jêh ri tăng bu nkoch ma nau tâm lơh, lơi rŭng răng; ƀiălah ê hŏ tât nglĕ dŭt ôh.

⁸ Yorlah phung ƀon lan aơ mra tâm rdâng đah phung ƀon lan êng, bri dak tê̆ mra tâm rdâng đah bri dak ri. Mra geh nau n'găr neh ta âk ntŭk, jêh ri tât nau sât ji ngot. Nau nây jêng knŏng nau ntơm ma nau rêh ni.

⁹ Bi ma khân may, ăn khân may njrăng yorlah bu mra jao khân may ma phung kôranh phat dôih; bu mra dong khân may tâm lĕ ngih rƀŭn; jêh ri yor ma Gâp, khân may mra gŭ panăp phung kôranh n'gor jêh ri phung hađăch gay mbơh ma khân păng.

¹⁰ Ƀiălah lor lơn, Nau Mhe Mhan Ueh dơi mbơh nkoch ma lĕ rngôch mpôl băl bunuyh.

¹¹ Tơlah bu jao khân may ma nau phat dôih, lơi rvê lor ma nau khân may mra ngơi, ƀiălah ta mông nây, ngơi hom tĭng nau ngơi mra ăn ma khân may; yorlah mâu di khân may mra ngơi ôh, ƀiălah Brah Huêng Ueh yơh.

¹² Oh nâu mra tâm jao ndrăng nơm ăn bu ƀư nkhĭt; mbơ̆ mra jao kon; kon mra dâk tâm rdâng đah mê̆ mbơ̆ jêh ri ƀư ăn ma khân păng khĭt.

¹³ Lĕ rngôch bunuyh mra tâm rmot ma khân may yor amoh Gâp. Ƀiălah mbu nơm nâp nuih n'hâm tât lôch dŭt mra dơi rklaih.

¹⁴ Ƀiălah tơlah khân may saơ nau ƀơ̆ ƀơch ngăn ƀư nau rai ta ntŭk mâu dơi vay ƀư ôh (mbu rŏ mra gĭt vât), pôri mbu dôl gŭ tâm n'gor Yuđa nchuăt du hom klơ yôk;

¹⁵ mbu nơm gŭ ta klơ chor ngih lơi trŭnh ôh mâu lah nchuăt lăp tâm ngih gay sŏk drăp ndơ;

¹⁶ mbu gŭ tâm mir, lơi plơ̆ sĭt sŏk ao mbâl.

¹⁷ Tâm lĕ nar nây, rêh ni ngăn yơh ma bu ur bă ntreo nđâp ma bu ur hôm ăn kon pu toh!

¹⁸ Mbơh sơm hom ma nau nây gay ma mâu tât tâm yan sial puh.

¹⁹ Yorlah tâm lĕ nar nây mra geh nau rêh ni ntơm bơh rnôk rhăk trôk neh ntu, rnôk Brah Ndu rhăk njêng trôk neh ntu n'ho tât ma aƀaơ aơ, mâu prot geh, jêh ri pakơi taơ mâu đŏng geh tâm ban pônây.

²⁰ Tơlah Kôranh Brah mâu ăn n'hŭch gleh lĕ nar nây, pôri mâu geh du huê bunuyh dơi rklaih; ƀiălah yor phung Păng hŏ săch rĭ dĭng Păng n'hŭch gleh lĕ nar nây.

²¹ Nôk nây, tơlah geh mbu lah ma khân may: ‘Aơ, ta aơ Brah Krist!’ mâu lah ‘Ri, Păng gŭ ta nây!’ lơi ta chroh.

²² Lĕ bunuyh nklă amoh Brah Krist jêh ri phung nơm mbơh lor nklă mra mpơl; khân păng ƀư lĕ nau mbên khlay, nau khlay toyh ngăn gay lah dơi ƀư, khân păng ndơm nđâp ma phung hŏ săch jêh.

²³ Njrăng hom. Gâp hŏ mbơh lor jêh lĕ nau ma khân may.

²⁴ Tâm lĕ nar nây, rnôk pakơi nau rêh ni, Nar mra jêng ngo, Khay mâu mra nchrat ang ôh,

²⁵ Lĕ rngôch mănh mbing mra tŭp tă bơh trôk, Jêh ri lĕ nau dơi klơ trôk mra mpât n'gơ.

²⁶ Nôk nây bu mra saơ Kon Bunuyh sŏk nau dơi toyh jêh ri nau chrêk rmah toyh văch ta nklang ndâr tŭk.

²⁷ Păng mra njuăl phung tông mpăr tâm rgum phung Păng hŏ săch jêh lam puăn njônh, ntơm bơh bôl trôk tât ma bôl dŭt neh.

²⁸ Sŏk hom nau nti ntơm bơh tơm rvi, dôl tơm ntơm chăt nkeh nse, luh n'ha ri mơ khân may gĭt yan vai bơi tât jêh.

²⁹ Tâm ban lĕ, tơlah khân may saơ lĕ nau nây tât, khân may gĭt Kon Bunuyh văch dăch jêh, dôl gŭ dâk tanăp mpông.

³⁰ Nanê̆, Gâp lah ma khân may, bunuyh rnôk aƀaơ aơ mâu mra rlau lôch ôh ê lor ma lĕ nau nây tât.

³¹ Trôk neh ntu mra rlau lôch, ƀiălah lĕ nau Gâp ngơi mâu mra rlau lôch ôh.

³² Ma nar jêh ri mông nây, mâu geh du huê bunuyh gĭt ôh, nđâp ma phung tông mpăr klơ trôk, mâu lah Kon Bunuyh mâu dơi gĭt lĕ, knŏng êng Mbơ̆ dơm gĭt.

³³ Njrăng hom jêh ri gŭ rngeh yorlah khân may mâu gĭt ôh ndah jŏ mông nây mra tât.

³⁴ Nâm bu du huê bunuyh ri dăch hăn tât ntŭk ngai, tơlah luh tă bơh ngih, jao nau dơi ma phung oh mon, ăp nơm du ntil kan, jêh ri ntĭnh ma nơm gak mpông sâng gŭ kâp uănh.

³⁵ Pônây, gŭ rngeh hom yorlah khân may mâu gĭt ôh kôranh ngih plơ̆ sĭt ndah jŏ, mâu lah kêng măng, n'gul măng, dôl iăr ndrau, mâu lah ơm ôi,

³⁶ klach lah kôranh plơ̆ sĭt ndal, ban khân may hăk bê̆ch.

³⁷ Lĕ nau Gâp lah ma khân may, Gâp lah ma lĕ rngôch bunuyh đŏng: Gŭ rngeh njrăng hom!”