Markôs 12 - Nau Brah Ndu Ngơi 2023

Nau hôr ma phung kan nkhôm tâm mir play krăk ƀâu

¹ Brah Yêsu ntơm dŏng nau hôr gay lah ma khân păng: “Bunuyh ri tăm du đang krăk ƀâu, ƀư n'gar jŭm mir, kuyh ntu mpet krăk ƀâu, ƀư du ngih tŭm gak, jêh nây ăn phung kan nkhôm mir krăk ƀâu, jêh ri păng hăn rgăn du bri êng.

² Tât yan pĕ play, kôranh mir njuăl du huê oh mon tâm mâp phung tăm krăk ƀâu gay sŏk du kô̆ kao play tă bơh đang krăk ƀâu.

³ Ƀiălah phung nây nhŭp bunuyh oh mon, dong jêh nây mprơh sĭt păng ti dơm.

⁴ Kôranh mir prơh hăn đŏng du huê oh mon êng, Khân păng dong ta bôk jêh ri suai rak ma păng.

⁵ Kôranh mir đă tay du huê oh mon êng hăn tât pôri khân păng nkhĭt lơi. Khân păng ƀư pônây ma âk phung oh mon êng, ƀaƀă khân păng dong, ƀaƀă khân păng nkhĭt lơi.

⁶ Kôranh mir hôm geh du huê êng, nây jêng kon bu klâu kon dul Păng rŏng ngăn ngên. Dăch dŭt, păng prơh kon păng nơm hăn, jêh ri mĭn êng pô aơ: ‘Khân păng mra yơk chrê ma kon bu klâu gâp!’

⁷ Ƀiălah phung bunuyh kan nkhôm tâm mir krăk ƀâu tâm nchră ndrăng khân păng nơm: ‘Aơ jêng nơm ndơn drăp. Kay lŏng, nkhĭt lơi hom păng, jêh ri drăp ndơ păng mra jêng ndơ ma he.’

⁸ Khân păng nhŭp kon bu klâu nây, nkhĭt lơi jêh ri mƀăr padih mir krăk ƀâu.

⁹ Pôri, moh nau kôranh mir krăk ƀâu mra ƀư? Păng mra văch ƀư rai phung bunuyh nkhôm dang krăk ƀâu nây, jêh nây jao mir krăk ƀâu nây ma phung êng.

¹⁰ Khân may ê hŏ geh rŏ nau Brah Ndu ngơi ƀơh: ‘Glo lŭ phung ƀư ngih mƀăr lơi, Hŏ jêng lŭ njônh ngih;

¹¹ Aơ jêng nau Kôranh Brah ƀư, Jêh ri nây jêng nau khlay ngăn tanăp măt he’?”

¹² Phung kôranh chiă uănh nau chroh phung Yuđa ŭch joi trong nhŭp Păng, yorlah gĭt jêh Păng sŏk nau hôr nây ŭch ntĭt ma khân păng. Ƀiălah khân păng klach ma phung ƀon lan, rĭ dĭng chalơi Păng gay hăn du.

Brah Ndu jêh ri Sêsar

¹³ Pakơi nây, khân păng prơh bar pe nuyh tâm mpôl Pharisi jêh ri tâm mpôl Hêrôt tât ma Brah Yêsu gay ndơm Păng tâm nau ngơi.

¹⁴ Khân păng văch lah ma Păng: “Hơi Nơm Nti, hên gĭt May jêng bunuyh sŏng ngăn, mâu chrê ma bu ôh, yorlah May mâu uănh ma bunuyh padih ôh, ƀiălah ntĭm nti trong Brah Ndu ma nau di. Pôri, dơi lĕ chê̆ pi ăn ma Sêsar di nau vay mâu lah mâu? Ăn hên chê̆ mâu lah mâu?”

¹⁵ Gĭt jêh nuih n'hâm nklă khân păng, Păng lah: “Mâm ƀư khân may rlong uănh Gâp? Djôt leo hom ma Gâp uănh du rêl đơniê.”

¹⁶ Khân păng djôt leo ăn Păng du rêl prăk. Păng ôp: “Mbu nơm rup jêh ri nau mbên aơ?” Khân păng plơ̆ lah: “Ndơ Sêsar.”

¹⁷ Brah Yêsu lah: “Mplơ̆ sĭt hom ma Sêsar ndơ Sêsar, jêh ri mplơ̆ hom ma Brah Ndu ndơ Brah Ndu.” Khân păng hih rhâl ma Păng.

Nau ôp ma nau khĭt dâk rêh tay

¹⁸ Ƀaƀă phung tâm mpôl Sađusê, jêng phung bunuyh lah pô aơ mâu geh nau dâk rêh tay, khân păng văch ôp ma Păng:

¹⁹ “Hơi Nơm Nti, Y-Môis hŏ ăn ma he nau vay nây: ‘Tơlah du huê bunuyh geh nâu păng khĭt, bi ur păng mâu geh kon ôh, bunuyh nây sŏk ur ndrô nây gay geh kon ntrok noi deh ma nâu păng.’

²⁰ Geh pơh oh nâu ri, nâu dak bôk sŏk ur, ƀiălah khĭt, mâu geh kon ôh.

²¹ Bunuyh rơh bar sŏk ur ndrô nây, jêh nây đŏng khĭt mâu geh kon; bunuyh rơh pe tâm ban lĕ.

²² Lĕ pơh nuyh nây mâu geh kon da dê. Nglĕ dŭt, bu ur nây khĭt tâm ban lĕ.

²³ Tâm nôk păng dâk rêh tay du nar kăndơ̆, păng jêng ur ma mbu nơm? Yorlah lĕ pơh bunuyh nây sŏk păng ƀư ur da dê jêh.”

²⁴ Brah Yêsu lah: “Di lĕ yor khân may mâu gĭt rbăng Nau Brah Ndu Ngơi jêh ri nau brah Brah Ndu, pôri khân may hŏ ƀư tih?

²⁵ Yorlah tơlah phung dâk rêh tay tă bơh nau khĭt, bu mâu sŏk ur ôh mâu đŏng sŏk sai, ƀiălah mra tâm ban ma tông mpăr klơ trôk.

²⁶ Bi nau bunuyh khĭt dơi dâk rêh tay, khân may ê hŏ rŏ nau nkoch bri ma pŭm lok tâm ndrom samƀŭt Y-Môis ƀơh? Mâm ƀư Brah Ndu lah jêh ma păng, ‘Gâp jêng Brah Ndu Y-Abraham, Brah Ndu Y-Isăk, Brah Ndu Y-Yakôp’?

²⁷ Păng mâu jêng ôh Brah Ndu ma bunuyh khĭt, ƀiălah Brah Ndu ma bunuyh rêh. Khân may vĭ vĭr toyh ngăn jêh.”

Nau vay ntăm khlay lơn

²⁸ Du huê tâm phung kôranh nchih samƀŭt văch dăch, tăng Brah Yêsu jêh ri phung Sađusê tâm rlăch ndrăng khân păng, saơ Brah Yêsu plơ̆ sĭt lah di ngăn, rĭ dĭng ôp Păng: “Tâm lĕ nau vay ntăm, moh nau vay khlay rlau lơn?”

²⁹ Brah Yêsu plơ̆ lah: “Nau vay ntăm khlay rlau lơn jêng, ‘Hơi Israel, gŭ iăt hom, Kôranh Brah, Brah Ndu he jêng Kôranh Brah knŏng nguay.

³⁰ Ăn may yơk rŏng ma Kôranh Brah jêng Kôranh Brah Ndu may ma lĕ nuih n'hâm, ma lĕ huêng, ma lĕ nau mĭn, ma lĕ n'hâm suan.’

³¹ Nau vay rơh bar jêng: ‘Ăn may rŏng ma nơm chiau meng may nâm bu may nơm lĕ.’ Mâu hôm geh nau vay ntăm toyh lơn ma bar nau aơ.”

³² Kôranh nchih samƀŭt nây lah: “Ơ Nơm Nti, di ngăn nâm bu May lah, Brah Ndu jêng knŏng nguay, padih Păng mâu hôm geh Nơm êng ôh.

³³ N'hêl nanê̆ ngăn, yơk rŏng ma Kôranh Brah ma lĕ nuih n'hâm, ma lĕ nau mĭn, ma lĕ n'hâm suan, jêh ri yơk rŏng ma phung chiau meng nâm bu he nơm, jêng khlay rlau lơn ma nau kan nhhơr lĕ rngôch ndơ ƀư brah gŭch jêh ri ndơ ƀư brah êng.”

³⁴ Tơlah Brah Yêsu saơ bunuyh nây plơ̆ lah ma nau blau mĭn, Păng lah: “May mâu gŭ ngai ôh bơh ƀon bri hađăch Brah Ndu.” Jêh nau nây mâu hôm geh du huê bunuyh janh ôp ma Păng du ntil nau.

Brah Krist jêh ri hađăch Đavit

³⁵ Dôl Brah Yêsu nti lah tâm ngih brah, Păng ôp: “Mâm ƀư phung kôranh nchih samƀŭt dơi lah ma Brah Krist jêng kon Y-Đavit?

³⁶ Brah Huêng Ueh nơm yơh nsŭk nsôr Y-Đavit lah pô aơ: ‘Kôranh Brah lah ma Kôranh Brah gâp: Gŭ hom mpeh pa ma Gâp, Tât nôk Gâp dơm phung rlăng May tâm dâng jâng May.’

³⁷ Y-Đavit nơm ntơ ma Păng jêng Kôranh Brah, pônây mâm ƀư Păng jêng kon hađăch nây?” Phung âk tăng Păng nti ma nau răm rhơn.

Njrăng ma phung kôranh nchih samƀŭt

³⁸ Dôl Brah Yêsu gŭ nti, Păng lah: “Njrăng hom ma phung kôranh nchih samƀŭt, jêng phung bunuyh ŭch nsoh ao jong hăn nsong pâl, ŭch bu mbah ma khân păng ta ntŭk tăch drăp,

³⁹ ŭch gŭ rnơl khlay rlau lơn tâm lĕ ngih rƀŭn jêh ri ntŭk bu yơk tâm lĕ nau sông sa.

⁴⁰ Khân păng rvăn ngih phung bu ur ndrô, jan lah mbơh sơm jŏ. Khân păng mra dơn nau phat dôih jâk lơn.”

Du huê bu ur ndrô nhhơr

⁴¹ Brah Yêsu gŭ tâm tra năp hip prăk nhhơr, jêh ri sek uănh phung ƀon lan nôk khân păng nhhơr prăk tâm hip nây.

⁴² Âk phung ndrŏng nhhơr âk prăk. Geh đŏng du huê bu ur ndrô o ach văch, nhhơr bar rêl prăk jê̆, geh rnoh jêng du kô̆ puăn kăk.

⁴³ Brah Yêsu kuăl phung oh mon văch jêh ri lah: “Nanê̆, Gâp lah ma khân may, bu ur ndrô o ach nây nhhơr jêh prăk tâm hip prăk âk lơn ma phung êng.

⁴⁴ Yorlah lĕ rngôch phung êng sŏk prăk khân păng rmeh gay nhhơr; bi bu ur ndrô nây, o ach hâu ngăn, ƀiălah nhhơr jêh lĕ rngôch drăp ndơ păng geh gay siăm nau rêh păng nơm.”