Markôs 11 - Nau Brah Ndu Ngơi 2023

Brah Yêsu lăp ta ƀon Yêrusalem

¹ Tơlah dăch tât ta ƀon Yêrusalem, ta meng ƀon jê̆ Bêtphajê jêh ri Bêthani, tâm tham ta yôk Ôlive, Brah Yêsu njuăl bar hê oh mon hăn,

² jêh ri đă: “Hăn lăp hom ta ƀon jê̆ tanăp khân may, lah lăp ta nây khân may mra saơ ro du mlâm kon seh bri ê hŏ mbu ncho, bu kât jêh ta nây. Doh hom păng jêh ri têk păng plơ̆ sĭt ta aơ.

³ Tơlah mbu ôp khân may: ‘Mâm ƀư khân may ƀư kơt nây?’ lah hom: ‘Kôranh Brah ŭch ma păng jêh ri Păng mra mplơ̆ tay gơnh ta aơ.’”

⁴ Phung oh mon hăn jêh ri saơ ta meng trong geh du mlâm kon seh bri bu kât jêh ta mpông sâng ngih. Khân păng doh rse seh bri nây.

⁵ Ƀaƀă bunuyh tâm phung gŭ ta nây ôp: “Moh ƀư khân may doh kon seh bri nây?”

⁶ Bar hê plơ̆ sĭt lah tĭng nau Brah Yêsu hŏ ntĭnh jêh; khân păng ăn têk seh bri.

⁷ Khân păng têk kon seh bri sĭt ma Brah Yêsu, lăk ao khân păng ta klơ ndŭr kơi seh bri, jêh nây Păng ncho păng.

⁸ Âk bunuyh lăk ao khân păng nơm ta trong, geh bunuyh lăk n'gĭng si khân păng sreh tă bơh mir.

⁹ Bunuyh hăn lor, nơm tĭng groi pakơi nter huy da dê pô aơ: “Hôsana! Tâm rnê ma Nơm văch tâm amoh Kôranh Brah!

¹⁰ Ueh maak ngăn ma ƀon bri hađăch dăch tât ma hađăch Đavit, chô yau he! Hôsana ta ntŭk dŭt prêh!”

Nau rak rtăp ma tơm rvi

¹¹ Brah Yêsu lăp tâm ƀon Yêrusalem jêh ri hăn lăp tâm ngih brah. Păng uănh lĕ rngôch ndơ văr jŭm, jêh nây Păng ndrel ma jât ma bar kôranh oh mon hăn tât ma ƀon Bêthani nôk nây trôk kêng măng jêh.

¹² Nar ôi taơ, khân păng luh tă bơh ƀon Bêthani, Brah Yêsu ji ngot.

¹³ Uănh bơh ngai, Păng saơ du tơm rvi geh âk n'ha, pôri păng văch uănh moh ndơ geh tâm tơm play nây. Ƀiălah dôl văch dăch, Păng mâu saơ play ôh knŏng n'ha dơm, yorlah nôk nây ê hŏ tât yan tơm rvi geh play.

¹⁴ Păng lah ma tơm rvi: “Mâu geh du huê nuyh hôm sa play may đŏng ôh!” Phung oh mon Păng tăng da dê nau nây.

Brah Yêsu ƀư kloh ngih brah

¹⁵ Brah Yêsu jêh ri phung oh mon tât ma ƀon Yêrusalem. Păng lăp tâm ngih brah, mprơh lĕ phung tăch drăp, bunuyh rvăt ndơ tâm ngih brah, nklơ̆ sưng phung tâm rgâl prăk, nklơ̆ rnơl phung tăch plŭk.

¹⁶ Păng mâu ăn bu djôt leo ndô ndơ hăn rgăn tâm ngih brah.

¹⁷ Jêh nây Păng ntĭm nti ma khân păng: “Mâu di ƀơh, geh nau nchih jêh pô aơ: ‘Ngih Gâp bu mra kuăl jêng ngih mbơh sơm ma lĕ rngôch mpôl băl bunuyh’? Ƀiălah khân may njêng ntŭk nây jêng trôm nau ntŭng.”

¹⁸ Nôk tăng nau aơ, phung kôranh ƀư brah toyh jêh ri phung kôranh nchih samƀŭt joi trong gay nkhĭt Păng. Khân păng klach ma Păng, yorlah lĕ rngôch phung âk hih rhâl ma nau Păng ntĭm nti.

¹⁹ Tât kêng măng, Brah Yêsu jêh ri phung oh mon du luh tă bơh ƀon Yêrusalem.

Nau nti bơh tơm rvi

²⁰ Ang ôi taơ, dôl hăn rgăn ta nây, khân păng saơ tơm rvi lĕ kro jêh bơh chiông tât ta reh;

²¹ Y-Pêtrôs kah gĭt tay nau nđaơ tê̆ jêh ri lah ma Brah Yêsu: “Hơi Nơm Nti, uănh ri! Tơm rvi May rtăp lĕ kro jêh.”

²² Brah Yêsu lah: “Ăn khân may geh nau chroh tâm Brah Ndu.

²³ N'hêl nanê̆, Gâp mbơh ma khân may, mbu nơm lah ma yôk aơ: ‘Pư hom, jêh ri klŭp tâm dak mƀŭt,’ tơlah bunuyh nây mâu geh nau đing ôh tâm nuih n'hâm, ƀiălah rnơm ngăn nau păng lah mra tât, bu mra ăn tât ngăn ma păng.

²⁴ Yor ri, Gâp lah ma khân may, moh nau khân may dăn dôl mbơh sơm, ăn he rnơm pô aơ khân may nơm hŏ dơn jêh, ri mơ khân may mra geh nau nây.

²⁵ Tơlah khân may dâk mbơh sơm, lah khân may geh nau mâu maak đah bu, yô̆ an hom, gay ma Mbơ̆ khân may gŭ klơ trôk yô̆ an lĕ nau tih khân may đŏng.”

Nau ôp ma nau dơi Brah Yêsu

²⁷ Brah Yêsu jêh ri phung oh mon plơ̆ tay ma ƀon Yêrusalem. Dôl Păng hăn tâm ngih brah, phung kôranh ƀư brah toyh, phung kôranh nchih samƀŭt, jêh ri phung kôranh bu ranh hăn ma Păng,

²⁸ jêh ri ôp ma Brah Yêsu: “Tă bơh nau dơi May ƀư nau aơ, mâu lah mbu nơm ăn nau dơi ma May gay ƀư nau nây?”

²⁹ Brah Yêsu lah: “Gâp ôp đŏng ma khân may du nau; plơ̆ lah hom ma Gâp, Gâp mra lah ma khân may gĭt tă bơh nau dơi Gâp ƀư nau aơ.

³⁰ Y-Yôhan-Ƀaptist ƀư nau ƀaptem tă bơh trôk mâu lah tă bơh kon bunuyh? Plơ̆ lah hom ma Gâp.”

³¹ Khân păng tâm nchră ndrăng khân păng nơm: “Tơlah he lah: ‘Tă bơh trôk,’ păng mra lah: ‘Pônây, mâm ƀư khân may mâu chroh ma Y-Yôhan?’

³² Ƀiălah tơlah he lah: ‘Tă bơh kon bunuyh’?” — Khân păng klach ma phung ƀon lan, yorlah lĕ rngôch bunuyh chroh ma Y-Yôhan jêng du huê nơm mbơh lor ngăn. —

³³ Yor ri, khân păng plơ̆ lah ma Brah Yêsu: “Hên mâu gĭt ôh.” Brah Yêsu lah ma khân păng: “Gâp mâu mra mbơh ma khân may gĭt tă bơh nau dơi Gâp ƀư lĕ nau aơ.”