Markôs 10 - Nau Brah Ndu Ngơi 2023

Nau Brah Yêsu pah kan ta n'gor Yuđa jêh ri Yêrusalem ( 10:1 – 13:37 ) Nau chalơi ur sai

¹ Bơh nây Brah Yêsu hăn lăp ma n'gor Yuđa jêh ri n'gor đah tê̆ dak krong Yurdan. Phung ƀon lan âk rgum ndrel jŭm Păng, jêh ri Păng ntĭm nti ma khân păng ƀoi kănđai ri lĕ.

² Geh ƀaƀă phung Pharisi văch ôp gay rlong uănh Păng: “Dơi vay du huê bu klâu chalơi ur păng?”

³ Brah Yêsu ôp: “Moh nau Y-Môis ntăm ma khân may?”

⁴ Khân păng ơh: “Y-Môis ăn nau dơi ma bu klâu nchih pŏk samƀŭt nau tâm chalơi, jêh nây chalơi ur păng.”

⁵ Ƀiălah Brah Yêsu lah: “Yor khân may dăng nuih n'hâm rĭ dĭng Y-Môis nchih nau vay aơ.

⁶ Ƀiălah ntơm bơh rhăk njêng neh ntu, ‘Brah Ndu knŏng njêng bu klâu jêh ri bu ur.’

⁷ ‘Yorlah nau nây bu klâu mra chalơi mê̆ mbơ̆ păng jêh ri tâm rnglăp đah ur păng,

⁸ jêh ri bar hê khân păng mra jêng du nglay săk.’ Pônây, ur sai mâu mra hôm jêng bar ôh, ƀiălah knŏng du nglay săk.

⁹ Pôri, kon bunuyh mâu dơi tâm nkhah phung Brah Ndu lĕ tâm rnglăp ndrel jêh.”

¹⁰ Dôl gŭ tâm trôm ngih, phung oh mon ôp tay ma Păng nau nây;

¹¹ Păng lah: “Mbu nơm chalơi ur gay gŭ ur êng jêng ƀư tih nau văng tĭr đah ur păng yơh.

¹² Bi tơlah bu ur nây chalơi sai jêh ri gŭ sai êng, bu ur nây đŏng ƀư tih nau văng tĭr.”

Brah Yêsu ăn nau ueh uĭn ma phung kon se jê̆

¹³ Bu njŭn leo kon se jê̆ ma Brah Yêsu, gay ăn păng pah ti ta khân păng, ƀiălah phung oh mon nduyh khân păng.

¹⁴ Saơ kơt nây, Păng ji nuih jêh ri lah ma phung oh mon: “Ăn hom phung kon se jê̆ văch ma Gâp, lơi ta buay khân păng ôh, yorlah ƀon bri hađăch Brah Ndu prăp ma phung nâm bu phung kon se jê̆ nây.

¹⁵ Nanê̆ ngăn, Gâp lah ma khân may, mbu nơm mâu sŏk dơn ƀon bri hađăch Brah Ndu nâm bu du huê kon se jê̆ mâu mra lăp ta nây ôh.”

¹⁶ Brah Yêsu ut ra u phung kon se jê̆ nây, pah ti klơ khân păng jêh ri ăn nau ueh uĭn ma khân păng.

Bu klâu ndăm ndrŏng

¹⁷ Dôl Brah Yêsu ntơm hăn nsong, geh du huê bunuyh nchuăt ran tât, chon mon panăp Păng jêh ri ôp: “Hơi Nơm Nti ueh, moh nau gâp mra ƀư gay dơn nau rêh n'ho ro?”

¹⁸ Brah Yêsu lah: “Mâm ƀư may kuăl ma Gâp jêng ueh? Mâu geh nơm ueh ôh, knŏng êng Brah Ndu dơm.

¹⁹ Nanê̆ may lĕ gĭt jêh nau vay ntăm: ‘Lơi nkhĭt bunuyh; lơi ƀư tih nau văng tĭr; lơi ntŭng; lơi ngơi mƀruh; lơi ndơm; yơk hom ma mê̆ mbơ̆ may.’ ”

²⁰ Bu klâu nây lah: “Hơi Nơm Nti, gâp djôt prăp jêh lĕ rngôch nau nây ntơm bơh gâp hôm ndăm.”

²¹ Brah Yêsu uănh ma păng ma nau rŏng jêh ri lah: “May hôm pưt du ntil. Hăn hom, tăch lĕ rngôch ndơ may geh jêh ri tâm pă ma phung o ach, jêh nây may mra geh jay ndơ khlay klơ trôk; jêh nây văch hom tĭng Gâp.”

²² Tăng kơt nây, bu klâu nây jâk muh măt, jêh nây păng du sĭt tâm nau rngot, yorlah păng geh drăp ndơ dŭt âk.

²³ Brah Yêsu uănh văr jŭm jêh nây lah ma phung oh mon: “Jêr ngăn ma bunuyh ndrŏng lăp tâm ƀon bri hađăch Brah Ndu!”

²⁴ Phung oh mon hih rhâl ma nau aơ. Ƀiălah Brah Yêsu lah đŏng: “Hơi phung kon, phung bunuyh rnơm nsing ma nau ndrŏng gay lăp tâm ƀon bri hađăch Brah Ndu dŭt jêr ngăn.

²⁵ Seh samô lăp tâm trôm nglai dơh lơn ma bunuyh ndrŏng lăp tâm ƀon bri hađăch Brah Ndu.”

²⁶ Phung oh mon hih rhâl ngăn, lah ndrăng khân păng: “Pôri, mbu nơm dơi klaih?”

²⁷ Brah Yêsu uănh ma khân păng jêh ri lah: “Kon bunuyh mâu dơi ƀư nau aơ ôh, ƀiălah Brah Ndu dơi ƀư; yorlah Brah Ndu ƀư lĕ rngôch nau.”

²⁸ Y-Pêtrôs lah ro: “Hơi Nơm Nti, hên chalơi lĕ rngôch ndơ gay tĭng May.”

²⁹ Brah Yêsu plơ̆ lah: “N'hêl nanê̆, Gâp lah ma khân may, mâu geh du huê nuyh yor Gâp jêh ri Nau Mhe Mhan Ueh chalơi jêh ngih vâl, oh nâu, oh nur, mê̆ mbơ̆, phung kon, neh mir lŏ,

³⁰ ƀiălah aƀaơ aơ, ta rnôk aơ ro, mra sŏk dơn du rhiăng tơ̆ âk lơn ma ngih vâl, oh nâu, oh nur, mê̆, phung kon, neh mir lŏ, ndrel ma nau bu ƀư mhĭk, jêh ri geh nau rêh n'ho ro tâm rnôk kăndơ̆.

³¹ Ƀiălah geh âk phung lor mra jêng nglĕ dŭt, jêh ri phung nglĕ dŭt mra jêng lor.”

Brah Yêsu mbơh lor tal pe nau Păng khĭt jêh ri dâk rêh tay

³² Brah Yêsu jêh ri oh mon dôl hăn trong hao ma ƀon Yêrusalem, Păng hăn lor ma khân păng. Phung oh mon hih rhâl, phung tĭng ndô̆ geh nau klach. Păng jă leo jât ma bar kôranh oh mon luh ntŭk êng jêh ri nkoch bri ma khân păng lĕ nau mra tât ma Păng nơm.

³³ Păng lah: “Aơ, he hăn hao ma ƀon Yêrusalem, bu mra jao Kon Bunuyh ma phung kôranh ƀư brah toyh jêh ri ma phung kôranh nchih samƀŭt. Khân păng mra phat dôih nkhĭt Păng, jêh nây jao Păng ma phung bu năch.

³⁴ Bu mra njrŏ mưch ma Păng, soh dak diu ta Păng, dong ma mâng, jêh ri nkhĭt khĭt Păng; ƀiălah tăch pe nar pakơi, Păng mra dâk rêh tay.”

Nau Y-Yakơ jêh ri Y-Yôhan dăn

³⁵ Bar hê kon bu klâu Y-Sêƀêđê jêng Y-Yakơ jêh ri Y-Yôhan văch dăch Brah Yêsu jêh ri lah: “Hơi Nơm Nti, hên ŭch May ƀư nau hên dăn.”

³⁶ Păng ôp: “Moh nau khân may ŭch Gâp ƀư ăn ma khân may?”

³⁷ Khân păng lah: “Nôk Nơm Nti dơi geh nau chrêk rmah, dăn ăn hên gŭ du huê mpeh pa ma May jêh ri du huê mpeh pa chiau May.”

³⁸ Ƀiălah Brah Yêsu lah: “Khân may mâu gĭt ôh moh nau khân may dăn. Khân may dơi nhêt kachok Gâp bơi nhêt, jêh ri dơi dơn nau ƀaptem Gâp dơn mâu lah mâu?”

³⁹ Khân păng lah: “Hên dơi lĕ!” Brah Yêsu lah: “Khân may mra nhêt kachok Gâp nhêt, jêh ri mra dơn nau ƀaptem Gâp dơn.

⁴⁰ Ƀiălah nau gŭ mpeh pa ma mâu lah mpeh pa chiau Gâp, mâu di ôh êng Gâp geh nau dơi ăn, tâm ntŭk nây prăp ma phung bunuyh bu nkra jêh.”

⁴¹ Tăng kơt nây, jât nuyh kôranh oh mon ri ji nuih ma Y-Yakơ jêh ri Y-Yôhan.

⁴² Brah Yêsu kuăl khân păng tât jêh ri lah: “Khân may gĭt pô aơ phung bu ăn dơi chiă uănh tâm phung bu năch, tŭn jot phung ƀon lan; phung kôranh chiă uănh toyh sŏk nau dơi ktang gay chiă uănh.

⁴³ Ƀiălah ta nklang khân may mâu di pônây ôh. Ƀiălah, mbu nơm ŭch jêng toyh tâm phung khân may, ăn păng jêng oh mon,

⁴⁴ bi mbu nơm ŭch jêng ƀư bôk tâm khân may; ăn păng ƀư dĭk ma lĕ rngôch.

⁴⁵ Yorlah Kon Bunuyh hŏ văch jêh mâu di gay bu pah kan ƀiălah gay pah kan, jêh ri nhhơr nau rêh păng nơm jêng rnoh chuai ma âk bunuyh.”

Brah Yêsu ƀư bah bunuyh chieh măt ta ƀon Yêrikô

⁴⁶ Brah Yêsu jêh ri oh mon păng hăn tât ta ƀon Yêrikô. Dôl Păng ndrel ma phung oh mon jêh ri phung ƀon lan âk du tă bơh ƀon, geh du huê bunuyh chieh măt amoh păng Y-Bartimê, kon bu klâu Y-Timê, gŭ kêng meng trong gŭ kâp dăn ndơ sa.

⁴⁷ Tăng lư jêh bu nkoch, nây jêng Brah Yêsu, bunuyh Nasaret, păng nter lah: “Ơ Brah Yêsu, Kon hađăch Đavit, dăn yô̆ nđach ma gâp ƀă!”

⁴⁸ Âk bunuyh buay păng, đă păng gŭ rklăk, ƀiălah păng nter lơ hâu nteh lơn: “Ơ Kon hađăch Y-Đavit, yô̆ nđach ma gâp ƀă!”

⁴⁹ Brah Yêsu nsrŭng jêh ri lah: “Kuăl hom păng hăn ta aơ.” Khân păng kuăl bunuyh chieh măt nây jêh ri lah: “Nâp hom nuih n'hâm, dâk hom, Păng kuăl may.”

⁵⁰ Bunuyh chieh măt mƀăr lơi ao jâr, dâk ndal ro jêh ri hăn ma Brah Yêsu.

⁵¹ Brah Yêsu ôp: “Moh nau may ŭch Gâp ƀư ăn ma may?” Păng ơh: “Hơi Nơm Nti, dăn ăn gâp dơi saơ ang.”

⁵² Păng lah: “Hăn hom, nau may chroh ƀư bah jêh may.” Bunuyh chieh măt dơi saơ ang ro jêh ri hăn tĭng Păng.