Markôs 1 - Nau Brah Ndu Ngơi 2023

Nau ndrăp lor ma nau Brah Yêsu pah kan ( 1:1-13 ) Nau Y-Yôhan-Ƀaptist pah kan

¹ Nau ntơm ma Nau Mhe Mhan Ueh ma Brah Yêsu Krist, Kon Brah Ndu.

² Tĭng nâm nau nchih jêh tâm ndrom samƀŭt nơm mbơh lor Y-Êsai: “Aơ, Gâp njuăl nơm mbơh ma Gâp hăn lor tanăp May, Bunuyh mra nkra trong ma May.

³ Geh bâr bunuyh kuăl nter tâm bri rdah: Nkra hom trong ma Kôranh Brah, Ƀư sŏng hom lĕ trong Păng.”

⁴ Y-Yôhan văch jêh tâm bri rdah, nti lah ƀă ƀư ƀaptem ƀă gay ma mbu nơm rmal nau tih, dơi geh nau yô̆ an.

⁵ Phung ƀon lan lam n'gor bri Yuđa jêh ri ƀon Yêrusalem hăn ma păng da dê, mbơh nau tih khân păng nơm jêh ri Y-Yôhan ƀư ƀaptem ma khân păng tâm dak krong Yurdan.

⁶ Y-Yôhan nsoh ao rsau seh samô, vân rse bŭt ntâu, sa krah nsăt jêh ri dak sŭt bri.

⁷ Păng mbơh nkoch pô aơ: “Nơm văch pakơi gâp, geh nau dơi lơn ma gâp, gâp mâu khư ôh doh rse ntâu jot Păng.

⁸ Gâp ƀư ƀaptem ma khân may ma dak, ƀiălah Păng mra ƀư ƀaptem ma khân may ma Brah Huêng Ueh.”

Brah Yêsu dơn nau ƀaptem jêh ri phung brah mhĭk ndơm Păng

⁹ Tâm lĕ nar nây, Brah Yêsu văch tă bơh ƀon Nasaret tâm n'gor Galilê, jêh ri Y-Yôhan ƀư ƀaptem ăn Păng ta dak krong Yurdan.

¹⁰ Dôl Brah Yêsu luh tă bơh dak, Păng saơ lĕ ndâr trôk pơk mpơl, jêh ri Brah Huêng Ueh jŭr drâm ta klơ Brah Yêsu nâm bu sĭm plŭk.

¹¹ Jêh nây geh bâr ngơi tă bơh trôk lah: “May jêng Kon Gâp rŏng ngăn ngên, tâm Păng Gâp geh nau maak ngăn.”

¹² Dôl rnôk nây, Brah Huêng Ueh ntrôl Păng hăn lăp tâm bri rdah.

¹³ Păng gŭ tâm bri rdah puăn jât nar, geh Satan ndơm, gŭ ndrel ma mpô mpa bri, jêh ri phung tông mpăr pah kan Păng.

Nau Brah Yêsu pah kan ta n'gor Galilê ( 1:14 – 9:50 ) Brah Yêsu ntơm pah kan. – Phung oh mon lor lơn

¹⁴ Jêh bu nhŭp krŭng Y-Yôhan, Brah Yêsu hăn ta n'gor Galilê, mbơh nkoch Nau Mhe Mhan Ueh Brah Ndu.

¹⁵ Păng lah: “Mông hŏ rĭng jêh, ƀon bri hađăch Brah Ndu văch dăch jêh, khân may rmal hom nau tih jêh ri chroh ma Nau Mhe Mhan Ueh.”

¹⁶ Dôl Brah Yêsu hăn njŏ tĭng kơh dak mƀŭt Galilê, Păng saơ Y-Simôn jêh ri oh păng jêng Y-Andrê dôl seng jal tâm dak mƀŭt, yorlah khân păng jêng bunuyh vay seng jal.

¹⁷ Brah Yêsu lah ma khân păng: “Tĭng hom Gâp, Gâp mra ƀư ăn khân may plơ̆ jêng nơm seng jal bunuyh.”

¹⁸ Khân păng chalơi jal gay hăn tĭng Păng ro.

¹⁹ Hăn ngai oi đê̆, Păng saơ Y-Yakơ, kon Y-Sêƀêđê, jêh ri oh păng jêng Y-Yôhan dôl gŭ jĭm jal tâm plŭng.

²⁰ Brah Yêsu kuăl khân păng ro. Khân păng chalơi mbơ̆ khân păng jêng Y-Sêƀêđê tâm plŭng ndrel ma phung kan nkhôm ma păng jêh ri hăn tĭng Păng.

Brah Yêsu mprơh brah mhĭk

²¹ Brah Yêsu ndrel ma phung oh mon hăn ta ƀon Kapernum. Ta nar saƀat, Păng lăp ro tâm ngih rƀŭn jêh ri ntơm nti lah.

²² Lĕ rngôch bunuyh hih rhâl da dê ma nau păng ntĭm nti, yorlah Păng nti geh nau dơi, mâu ôh nâm bu phung kôranh nchih samƀŭt.

²³ Nôk nây ro, tâm ngih rƀŭn geh du huê bunuyh geh huêng brah ƀơ̆ ƀơch lăp,

²⁴ nter huy: “Ơ Brah Yêsu bunuyh ƀon Nasaret, moh nau hên geh đah May? May văch gay ƀư rai hên ƀơh? Gâp gĭt jêh mbu May jêng, jêng Nơm Kloh Ueh tă bơh Brah Ndu.”

²⁵ Ƀiălah Brah Yêsu nduyh brah mhĭk nây: “Gŭ rklăk hom ro! Du luh hom bơh bunuyh aơ!”

²⁶ Huêng brah ƀơ̆ ƀơch rgu ktang bunuyh nây, lŭng nter jêh nây luh bơh bunuyh nây.

²⁷ Lĕ rngôch bunuyh hih rhâl da dê kŏ tât khân păng tâm ôp ndrăng khân păng: “Moh nau tât aơ? Du nau nti mhe bêng ma nau dơi! Păng ntrŭnh ma lĕ brah djơh jêh ri khân păng tông nau Păng da dê!”

²⁸ Amoh Brah Yêsu lư n'găr lam lĕ ƀon jê̆ jŭm n'gor Galilê.

Brah Yêsu ƀư bah po bu ur Y-Pêtrôs

²⁹ Dôl khân păng luh tă bơh ngih rƀŭn, Brah Yêsu ndrel ma Y-Yakơ jêh ri Y-Yôhan hăn lăp tâm ngih Y-Simôn jêh ri Y-Andrê.

³⁰ Po bu ur Y-Simôn geh nau ji kop bê̆ch ta klơ sưng bê̆ch. Khân păng mbơh ro nau ji kop păng ma Brah Yêsu.

³¹ Păng hăn êp, kuăn ta ti sâm rdâk păng dâk; păng mâu hôm nau ji kop jêh ri ntơm pah kan ma khân păng.

Brah Yêsu ƀư lĕ nau mbên khlay jêh ri mbơh nau mhe mhan ueh

³² Tât kêng măng, nôk nar lĕ nhâp, bu njŭn leo ma Brah Yêsu lĕ rngôch phung ji kuet jêh ri brah mhĭk lơh.

³³ Lĕ phung tâm ƀon rgum tanăp mpông.

³⁴ Brah Yêsu ƀư bah âk bunuyh ji kuet geh lĕ ntil nau ji êng êng, jêh ri mprơh âk brah mhĭk, ƀiălah mâu ăn ôh ma brah mhĭk dơi ngơi, yorlah khân păng lĕ gĭt năl jêh Păng.

³⁵ Tât nar ôi taơ, ƀhit rvi ang, Brah Yêsu dâk, du luh, hăn lăp tâm ntŭk bri rdah jêh ri mbơh sơm ta nây.

³⁶ Y-Simôn ndrel ma phung băl hăn joi Păng.

³⁷ Tơlah lĕ mâp Păng, khân păng lah: “Lĕ rngôch bunuyh tĭng joi May.”

³⁸ Ƀiălah Păng lah ma khân păng: “Hăn hom he tâm ntŭk êng, lăp lĕ ƀon jê̆ jê̆ jŭm aơ gay ma Gâp nti lah đŏng ta nây tâm ban lĕ; yor ma nau nây yơh Gâp văch.”

³⁹ Păng hăn lam tâm n'gor Galilê, mbơh nkoch tâm lĕ ngih rƀŭn jêh ri mprơh brah mhĭk.

Brah Yêsu ƀư bah nau ji phŭng

⁴⁰ Geh du huê bunuyh phŭng sa hăn ta Brah Yêsu, chon kômâk jêh ri vơh vơl: “Tơlah May ŭch, May ƀư ăn gâp dơi kloh.”

⁴¹ Brah Yêsu geh nau yô̆ nđach, yơr ti pah ta bunuyh nây jêh ri lah: “Gâp ŭch, kloh hom.”

⁴² Ƀât lât nau ji phŭng bah ro, bunuyh nây dơi kloh.

⁴³ Brah Yêsu đă păng sĭt ro, jêh ri ntĭnh ma păng:

⁴⁴ “Njrăng hom, lơi nkoch ôh nau nây ma bu, ƀiălah hăn mpơl hom ma kôranh ƀư brah, jêh ri nhhơr ndơ ƀư brah ma nau ƀư kloh may tĭng ntil nau Y-Môis ntĭm nti jêh, tâm ban du nau mbơh ma khân păng.”

⁴⁵ Ƀiălah bunuyh nây hăn, ntơm mbơh nkoch nau nây lam ntŭk, nkoch bri lĕ ntil nau nây, kŏ tât Brah Yêsu mâu hôm dơi mpơl ôh tâm ƀon nây, Păng gŭ tâm ntŭk bri rdah padih ƀon. Phung ƀon lan tă bơh lam ntŭk hăn tât ta Păng.