Malachi 3 - Nau Brah Ndu Ngơi 2023

Nar Brah Yêhôva

¹ “Aơ, Gâp njuăl nơm ntuh bâr Gâp gay nkra trong panăp Gâp, jêh ri Kôranh Brah nơm khân may joi mra văch ƀât lât lăp tâm ngih brah Păng; nâm bu ntĭt jêng nơm mbơh ma nau tâm rnglăp jêng nau khân may kâp gân. Aơ, Păng dôl văch!” Brah Yêhôva ma phung tahan lah pônây.

² Ƀiălah mbu nơm dơi dơn nar Păng văch? Mbu nơm dơi dâk lah păng tâm mpơl? Yorlah Păng jêng nâm bu ŭnh bunuyh blau krĕt prăk, nâm bu buh bunuyh blau ƀư kloh bok.

³ Păng mra gŭ nâm bu bunuyh blau chiăr prăk jêh ri tôl ăn chrêk; Păng mra jut lơi nau ƀơ̆ bơh phung kon bu klâu Lêvi, ăn khân păng chrêk kloh nâm bu mah jêh ri prăk. Khân păng mra nhhơr ndơ nhhơr ƀư brah ma Brah Yêhôva tâm nau sŏng srăng.

⁴ Nôk nây, Brah Yêhôva mra dơi dơn ndơ ƀư brah bơh phung Yuđa jêh ri phung ƀon lan Yêrusalem nâm bu tâm nar kăl e, jêh ri nâm bu rnôk ntơm saơm.

⁵ “Gâp mra văch dăch khân may gay phat dôih, jêh ri Gâp mra ƀư ndal mbơh nau tâm rdâng đah phung n'hŭm, đah phung văng tĭr, phung ton mƀruh, phung sa đĭ nau nkhôm ma phung pah kan, phung tŭn jot bu ur ndrô khĭt sai jêh ri phung kon đơi, phung ƀư djơh đah phung bu năch; yorlah khân păng mâu klach yơk ma Gâp.” Brah Yêhôva ma phung tahan lah pônây.

Ntĭm pah kan răp jăp ma Kôranh Brah

⁶ “Yorlah Gâp jêng Brah Yêhôva mâu blau rgâl ôh, yor nây phung kon sau Y-Yakôb mâu rai lôch ôh.

⁷ Ntơm bơh rnôk chô yau khân may, khân may nkhah du jêh bơh nau vay Gâp dăp, jêh ri mâu djôt prăp. Plơ̆ sĭt hom ma Gâp, pôri mơ Gâp plơ̆ sĭt ndrel ma khân may.” Brah Yêhôva ma phung tahan lah pônây. Ƀiălah khân may lah: “Mâm nau hên ƀư mra plơ̆ sĭt?”

Lơi sa ntŭng ndơ Kôranh Brah

⁸ “Bu dơi sa ntŭng đŏng ndơ Brah Ndu? Ƀiălah khân may lĕ sa ntŭng jêh ndơ Gâp!” Ƀiălah khân may hŏ lah: “Hŏ geh hên sa ntŭng ndơ Kôranh Brah?” “Khân may hŏ ntŭng jêh tâm lĕ ndơ du kô̆ tâm jât jêh ri tâm lĕ ndơ ƀư brah nhhơr.

⁹ Bu mra rak rtăp ma khân may, yor lĕ rngôch khân may, lĕ bri dak, sa ntŭng ndơ Gâp da dê.

¹⁰ Lĕ ndơ du kô̆ tâm jât, ăn khân may nhhơr ăn nŭm ta jay prăp, gay geh ndơ sa tâm ngih brah Gâp. Jêh ri ntơm bơh aƀaơ, Brah Yêhôva ma phung tahan, sŏk hom nau aơ gay rlong uănh Gâp, gĭt lah Gâp pơk mpông bloh tâm trôk, nkhŭt nau ueh lăng ma khân may âk ngăn kŏ tât mâu tŏng ntŭk khân may ma dơ!

¹¹ Yor khân may, Gâp mra buay lơi ma phung mpa sa ƀư rai kao play tă bơh neh khân may; jêh ri tơm krăk ƀâu khân may tâm mir mâu hôm ăn rŭng đŏng ôh play tât yan păng.” Brah Yêhôva ma phung tahan lah pônây.

¹² “Lĕ bri dak mra ntơ ma khân may geh nau ueh lăng ngăn, yorlah bri dak khân may jêng du n'gor bri dak dơi răm maak.” Brah Yêhôva ma phung tahan lah pônây.

¹³ Brah Yêhôva lah: “Khân may hŏ sŏk jêh nau ngơi brơl ŭch tâm rdâng đah Gâp.” Ƀiălah khân may lah: “Hŏ geh hên ngơi tâm rdâng đah May?”

¹⁴ Khân may hŏ lah: “Mâu khlay ôh pah kan ma Brah Ndu! Moh ndơ khlay ma hên, lah hên tông nau Păng ntăm, mâu lah chuat hăn ma nau rngot klâng tanăp măt Brah Yêhôva ma phung tahan?

¹⁵ Aƀaơ, hên kơp phung sưr jêng geh ueh lăng ngăn; phung ƀư nau djơh mhĭk mâu knŏng dơi geh nau chăt hao, ƀiălah khân păng hôm e rlong uănh Brah Ndu, jêh ri hŏ dơi klaih jêh!”

Nau khôm ma phung răp jăp

¹⁶ Nôk nây, phung klach yơk ma Brah Yêhôva nkoch bri ndrăng khân păng nơm, jêh ri Brah Yêhôva rkêng tôr iăt nau khân păng. Bu nchih jêh du ndrom samƀŭt ăn kah gĭt tanăp Brah Yêhôva ăn ma phung klach yơk ma Păng jêh ri yơk ma amoh Păng.

¹⁷ Brah Yêhôva ma phung tahan lah: “Khân păng mra jêng ndơ Gâp, ƀư drăp ndơn êng ma Gâp tâm nar Gâp pah kan. Gâp mra yô̆ nđach ma khân păng nâm bu du huê mbơ̆ yô̆ nđach ma kon bu klâu păng pah kan ma păng.

¹⁸ Nôk nây, khân may mra plơ̆ sĭt jêh ri saơ nau êng ngăn tâm phung sŏng srăng jêh ri phung djơh mhĭk, tâm phung pah kan ma Brah Ndu jêh ri đah phung mâu pah kan ma Păng.”